មេដឹកនាំបក្សកាន់អំណាច លោក ហ៊ុន សែន បានទម្លាយពីគម្រោងវាយបកអតីតមេដឹកនាំបក្សប្រឆាំងអំឡុងជម្លោះនយោបាយ កាលពី៦ឆ្នាំមុន ដោយថា កុំតែគេចខ្លួនបានមុន កុំអីត្រូវស្លាប់ហើយ។
ការអះអាងរបស់លោក ហ៊ុន សែន នេះធ្វើឡើងក្នុងពិធីសំណេះសំណាលជាមួយកម្មករ នៅខេត្តកណ្តាល នាថ្ងៃពុធនេះ។
លោក ហ៊ុន សែន ថ្លែងថា ស្ថិរភាពនយោបាយនៅពេលនេះ អំណោយផលល្អដល់ការអភិវឌ្ឍប្រទេសជាងឆ្នាំ២០១៣។ លោកថា ពេលនោះ មេដឹកនាំបាតុកម្មបានស្រែកទាមទារឲ្យលោកចុះចេញពីតំណែង ដោយប្រើពាក្យថា ហ៊ុន សែន អើយចុះចេញទៅៗ ខណៈគណបក្សលោកបានឈ្នះឆ្នោតដឹកនាំរដ្ឋាភិបាល។
លោកថា៖ «ពេលហ្នុងអ្ហា! បើអ្ហែងគិតមិនរហ័សទេ អ្ហែងងាប់បាត់ហើយ។ អញប្រាប់អ្ហែងទៅ តែឯងពូកែរត់ ស្រែកក៏ពូកែ ដល់រត់ក៏លឿន។ តែគ្រាន់តែគេមិនដេញតាមតែប៉ុណ្ណឹងទេ ឲ្យអ្ហែងរត់សិន។ អញក៏មិនចង់សម្លាប់ឯងដែរ ប៉ុន្តែឯងឈាន១ជំហានទៀតហួសបន្ទាត់ក្រហម ពួកឯងក៏នឹងរងការវាយប្រហារឆ្លើយតបដែរ»។
បើតាមលោក ហ៊ុន សែន រដ្ឋាភិបាលមួយដែលកើតចេញពីការបោះឆ្នោត នឹងមិនបណ្តោយឲ្យគណបក្សចាញ់ឆ្នោតប្រមូលកម្លាំងមកធ្វើបាតុកម្មផ្តួលរំលំនោះទេ។
អតីតតំណាងរាស្ត្របក្សប្រឆាំងលោក អ៊ូ ច័ន្ទរ័ត្ន មានប្រសាសន៍ថា មិនគាំទ្រការដែលមេដឹកនាំនៅចឹញ្ចឹមចិត្តចង់សម្លាប់គ្នា ព្រោះតែការប្រជែងអំណាចនោះទេ ខណៈច្បាប់តម្រូវឲ្យអ្នកនយោបាយប្រកួតអំណាច តាមរយៈបោះឆ្នោត តាមយន្តការប្រជាធិបតេយ្យនោះ។
លោកថា៖ «បើយើងនៅតែមានការកាប់សម្លាប់គ្នាទៅវិញទៅមក បំផ្លាញគ្នាទៅវិញទៅមក អ្នកដែលចំណេញគឺបរទេសទេ។ អ្នកដែលនៅជិតខាងយើង គេចាំតែមើលឃើងថាយើងបែកបាក់គ្នារបៀបម៉េច ?យើងកាប់សម្លាប់គ្នារបៀបម៉េច? ហើយគេនឹងលូកដៃទាញយកផលចំណេញ។ អាហ្នឹងយើងរៀនក្នុងប្រវត្តិសាស្ត្រឃើញហើយ ។ យើងសម្លាប់គ្នាហ្នឹង យើងគ្មានបានផលអីពីការសម្លាប់គ្នាហ្នឹងទេ?ក្រៅពីផលវិនាសនៃប្រទេសជាតិ»។
អ្នកវិភាគនយោបាយ លោកបណ្ឌិត ឡៅ ម៉ុងហៃ ពន្យល់ថា ជាធម្មតាបើមេដឹកនាំមានអំណាចត្រួតត្រាស្ថាប័នទាំងអស់របស់រដ្ឋ លោកថា សារនយោបាយ តែងតែបង្កប់នូវភាពគ្រោតគ្រាតបែបនេះ។ ប៉ុន្តែលោកថា សារនេះក៏បង្ហាញថា មេដឹកនាំ កំពុងព្រួយបារម្ភ ពីឥទ្ធិពលដៃគូប្រកួតរបស់ខ្លួនដែរ ។
លោកថា៖ «ខ្ញុំហ៊ានថា សម រង្ស៊ី ហ្នឹងនៅមានការគាំទ្រច្រើន ហើយគាត់ក៏ជាកម្លាំងនយោបាយមួយនៅក្នុងស្រុក។ ថ្វីត្បិតតែគាត់នៅក្រៅស្រុកមែន ហើយសម្រាប់អ្នកនយោបាយយើងហ្នឹង ក៏ជាខ្មាំងសត្រូវសំខាន់មួយនៅក្នុងប្រទេស»។
លោកនាយករដ្ឋមន្រ្តី ហ៊ុន សែន ក្នុងពិធីជួបសិស្សប្រឡងជាប់បាក់ឌុបនិទ្ទេស A ក្នុងរាជធានីភ្នំពេញ កាលពីថ្ងៃទី៨ ខែវិច្ឆិកា ឆ្នាំ២០១៨ បានផ្ញើសារនយោបាយទៅដៃគូប្រកួតរបស់ខ្លួនថា បើចង់បង្កើតវប្បធម៌បង្រួបបង្រួមជាតិ ត្រូវបង្កើតវប្បធម៌ទុកចិត្តគ្នាជាមុន៕