កម្ពុជា និងថៃ នឹងសហការគ្នាក្នុងការរៀបចំសេវាស្នាក់នៅក្នុងថ្ងៃបុណ្យសមុទ្រដែលនឹងប្រព្រឹត្តទៅក្នុងខេត្តកោះកុងនាពាក់កណ្ដាលខែធ្នូខាងមុខនេះ។
អភិបាលរងខេត្តកោះកុង លោក សុខ សុធី មានប្រសាសន៍ប្រាប់ វី.អូ.ឌី ថា សេវាស្នាក់នៅក្នុងខេត្តកោះកុងបានរៀបចំរួចរាល់ហើយ ដោយមានការត្រៀមបន្ទប់ផ្ទះសំណាក់និងសណ្ឋាគារជាង២០០០បន្ទប់ ដែលតម្លៃគឺដូចគ្នានឹងថ្ងៃធម្មតាដែរពោលគឺចន្លោះពី១៥ទៅ៣០ដុល្លាក្នុងមួយយប់។ លោក សុខ សុធី បន្តថា ចំពោះតម្លៃម្ហូបអាហារ អាជ្ញាធរខេត្តបានសំណូមពរដល់អាជីវករកុំឲ្យមានការដំឡើងថ្លៃរួចហើយ។ ប្រភពដដែលបន្ថែមថា ស្តង់លក់អាហារជាង១០០០ ក៏នឹងដាក់លក់ម្ហូប និងចំណីអាហារជាច្រើនប្រភេទផងដែរ។
អភិបាលរងខេត្តកោះកុងរូបនេះ ឲ្យដឹងដែរថា សម្រាប់ភាគីថៃ ក៏បានត្រៀមរៀបចំកន្លែងស្នាក់នៅជាង៦០០បន្ទប់ដែលតម្លៃចន្លោះពី ៣០០ទៅ៨០០បាត នៅខ្លងយ៉ៃ និងចន្លោះពី ១២០០ទៅ១៥០០បាត នៅទីរួមខេត្តត្រាត សម្រាប់ទទួលភ្ញៀវស្នាក់នៅថ្ងៃនោះផងដែរ។
រដ្ឋមន្ត្រីក្រសួងទេសចរណ៍ កាលពីខែសីហាបានចេញសារាចរណែនាំ ៧ចំណុចស្ដីពីការពង្រឹងគុណភាពសេវាកម្មដែលក្នុងនោះរួមមានការរៀបចំសណ្ដាប់ធ្នាប់និងអនាម័យ គុណភាពសេវាកម្មនិងបដិសណ្ឋារកិច្ច បញ្ជីរាយនាមនិងតម្លៃ ការគ្រប់គ្រងសំណល់ បង្គន់អនាម័យ មធ្យោបាយដឹកជញ្ជូនភ្ញៀវ និងការណែនាំពីរមណីយដ្ឋាន៕
កាលពីឆ្នាំ២០១៧កន្លងទៅ ពិធីបុណ្យសមុទ្រត្រួវបានប្រារព្ធធ្វើឡើងនៅខេត្តកែប ហើយមានភ្ញៀវទេសចរប្រមាណ៥០ម៉ឺននាក់ចូលរួមទស្សនា៕