លោកនាយករដ្ឋមន្រ្តី ហ៊ុន សែន នឹងអញ្ជើញចូលរួមកិច្ចប្រជុំកំពូលអាស៊ី-ប៉ាស៊ីហ្វិក២០១៨ នៅប្រទេសនេប៉ាល់ នៅចុងសប្តាហ៍នេះ។
យោងតាមសេចក្តីប្រកាសព័ត៌មាន ក្រសួងការបរទេស និងសហប្រតិបត្តិការអន្តរជាតិ នៅថ្ងៃនេះបានឲ្យដឹងថា លោកនាយករដ្ឋមន្រ្តី ហ៊ុនសែន នឹងអញ្ជើញចូលរួមកិច្ចប្រជុំកំពូលអាស៊ី-ប៉ាស៊ីហ្វិក ២០១៨ តបតាមការអញ្ជើញរបស់ លោក ខាត់ហ្គា ប្រាសាត សាម៉ា អូលី នាយករដ្ឋមន្រ្តីនៃប្រទេសនេប៉ាល់ ចាប់ពីថ្ងៃទី៣០ ខែវិច្ឆិកា ដល់ ថ្ងៃទី២ ខែធ្នូ ឆ្នាំ២០១៨ ខាងមុខនេះ។
ក្នុងសេចក្តីប្រកាសព័ត៌មានដដែលបានឲ្យដឹងថា លោក ហ៊ុន សែន នឹងមានកិច្ចប្រជុំទ្វេភាគី ជាមួយលោកនាយករដ្ឋមន្រ្តីនៃប្រទេសនេប៉ាល់។ បន្ទាប់មកលោកនាយករដ្ឋមន្រ្តីទាំងពីរនឹងអញ្ជើញជាអធិបតីក្នុងពិធីចុះហត្ថលេខាលើឯកសារនៃកិច្ចសហប្រតិបត្តិការទ្វេភាគីមួយចំនួន។
លោក ហ៊ុន សែន បានប្រជុំទ្វេភាគីជាមួយលោកនាយករដ្ឋមន្រ្តីនេប៉ាល់ ស្តីពីសហប្រតិបត្តិការនៃប្រទេសទាំងពីរ កាលពីខែកញ្ញា ឆ្នាំ២០១៨ នៅក្នុងទីក្រុងញូវយ៉ក សហរដ្ឋអាមេរិក។
