សហជីពមួយស្នើឲ្យមានការិយាល័យសហជីពនៅតំបន់សេដ្ឋកិច្ចពិសេសក្នុងខេត្តព្រះសីហនុ ខណៈតំបន់នោះកំពុងរងការរិះគន់ថា រំលោភសិទ្ធិកម្មករ ដោយពុំមានសហជីពឯករាជ្យ។
ក្នុងវេទិកាផ្សព្វផ្សាយព័ត៌មានស៊ើបអង្កេតនៅថ្ងៃនេះ ក្រោយពីមានការលើកឡើងអំពីបញ្ហាការងារនានាដែលកើតឡើងលើកម្មករនៅតំបន់សេដ្ឋកិច្ចពិសេសក្នុងខេត្តព្រះសីហនុ សហភាពការងារកម្ពុជាបានស្នើទៅមន្រ្តីក្រសួងការងារសុំឲ្យមានការិយាល័យសហជីពនៅក្នុងតំបន់នោះ។
អ្នកសម្របសម្រួលសហព័ន្ធកាត់ដេរកម្ពុជា នៃសហភាពការងារកម្ពុជាលោក អាន រ៉ាម៉ា មានប្រសាសន៍ថា កម្មករដែលបម្រើការងារក្នុងតំបន់សេដ្ឋកិច្ចពិសេស គឺតែងតែងរងការរើសអើង និងបញ្ឈប់ពីការងារពេលដឹងថាពួកចងក្រងបង្កើតសហជីព។
លោកបន្ថែមថា៖ «ក្រៅពីការទាញឲ្យមានកំហុស បញ្ឈប់ដោយគ្មានកំហុស ហើយមិនបានជូនដំណឹង មិនបានទូទាត់សំណងតាមផ្លូវច្បាប់ត្រឹមត្រូវ កិច្ចសន្យាមួយចំនួនហ្នឹងគឺគេអត់ ជាទូទៅ៣ខែ៦ខែ១ឆ្នាំ។ ពេលខ្លះគេមិនដឹង ធ្វើបាបកម្មករដោយរបៀបណាគេរង់ចាំតែឲ្យដល់កុងត្រា គឺបញ្ចប់កុងត្រាដោយអត់មានហេតុផលតែម្តង។ សួរថា គាត់ធ្វើការកើតអត់? គាត់ធ្លាប់កំហុសទេ?អត់! អញ្ចឹងកន្លែងហ្នឹងរកឃើញរើសអើងពិតប្រាកដហើយ»។
របាយការណ៍ស៊ើបអង្កតរបស់ វី.អូ.ឌី ដែលទើបចេញផ្សាយនៅខែវិច្ឆិកានេះ បានរកឃើញថារោងចក្រមួយចំនួន ស្ថិតក្នុងតំបន់សេដ្ឋកិច្ចពិសេសខេត្តព្រះសីហនុបានបង្ខិតបង្ខំឲ្យកម្មករធ្វើការខុសជំនាញ កាត់ប្រាក់ឈ្នួលពី២០ ទៅ៣០ដុល្លារពេលកម្មករឈប់សម្រាក់អត់ច្បាប់១ថ្ងៃ រឹតត្បិតសិទ្ធិសេរីភាព និងរំលោភសិទ្ធិការងារកម្មករជាដើម។ របាយការណ៍នេះរកឃើញថា នៅតំបន់សេដ្ឋកិច្ចនោះពុំសហជីពឯករាជ្យនោះទេ។
អគ្គនាយករងការងារ នៃក្រសួងការងារ លោក ប៉ុល ចាន់ដារ៉ា មានប្រសាសន៍ថា របាយការណ៍ស៊ើបអង្កេតរបស់ វី.អូ.ឌី រកឃើញនោះ មិនឆ្លុះបញ្ចាំងការពិតទាំងស្រុងនៅឆ្នាំ២០១៨ឡើយ គឺវាបានបង្ហាញចំណុចអវិជ្ជមានតិចតួចប៉ុណ្ណោះ ដែលក្រសួងនឹងយកបញ្ហានោះទៅពិចារណាដោះស្រាយ។
លោក ប៉ុល ចាន់ដារ៉ា និយាយថា គ្មានការរើសអើង ឬហាមឃាត់មិនឲ្យបង្កើតសហជីពក្នុងតំបន់សេដ្ឋកិច្ចពិសេសនោះឡើយ ប៉ុន្តែមិនអនុអញ្ញាតឲ្យមានការិយាល័យនៅក្នុងតំបន់នោះដែរ។
លោកបន្ថែមថា៖ «តាមពិតខាងតំបន់ឬក៏ខាងក្រសួងអត់មានបិទសិទ្ធិទេ គឺសិទ្ធិសេរីភាពក្នុងការបង្កើតគឺតាមចិត្តចង់ព្រោះមានច្បាប់មានរដ្ឋធម្មនុញ្ញហើយតើ! ប៉ុន្តែទាក់ទិននឹងការចង់ឲ្យមានការិយាល័យនៅក្នុងហ្នឹងមិនអាចទេព្រោះ សហជីពគាត់មានសកម្មភាពនៅខាងក្រៅរោងចក្រ ព្រោះតំបន់សេដ្ឋកិច្ចពិសេសហ្នឹងជារបស់ឯកជន»។
យោងតាមអត្ថបទស្រាវជ្រាវរបស់មជ្ឈមណ្ឌលអាមេរិកាំងសម្រាប់សាមគ្គីភាពការងារអន្តរជាតិ ឆ្នាំ២០១៧ ឲ្យដឹងថា នៅខេត្តព្រះសីហនុ មានតំបន់សេដ្ឋកិច្ចពិសេសចំនួន០៧កន្លែង ដែលទទួលបានអាជ្ញាប័ណ្ណវិនិយោគពីរដ្ឋាភិបាល។ យោងតាមរបាយការណ៍របស់តំណាងរដ្ឋបាលតំបន់សេដ្ឋកិច្ចពិសេសខេត្តព្រះសីហនុ ផ្ញើទៅក្រសួងពាណិជ្ជកម្មកាលពីថ្ងៃទី០៩ ខែកុម្ភៈ ឆ្នាំ២០១៨ ឱ្យដឹងថា តំបន់សេដ្ឋកិច្ចពិសេសក្រុងព្រះសីហនុមានក្រុមហ៊ុនវិនិយោគសរុបចំនួន១២៥ ហើយបានស្រូបទាញកម្លាំងពលកម្មសរុបជិត២ម៉ឺននាក់ ក្នុងនោះស្រីមានចំនួនជាង១ម៉ឺននាក់ ហើយប្រាក់បៀវត្សរ៍សម្រាប់ចំណាយទៅលើកម្មករក្នុងមួយខែៗ មានចំនួនជិត៤លានដុល្លារសហអាមេរិក៕
