អាជ្ញាធរកម្ពុជាបានឃាត់ខ្លួនជនជាតិចិនជាង ២០០នាក់ និងកំពុងរៀបចំឯកសារបញ្ជូនជនជាតិចិនទាំងនោះត្រលប់ទៅប្រទេសកំណើតវិញ បន្ទាប់ពីពួកគេត្រូវបានអាជ្ញាធរកម្ពុជាសង្ស័យថា បានប្រព្រឹត្តបទល្មើសចាប់ជំរិតតាមប្រព័ន្ធអ៊ីនធឺណិត។
ប្រធាននាយកដ្ឋានអន្តោប្រវេសន៍ក្រសួងមហាផ្ទៃ លោក អ៊ុក ហៃសីឡា ឲ្យ VOD ដឹងថា កាលពីម្សិលមិញនេះ កម្លាំងជំនាញស្នងការដ្ឋាននគរបាលខេត្តតាកែវ បានចុះបង្ក្រាបទីតាំងចាប់ជំរិតតាមប្រព័ន្ធអ៊ីនធឺណិតចំនួន ៤កន្លែង ស្ថិតក្នុងឃុំត្រពាំងក្រញូង ស្រុកតាំកក់ និងឃុំតាំងដូង ស្រុកបាទី នៃខេត្តកាកែវ។ ក្រោយប្រតិបត្តិការចុះបង្ក្រាបនេះ លោកថា អាជ្ញាធរបានឃាត់ខ្លួនជនបរទេស ២៣៥នាក់ ក្នុងនោះជនជាតិចិនមានច្រើនជាងគេរហូតដល់ទៅ ២៣៣នាក់ (ស្រី ៣៨នាក់) ព្រមទាំងជនជាតិម៉ាឡេស៊ីម្នាក់ និងជនជាតិថៃម្នាក់ទៀត។
លោក អ៊ុក ហៃសីឡា ឲ្យដឹងទៀតថា បច្ចុប្បន្ន អាជ្ញាធរកម្ពុជាកំពុងរៀបចំឯកសារ ដើម្បីបញ្ជូនជនបរទេសទាំងនេះត្រឡប់ទៅប្រទេសពួកគេវិញ ក្នុងរយៈពេល ២សប្ដាហ៍ទៀត។
ប៉ុន្ដែ នៅពេលសួរថា តើអាជ្ញាធរកម្ពុជាមានចំណាត់ការបែបណា ដើម្បីទប់ស្កាត់បទល្មើសចាប់ជំរិតតាមប្រព័ន្ធអ៊ីនធឺណិតដែលប្រព្រឹត្តដោយជនបរទេសកុំឲ្យកើតមានបន្ដទៀតនោះ លោកបានបង្វែរសំណួរទៅថ្នាក់លើរបស់លោក។
វី.អូ.ឌី បានព្យាយាមទាក់ទងអគ្គនាយករងនៃអគ្គនាយកដ្ឋានអន្ដោប្រវេសន៍ លោក កែវ វណ្ណថន ប៉ុន្ដែ លោកថា កំពុងជាប់ប្រជុំ។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ បានរំលឹកឲ្យរដ្ឋាភិបាលពិនិត្យមើលវិធានការរបស់ខ្លួនឡើងវិញ ដើម្បីកុំឲ្យមានការចោទប្រកាន់ថា រដ្ឋាភិបាលកំពុងបណ្ដែតបណ្ដោយឲ្យឧក្រិដ្ឋជនចិន យកទឹកដីកម្ពុជា ធ្វើជាទីតាំងនៃការប្រព្រឹត្តបទល្មើសចាប់ជំរិតតាមប្រព័ន្ធអ៊ីនធឺណែតនិងបទល្មើសផ្សេងទៀត។
លោកបន្ដថា៖ «រដ្ឋាភិបាលមិនទាន់បានប្រើប្រាស់យន្ដការពិនិត្យមើលទៅលើក្រុមមនុស្សដែលមកស្នាក់ក្នុងប្រទេសកម្ពុជាទេ។ នេះជាមេរៀនមួយហើយរឿងចាប់ជំរិតតាមអ៊ីនធឺណែតនេះ វាកើតឡើងម្ដងហើយម្ដងទៀត ក្រុមជនជាតិចិនហ្នឹងប្រព្រឹត្តជាក្រុមរាប់រយនាក់ […] រដ្ឋាភិបាលគួរតែយកវាជាមេរៀន ហើយរៀបចំវិធានការដើម្បីគ្រប់គ្រងរដ្ឋាភិបាលទៅលើជនជាតិចិនហ្នឹង»។
របាយការណ៍របស់ក្រសួងមហាផ្ទៃចេញផ្សាយកាលពីខែកញ្ញាកន្លងទៅបានបង្ហាញថា ជនជាតិចិននៅកម្ពុជាមានចំនួន ២១ម៉ឺននាក់ ក្នុងនោះ ជនជាតិចិនកំពុងរស់នៅខេត្តព្រះសីហនុ មានចំនួន ៧៨ ០០០នាក់។
យោងតាមរបាយការណ៍របស់អគ្គនាយកដ្ឋានអន្តោប្រវេសន៍គិតត្រឹមខែតុលាឆ្នាំ២០១៨ ជនជាតិចិនដែលត្រូវបានអាជ្ញាធរកម្ពុជាបញ្ជូនទៅប្រទេសចិនវិញ ភាគច្រើនបានប្រព្រឹត្តបទល្មើសចំនួន ២ប្រភេទ គឺបទល្មើសគំរាមជំរិត និងឆបោកតាមប្រព័ន្ធទូរគមនាគមន៍ (VOIP) ហើយជនជាតិចិនដែលបានប្រព្រឹត្តបទល្មើសទាំងពីប្រភេទនេះ មានចំនួន ៣៧៣នាក់ ក្នុងនោះស្រី ៦៦នាក់។
ក្នុងពិធីជួបជាមួយពលរដ្ឋខ្មែរនៅក្នុងប្រទេសស្វីស កាលពីថ្ងៃទី២៤ខែតុលា លោកនាយករដ្ឋមន្ត្រីហ៊ុន សែន បានអំពាវនាវកុំឲ្យពលរដ្ឋព្រួយបារម្ភពីចំនួនជនជាតិចិននេះ។ លោក ហ៊ុន សែន អះអាងថា ចិនកំពុងតែបោះលុយវិនិយោគមកជួយសេដ្ឋកិច្ចរបស់កម្ពុជា ហើយថា ពលរដ្ឋចិននឹងត្រឡប់ទៅប្រទេសពួកគេវិញ ក្រោយពេលចប់ការងារ៕
