រដ្ឋបាលរាជធានីភ្នំពេញ ចេញបម្រាមជាថ្មីម្ដងទៀតមិនអនុញ្ញាតឲ្យមានការប្រើប្រាស់ម៉ាស៊ីនថតរូបនិងវីដេអូបំពាក់លើយន្តហោះបញ្ជា(Drone)នៅក្នុងភូមិសាស្រ្តរាជធានីភ្នំពេញ ជាពិសេសក្នុងតំបន់ហាមឃាត់ជុំវិញបរិវេណព្រលានយន្តហោះ និងចំផ្លូវហោះហើររបស់យន្តហោះ។
សេចក្តីជូនដំណឹងចុះថ្ងៃទី២៦ ខែវិច្ឆិកាម្សិលមិញរបស់រដ្ឋបាលរាជធានីភ្នំពេញ បានរំលឹកថាកាលពីខែកុម្ភៈ ឆ្នាំ២០១៥ ខ្លួនបានចេញបំរាមម្តងរួចមកហើយ ដោយហាមឃាត់មិនឲ្យប្រើប្រាស់ម៉ាស៊ីនថតរូបនិងវីដេអូបំពាក់លើយន្តហោះបញ្ជា(Drone)ក្នុងភូមិសាស្ត្ររាជធានីភ្នំពេញ ក្នុងបំណងធានានូវការគោរពសិទ្ធិរស់នៅជាឯកជន រក្សាសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈ។ ប៉ុន្តែរដ្ឋបាលរាជធានីភ្នំពេញ ថាមកដល់ពេលនេះ បុគ្គលមួយចំនួនតូច នៅតែបន្តប្រើម៉ាស៊ីនថតរូបនិងវីដេអូបំពាក់លើយន្តហោះបញ្ជា(Drone)នេះនៅឡើយ ពិសេសនៅជុំវិញបរិវេណព្រលានយន្តហោះ និងតំបន់ផ្លូវហោះហើររបស់យន្តហោះ។
រដ្ឋបាលរាជធានីភ្នំពេញបញ្ជាក់ថា ដើម្បីរក្សាបាននូវសន្តិសុខ សុវត្ថិភាព និងបញ្ជៀសបាននូវគ្រោះថ្នាក់ដែលអាចកើតឡើងជាយថាហេតុចំពោះការហោះហើររបស់យន្តហោះ ប្រជាពលរដ្ឋត្រូវចូលរួមអនុវត្តតាមសេចក្តីជូនដំណឹងនេះ ហើយអាជ្ញាធរពាក់ព័ន្ធត្រូវសហការ អនុវត្ត ផ្សព្វផ្សាយឲ្យមានប្រសិទ្ធិភាព ព្រមទាំងចាត់វិធានការឲ្យបានម៉ឺងម៉ាត់ចំពោះបញ្ហានេះ។
រដ្ឋបាលរាជធានីភ្នំពេញបានលើកឡើងក្នុងសេចក្តីជូនដំណឹងថា៖
«ស្នងការដ្ឋាននគរបាលរាជធានីភ្នំពេញ បញ្ជាការដ្ឋានកងរាជអាវុធហត្ថរាជធានីភ្នំពេញ និង គណៈបញ្ជាការឯកភាពរដ្ឋបាលខណ្ឌទាំង១២ ត្រូវចាត់វិធានការណ៍ឲ្យបានម៉ឺងម៉ាត់ ដោយពុំត្រូវឲ្យមានការបង្ហោះម៉ាស៊ីនថតរូប និងវីដេអូបំពាក់លើយន្តហោះបញ្ជា(Drone) ក្នុងរាជធានីភ្នំពេញ ពិសេសតំបន់ជុំវិញផ្លូវហោះហើររបស់យន្តហោះដោយគ្មានច្បាប់អនុញ្ញាតជាដាច់ខាត។»
ប្រភពដដែលឲ្យដឹងថាក្នុងករណី ចាំបាច់ត្រូវប្រើប្រាស់ឧបករណ៍នេះ ពលរដ្ឋត្រូវសុំការអនុញ្ញាតពីរដ្ឋបាលរាជធានីភ្នំពេញ និងរដ្ឋលេខាធិការដ្ឋានអាកាសចរស៊ីវិលជាមុន៕