អាជ្ញាធរក្រុងព្រះសីហនុ ព្រមានថា នឹងបិទអាជីវកម្មណាដែលសរសេរនិងប្រើប្រាស់ភាសាខ្មែរមិនបានត្រឹមត្រូវលើស្លាកយីហោ។
ការព្រមាននេះ ធ្វើឡើងបន្ទាប់ពីអ្នកប្រើប្រាស់បណ្តាញសង្គម បានចែករំលែកគ្នាជាបន្តបន្ទាប់នូវស្លាកយីហោនៅតាមភោជនីយដ្ឋាន និងកន្លែងលក់ដូរមួយចំនួននៅក្រុងព្រះសីហនុ ដែលសសេរភាសាខ្មែរខុសអក្ខរាវិរុទ្ធ និងប្រើប្រាស់ខុសក្បួនវេយ្យាករណ៍ជាដើម។
អភិបាលក្រុងព្រះសីហនុ លោក អុី សុខឡេង មានប្រសាសន៍ថា កន្លងទៅថ្មីៗនេះ ក្រុមការងាររបស់លោកបានសហការជាមួយអាជ្ញាធរខេត្តចុះរុះរើស្លាកយីហោប្រហែល១០ស្លាក របស់ជនជាតិចិនដែលសរសេរខុសអក្ខរាវិរុទ្ធ និងវេយ្យាករណ៍ខ្មែរជាដើម។ លោកថា ក្រោយពីរុះរើ អាជ្ញាធរបានហៅម្ចាស់ហាងមកអបរំនិងណែនាំឲ្យធ្វើត្រឹមត្រូវតាមច្បាប់កម្ពុជា ដោយថា បើមិនគោរពតាមនឹងបិទហាងមិនឲ្យធ្វើអាជីវកម្មជាដើម។
លោកមានប្រសាសន៍ថា៖ «មុនលើកស្លាក គាត់ត្រូវសុំច្បាប់ ហើយត្រូវសរសេរអក្សរខ្មែរនៅពីលើអក្សរចិន។ បើសរសេរអក្សរខ្មែរខុស លើកទីមួយយើងហើយគាត់មកអប់រំ ណែនាំ តែម្តងទេ បើលើកទីមួយគាត់មិនកែតម្រូវ លើកទីពីរ យើងមានវិធានការបិទ»។
បើតាមកាសែតភ្នំពេញប៉ុស្តិ៍ចុះផ្សាយកាលពីទី២៧ ខែវិច្ឆិកាម្សិលមិញ បានឲ្យដឹងថា ក្នុងរយៈពេល ៥ ថ្ងៃដែលគិតមកដល់ត្រឹមថ្ងៃម្សិលមិញអាជ្ញាធរខេត្តព្រះសីហនុបានចុះទៅរុះរើដកស្លាកយីហោរបស់ជនជាតិចិន ដែលសរសេរអក្សរខ្មែរខុស ឬដាក់ឈ្មោះយីហោមិនត្រឹមត្រូវបានជាង ២០០។ ប្រភពដដែលឲ្យដឹងថាការសរសេរអក្សរខុសនេះគឺដោយសារតែពួកគេមិនចេះអក្សរខ្មែរ ហើយប្រើកម្មវិធីបកប្រែ Google Translate៕