ប្រធានរាជបណ្ឌិតសភាកម្ពុជាបានជំរុញឲ្យមន្ត្រីថ្នាក់អភិបាលខេត្តក្រុងទាំងអស់អនុវត្តន៍ច្បាប់លើអ្នកវិនិយោគជនជាតិចិនឲ្យបានត្រឹមត្រូវ ដើម្បីធានាការលូតលាស់ផ្នែកសេដ្ឋកិច្ចនិងមិន ឲ្យប៉ះពាល់ផលប្រយោជន៍ជាតិ។
នៅក្នុងកិច្ចពិភាក្សាតុមូល ស្ដីពី «តើកម្ពុជាត្រូវការវត្តមានកងទ័ពបរទេសដែរឬទេ?» នៅព្រឹក នេះ លោក សុខ ទូច លើកឡើងថា ចិនយកលុយមកវិនិយោគនៅកម្ពុជា មានចំនួនច្រើន។
ក្នុងឱកាសនោះលោកក៏បានជំរុញឲ្យអាជ្ញាធរគ្រប់គ្រងដែនពង្រឹងការអនុវត្តច្បាប់លើជនជាតិចិន។
លោក សុខ ទូច៖ «ចឹងចិនមកមិនមែនយកច្បាប់ចិនមកអនុវត្តន៍នៅកម្ពុជាឯណា! ត្រូវគោរព ច្បាប់កម្ពុជា។ ចឹងចៅហ្វាយខេត្តចៅហ្វាយក្រុងត្រូវអនុវត្តន៍ទៅ កុំឲ្យភ្នែកសាឡេវ។ មើល ដំបូងត្រង់ ដល់គេឲ្យកន្លះលានភ្នែកសាឡេវបាត់។ ដៀងចុះដៀងឡើង មើលអត់ឃើញគេចាក់ លប់ឆ្នេរ។ ទៅបន្ទោសនេះ បន្ទោសនោះ! ដកកាវ៉ាត់ចោលទៅច្បាប់មានតើស។»
លោកបន្តថា ពេលនេះគណបក្សប្រជាជនកម្ពុជាទទួលបានសំឡេងទាំងអស់ក្នុងសភា គឺខុស និងត្រូវ ទទួលតែម្នាក់ឯង។
លោក សុខ ទូច៖ «មួយសារនេះគណបក្សប្រជាជនទាំងអស់ខុសឬ ត្រូវ ទទួលខុសត្រូវ អត់ឆ្លើយដាក់អ្នកណាទៀតទេ។ ចឹងដែលគេឲ្យតំណែងហើយ គួរយកតំណែងទៅបម្រើ ប្រជាជន មិនមែនយកតំណែងទៅលប់ឆ្នេរទេ។ ខ្ញុំនិយាយឲ្យត្រង់ព្រោះខ្ញុំក៏ជាសមាជិក គណបក្សប្រជាជនដែរ ព្រោះខ្ញុំជាមន្ត្រីរាជរដ្ឋាភិបាល។»
តាមរបាយការណ៍របស់ក្រសួងមហាផ្ទៃចេញផ្សាយកាលពីខែកញ្ញាឆ្នាំ២០១៨ បង្ហាញថា ជនជាតិចិននៅកម្ពុជាមានជំនួន២១ម៉ឺននាក់ ហើយក្នុងនោះកំពុង រស់នៅក្នុងខេត្តព្រះសីហនុ ចំនួន៧៨ ០០០នាក់។
នៅក្នុងពេលជួបជាមួយប្រជាពលរដ្ឋខ្មែរនៅក្នុងប្រទេសស្វីសកាលពីថ្ងៃទី២៤ខែតុលាឆ្នាំ២០១៨ លោកនាយករដ្ឋមន្ត្រីហ៊ុន សែនក៏បានអំពាវនាវកុំឲ្យពលរដ្ឋព្រួយបារម្ភពីចំនួនជនជាតិចិន ។ លោកថា ចិនកំពុងតែបោះលុយវិនិយោគជួយសេដ្ឋកិច្ចកម្ពុជា ហើយថា ពលរដ្ឋចិនមួយ ចំនួនពេលចប់ការងារនឹងវិលត្រឡប់ទៅប្រទេសពួកគេវិញ។