លោកនាយករដ្ឋមន្ត្រី ហ៊ុន សែន បានជំរុញជាថ្មីទៀតទៅរដ្ឋមន្ត្រីក្រសួងការងារ និងក្រសួងយុត្តិធម៌ឲ្យពន្លឿនការបញ្ចប់បណ្ដឹងប្រឆាំងនឹងមេដឹកនាំសហជីព ដោយថាដើម្បីជំរុញដល់ការបើកទូលាយសេរីភាពក្នុងវិស័យការងារ។
ក្នុងពិធីសំណេះសំណាលជាមួយកម្មករនៅខេត្តកណ្តាលនាថ្ងៃនេះ លោក ហ៊ុន សែន បានអំពាវនាវទៅគ្រប់សហជីពទាំងអស់ដែលជាប់ពាក្យបណ្តឹងត្រូវបញ្ជូនសុំណុំឯកសារពាក់ព័ន្ធនោះទៅក្រសួងការងារ និងក្រសួងយុត្តិធម៌ ដើម្បីឲ្យក្រសួងទាំងពីរធ្វើការដោះស្រាយឲ្យបានឆាប់រហ័ស។
លោកបន្ថែមថា៖ «សូមឲ្យក្រសួងការងារសហការនឹងក្រសួងយុត្តិធម៌ ហើយតាមរយៈក្រសួងយុត្តិធម៌ធ្វើការជាមួយ តុលាការ ដើម្បីបិទបញ្ជប់សុំណុំរឿងទាំងឡាយ ដែលពាក់ព័ន្ធជាមួយសកម្មភាពរបស់សហជីព ដែលតំណាងឲ្យកម្មករ ទោះតិចទោះច្រើន។ នេះគឺជាផ្នែកមួយ នៃការធានាសិទ្ធិការងារ សិទ្ធិនយោបាយ របស់សហជីព និងរបស់កម្មករ»។
ជាមួយនឹងការជំរុញឲ្យពន្លឿនការដោះស្រាយបញ្ចប់បណ្តឹងសហជីពត្រឹមឆ្នាំ២០១៨នេះ លោកនាយករដ្ឋមន្រ្តី ហ៊ុន សែន ក៏បានស្នើទៅគ្រប់មេដឹកនាំសហជីព និងតំណាងកម្មករទាំងអស់ត្រូវគោរពច្បាប់ផងដែរ។
មេដឹកនាំសហជីពមួយចំនួន ដូចជា លោក រ៉ុង ឈុន លោក ជា មុន្នី លោក ប៉ាវ ស៊ីណា លោកស្រី យ៉ាង សុភ័ណ្ឌ លោកស្រី ម៉ម ញឹម លោក អាត់ ធន់ និងមន្ត្រីសហជីពមួយចំនួនទៀត ត្រូវថៅកែរោងចក្រប្តឹងទៅតុលាការជាបន្តបន្ទាប់ ក្រោយពីដឹកនាំកម្មករទាមទារលក្ខខណ្ឌការងារ និងប្រាក់ឈ្នួលកាលពីចុងឆ្នាំ២០១៣ និងដើមឆ្នាំ២០១៤។
ប្រធានសម្ព័ន្ធសហជីពកម្ពុជា លោកស្រី យ៉ាង សុភ័ណ្ណ ដែលអះអាងថា សហជីពគាត់រងបណ្តឹង៤ពីថៅកែនោះ ប្រាប់ វីអូឌី ថា សហជីពមួយនេះកំពុងដំណើរការរៀបចំឯកដាក់ទៅក្រសួងនៅថ្ងៃនេះ។ លោកស្រីបានសាទរចំពោះប្រមុខរដ្ឋាភិបាលដែលសម្រេចបញ្ចប់បណ្តឹងលើសហជីព។
អ្នកស្រីបន្ថែមថា៖ «ខ្ញុំសប្បាយចិត្តដែរ ដែលគាត់មានគំនិតដកបណ្តឹងករណីដូចពួកខ្ញុំអញ្ចឹង។ ពីព្រោះតាមពិតទៅពួកខ្ញុំជាសហជីពគួរតែទទួលបានការលើកទឹកចិត្តទៅវិញទេ។ ពីព្រោះពួកខ្ញុំធ្វើការងារក្នុងលើកកម្ពស់សិទ្ធិរបស់កម្មករ និងធ្វើការផ្នែកសង្គមនេះមិនទទួលបានប្រាក់ចំណូលពីណានោះទេ មិនគួរណាត្រូវបានក្រុមហ៊ុនមកប្តឹងពួកខ្ញុំអញ្ចឹងទេ»។
ប្រធានសហភាពការងារកម្ពុជាលោក អាត់ ធន់ មានប្រសាសន៍ថា សហជីពរបស់លោកបានរងបណ្តឹងពីក្រុមហ៊ុនជិត១០០បណ្តឹងក្នុងនោះបណ្តឹងព្រហ្មទណ្ឌមានប្រមាណ៥០បណ្តឹង ហើយថា សហជីពលោកដំណើរដាក់ឯកសារពាក់ព័ន្ធទៅក្រសួងការងារបានប្រហែល៩០% ប៉ុន្តែចំណាត់ការយ៉ាងណានោះមិនទាន់ដឹងនៅឡើយទេ។
ប្រធានសហភាពរូបនេះឲ្យដឹងថា ក្រោយពីលោកនាយករដ្ឋមន្រ្តីប្រកាសឲ្យបញ្ចប់បណ្តឹងលើសហជីព គឺរូបលោកបានទទួលដីកាចំនួនពីរពីតុលាការឲ្យចូលខ្លួនដោះស្រាយក្នុងខែធ្នូខាងមុខនេះ។
លោកបន្ថែមថា៖ «៩៨ទៅ៩៩% គឺយើងបានផ្ញើទៅហើយ មិនថាក្រសួងការងារធ្វើការជាមួយក្រសួងយុត្តិធម៌ ឬក៏តុលាការយ៉ាងម៉េចទេ? យើងមិនបានដឹងច្បាស់ទេ ប៉ុន្តែយើងទទួលបានដីកាពីរពីតុលាការ ដីកា១ឲ្យចូលថ្ងៃទី៤ ដើម្បីដោះស្រាយរឿងករណីជាមួយថៅកែរោងចក្រ SL ហើយដីកាទី២ ឲ្យចូលថ្ងៃទី៨ ខែ១២ហ្នឹង ដើម្បីដោះស្រាយករណីផ្លូវវេងស្រេង»។
នាយកប្រតិបត្តិមជ្ឈមណ្ឌលសម្ព័ន្ធភាពការងារនិងសិទ្ធិមនុស្ស លោក មឿន តុលា ធ្លាប់មានប្រសាសន៍ថាការក្រើនរំឭករបស់នាយករដ្ឋមន្ត្រីនេះ ជាសារវិជ្ជមានមួយជំរុញដល់ការស្តារសេរីភាពសហជីពឡើងវិញ ខណៈអ្នកបញ្ជាទិញមួយចំនួនជំរុញទៅរដ្ឋាភិបាលឲ្យទម្លាក់បទចោទលើមេដឹកនាំសហជីព ដែលពួកគេយល់ថា ការចោទប្រកាន់លើមេសហជីពទាំងនោះ ជាចេតនានយោបាយ។
កាលពីថ្ងៃទី២៣ ខែតុលា អ្នកបញ្ជាទិញរបស់មេរិកមួយក្រុមបានទាមទារទៅតុលាការកម្ពុជាឲ្យទម្លាក់ចោលការចោទប្រកាន់លើមេដឹកនាំសហជីព និងស្នើទៅរដ្ឋាភិបាលកម្ពុជាធ្វើវិសោធនកម្មច្បាប់សហជីពរួមទាំងជំរុញឲ្យមានការលើកកម្ពស់សិទ្ធិសេរីភាពសហជីពផងដែរ៕
