រដ្ឋាភិបាល អះអាងថា បាននិងកំពុងចាត់វិធានការយ៉ាងតឹងរ៉ឹងចំពោះជនបរទេសទាំងឡាយនៅខេត្តព្រះសីហនុដែលប្រព្រឹត្តផ្ទុយនឹងច្បាប់កម្ពុជា ដោយថាដើម្បីជាការបម្រើផលប្រយោជន៍សាធារណៈនៅតំបន់នោះ។
សេចក្តីថ្លែងការណ៍របស់ការិយាល័យអ្នកនាំពាក្យរាជរដ្ឋាភិបាល ចុះផ្សាយកាលពីថ្ងៃទី២៧ ខែវិច្ឆិកាម្សិលមិញនេះឲ្យដឹងថា កាលពីពេលថ្មីៗនេះ អ្នកប្រើប្រាស់បណ្តាញសង្គមបានចែករំលែកព័ត៌មានមួយចំនួនដែលមានភាពមិនប្រក្រតីនៅក្រុងព្រះសីហនុ ដោយសង្ស័យថាពាក់ព័ន្ធនឹងជនជាតិចិន។
ការិយាល័យអ្នកនាំពាក្យរាជរដ្ឋាភិបាល បានលើកឡើងក្នុងសេចក្តីថ្លែងការណ៍នេះថា៖
«រាជរដ្ឋាភិបាលបាននឹងកំពុងចាត់វិិធានការយ៉ាងម៉ឺងម៉ាត់ ក្នុងការពង្រឹងសន្តិសុខ សុវត្ថិភាព ក៏ដូចជាសណ្នាប់ធ្នាប់សង្គម សម្រាប់បម្រើផលប្រយោជន៍សាធារណៈនៅតំបន់នោះ។»
ប្រភពដដែលឲ្យដឹងថា កន្លងទៅរដ្ឋាភិបាលបានឃាត់ខ្លួនអ្នកទេសចរបរទេសជាបន្តបន្ទាប់ និងបញ្ជូនជនទាំងនោះទៅប្រទេសដើមវិញ ក្រោយពីសមត្ថកិច្ចរកឃើញថា ពួកគេមិនគោរពច្បាប់កម្ពុជា។
អភិបាលក្រុងព្រះសីហនុ លោក អុី សុខឡេង មានប្រសាសន៍ថា ក្រុមការងាររបស់លោកបានសហការជាមួយមន្ត្រីពាក់ព័ន្ធ ដើម្បីរៀបចំសណ្តាប់ធ្នាប់នៅតំបន់នោះផងដែរ ដោយថាដើម្បីឲ្យស្របតាមគោលនយោបាយភូមិ/ឃុំមានសុវត្ថិភាព។
លោកមានប្រសាសន៍ថា៖ «ពាក់ព័ន្ធការរៀបចំសន្តិសុខគឺទីមួយពាក់ព័ន្ធភូមិឃុំមានសុវត្ថិភាព។ យើងធ្វើរដ្ឋបាលចំហរ ដឹកនាំដោយអភិបាល អភិបាលរង ដឹកនាំកំលាំងចុះទៅត្រួតពិនិត្យ ទៅលើទីតាំងដែលយើងសង្ស័យថា វាមិនសុវត្ថិភាព»។
មន្ដ្រីសម្របសម្រួលសមាគមអាដហុកប្រចាំនៅខេត្តព្រះសីហនុ លោកស្រី ជាប សុធារី មានប្រសាសន៍ថា ដើម្បីទប់ស្កាត់កុំឲ្យមានភាពមិនប្រក្រតីនៅក្រុងព្រះសីហនុបាន លុះត្រាតែរដ្ឋាភិបាលបញ្ជូនសមត្ថកិច្ចឲ្យច្រើនទៅការពារ២៤ម៉ោង នៅតំបន់សំខាន់ៗ និងធ្វើការអប់រំផ្នែកច្បាប់ដល់ម្ចាស់អាជីវកម្ម និងអ្នកគ្រប់គ្រងជនបរទេសទាំងនោះជាដើម។
លោកស្រីមានប្រសាន៍ថា៖ «ស្នងការនគរបាលជាតិគួរតែបន្ថែមកំលាំងសមត្ថកិច្ចឲ្យបានច្រើនសម្រប់ខេត្តនេះ ព្រោះរាល់ថ្ងៃសមត្ថកិច្ចមានចំនួនតិច។ ពេលមានរឿងកើតឡើង យើងពិបាករកមនុស្សធ្វើការងារដែរ។ មូយទៀតសុំឲ្យធ្វើការផ្សព្វផ្សាយពីច្បាប់កម្ពុជា ពីច្បាប់ព្រហ្មទណ្ឌ ហើយនិងគោលការក្នុងការការពារសន្តិសុខសណ្តាប់ធ្នាប់ក្នុងខេត្តនេះ ទៅដល់ខាងក្រុមហ៊ុន ឬទៅតាមទីកន្លែងដែលមានជនជាតិចិនដែលគាត់ធ្វើការងារ ឬគាត់រស់នៅ »។
យោងតាមរបាយការណ៍ ចុះកាលពីថ្ងៃទី២៤ ខែមករា ឆ្នាំ២០១៨ ដែលផ្ញើទៅរដ្ឋមន្ដ្រីក្រសួងមហាផ្ទៃ អភិបាលខេត្តព្រះសីហនុ លោក យន្ដ មីន បានគូសបញ្ជាក់ថា ក្នុងឆ្នាំ២០១៧ ជនបរទេសចូលមកស្នាក់នៅក្នុងខេត្តព្រះសីហនុ មានចំនួន ៦ ៣៨៥នាក់ ក្នុងនោះ ជនជាតិចិនមានច្រើនជាងគេ គឺ ៤ ៤៩៨នាក់ ឥណ្ឌូណេស៊ី មាន៩០៩នាក់ ហ្វីលីពីន ១២៧នាក់ ម៉ាឡេស៊ី ១២២នាក់ និងជនជាតិផ្សេងៗទៀត។
អាជ្ញាធរកម្ពុជាកាលពីថ្ងៃទី២៦ ខែវិច្ឆិកា ឆ្នាំ២០១៨ បានចុះបង្ក្រាបទីតាំងចាប់ជំរិតតាមប្រព័ន្ធអ៊ីនធឺណិតចំនួន ៤កន្លែង ស្ថិតក្នុងឃុំត្រពាំងក្រញូង ស្រុកតាំកក់ និងឃុំតាំងដូង ស្រុកបាទី នៃខេត្តកាកែវ។ ក្រោយប្រតិបត្តិការចុះបង្ក្រាបនេះ អាជ្ញាធរបានឃាត់ខ្លួនជនបរទេស ២៣៥នាក់ ក្នុងនោះជនជាតិចិនមានច្រើនជាងគេរហូតដល់ទៅ ២៣៣នាក់៕
