ស្ត្រីអ្នកសារព័ត៌មានម្នាក់ បម្រើនៅទូរទស្សន៍ Nice TV អះអាងថា អ្នកស្រីត្រូវបាននាយកស្ថាប័នទូរទស្សន៍មួយនេះ បញ្ឃប់ពីការងារមុនកុងត្រាកំណត់ ដោយមិនបានផ្ដល់សំណងអ្វីទាំងអស់ដល់អ្នកស្រី។
អ្នកស្រី ឃួន លក្ខិណា អះអាងថាជាអ្នកសាព័ត៌មាននៅទូរទស្សន៍ Nice TV បានប្រាប់វីអូឌីនៅថ្ងៃនេះថា ក្រុមហ៊ុនទូរទស្សន៍ Nice TV បានបញ្ឃប់អ្នកស្រីមុនកុងតា្រកំណត់ ដោយការបញ្ឈប់នេះ ក្រុមហ៊ុនមិនបានផ្ដល់សំណងអ្វីដល់អ្នកស្រីនោះទេ។
អ្នកស្រីបន្ថែមថា ក្រុមហ៊ុនបានបញ្ឈប់អ្នកស្រីពីការងារ ដោយលើកហេតុផលចំនួន ៤ចំណុច ដូចជា បំភ្លើសព័ត៌មាន គេចវេសពីការងារ មិនសហការជាមួយក្រុមការងារ និងបានចោទប្រធានផ្នែកគ្រប់គ្រងក្រុមផលិតថា បានកិបកេងប្រាក់ក្រុមហ៊ុន ប៉ុន្តែ ហេតុផលទាំងនេះ ខុសពីការពិត ដោយថា អ្នកស្រីមិនបានធ្វើខុសដូចការចោទប្រកាន់ឡើយ។
អ្នកស្រីថា៖ «បើសិនបងឯងមិនចុះហត្ថលេខាក្នុងលិខិតហ្នឹងទេ ប្រាក់ខែបងត្រូវឯង Hold ចោលហើយ ហើយបងឯងមិនបានបើកប្រាក់ខែពីខាងក្រុមហ៊ុនទេ។ ខ្ញុំក៏សួរលិខិតបញ្ចប់កិច្ចសន្យាដាក់កំហុសខ្ញុំ ហើយដែលមិនមែនជាកំហុសខ្ញុំ ឲ្យខ្ញុំចុះហត្ថលេខាទទួលស្គាល់កំហុសមែនអត់ ទាល់តែខ្ញុំទទួលស្គាល់កំហុសសិនបានខ្ញុំអាចទទួលប្រាក់ហ្នឹងមែនអត់ ខ្ញុំសួរទៅរដ្ឋបាល។ រដ្ឋបាលថា ចាស គឺអញ្ចឹងហើយ គេនិយាយអញ្ចឹង។ ខ្ញុំថា អ្នកឯងធ្វើអញ្ចឹង គឺបង្ខំឲ្យខ្ញុំទទួលយកកំហុសហើយ អ្នកឯងធ្វើអញ្ចឹងខុសពីច្បាប់ការងារហើយ ខុសពីច្បាប់ការងារធ្ងន់តែម្ដង។ គេថា អូខេបើអ្នកមិនចុះហត្ថលេខាទេ បងឯងអត់បានបើកប្រាក់ខែ»។
អ្នកស្រី ឃួន លក្ខិណា បន្តថា អ្នកស្រីបានដាក់ពាក្យបណ្ដឹងទៅក្រសួងការងាររួចហើយប្រឆាំងក្រុមហ៊ុនទូរទស្សន៍មួយនេះ ដើម្បីទាមទារប្រាក់សំណងដល់អ្នកស្រី ប៉ុន្តែ ម្ចាស់ក្រុមហ៊ុនដែលជនជាតិចិន មិនបានចូលទៅដោះស្រាយនោះទេ។ អ្នកស្រីបន្តថា ប្រសិនបើក្រុមហ៊ុននៅតែមិនធ្វើការដោះស្រាយប្រាក់អត្ថប្រយោជន៍តាមច្បាប់ការងារ អ្នកស្រីប្ដឹងទៅស្ថាប័នពាក់ព័ន្ធផ្សេងទៀតរហូតទាល់តែមានដំណោះស្រាយ។
ប្រធានផ្នែករដ្ឋបាលក្រុមហ៊ុនទូរទស្សន៍ Nice TV ឈ្មោះ ម៉ារី សុំមិនធ្វើអត្ថាធិប្បាយចំពោះរឿងនេះ ដោយថា ជាប់រវល់។
ប្រធានផ្នែករដ្ឋបាល៖ «មានការអី បងអាចអញ្ចើញមកដល់ Office ខ្ញុំបានណា ដោយសារ ឥឡូវខ្ញុំរវល់ ខ្ញុំសូមរវល់សិនបង! បងអាចណាត់ពេលមកជួបខ្ញុំថ្ងៃស្អែកក៏បានដែរ»។
អ្នកនាំពាក្យក្រសួងការងារ លោក ហេង សួរ បានឲ្យដឹងថា ក្រសួងនឹងចុះពិនិត្យមើលវិវាទការងារមួយនេះ ហើយថា ប្រសិនបើរកឃើញថា ក្រុមហ៊ុនមានកំហុស ក្រុមហ៊ុនត្រូវផ្ដល់សំណងដល់បុគ្គលិករូបនោះ។
លោក ហេង សួរ ប្រាប់ថា៖ «ក្រោយការទទួលពាក្យបំ្តឹង ក្រសួងនឹងចុះពិនិត្យអង្គហេតុនៃការបញ្ឈប់ ហើយនិងប្រភេទកិច្ចសន្យាដែលបុគ្គលិកមានជាមួយក្រុមហ៑ុន។ យោងតាមច្បាប់ស្តីពីការងារ រាល់ការបញ្ឈប់បុគ្គលិកណាមួយដែលមិនមែនដោយសារការប្រព្រឹត្តកំហុសធ្ងន់របស់បុគ្គលិកនោះ គឺក្រុមហ៑ុនត្រូវផ្តល់សំណងដល់បុគ្គលិកនោះ។ ក្នុងករណីមិនផ្តល់ឲ្យ បុគ្គលិកមានសិទ្ធិប្តឹងមកមន្ត្រីអធិការកិច្ចការងាររបស់ក្រសួង»។
លោកមេធាវី សុក សំអឿន ពន្យល់ថា ប្រសិនបើក្រុមហ៊ុនបញ្ឈប់បុគ្គលិកមុនកុងតា្រកំណត់ដោយមិនបានបញ្ជាក់ពីមូលហេតុច្បាស់លាស់ទេ បុគ្គលិកមានសិទ្ធិប្ដឹងក្រុមប្រឹក្សាអាជ្ញាកណ្ដាល ដើម្បីទាមទារសំណងពីក្រុមហ៊ុននោះ។
លោកថា៖ «បើសិនជាបុគ្គលិកតាមកិច្ចសន្យាមានការកំណត់ មានន័យថា កិច្ចសន្យាការងាររបស់គាត់មិនទាន់លើសពី ២ ឆ្នាំទេ អាហ្នឹងគេ ហៅថា បុគ្គលិកតាមកិច្ចសន្យា ហើយបើសិនមិនទាន់បញ្ចប់កិច្ចសន្យាទេ ហើយនិយោជក គាត់បញ្ឈប់គាត់ អាហ្នឹងគាត់មានសិទ្ធិទាមទារសំណងរហូតដល់បញ្ចប់កិច្ចសន្យារបស់គាត់ហ្នឹង បើសិនិយោជកបញ្ឈប់គាត់គ្មានមូលហេតុ»។
បើតាមអ្នកស្រី ឃួន លក្ខិណា អះអាងថា អ្នកស្រីធ្វើការនៅក្រុមហ៊ុនទូរទស្សន៍ Nice TV រយៈពេល ១ឆ្នាំ ៨ខែ ប៉ុន្តែ ក្រុមហ៊ុននេះ បានបញ្ឈប់អ្នកស្រីកាលពីថ្ងៃទី២៤ ខែសីហា ឆ្នាំ២០១៨ ដោយការបញ្ឈប់នេះ គឺមុនការកំណត់ ខណៈកុងតា្រដែលអ្នកស្រីត្រូវបញ្ចប់ជាមួយក្រុមហ៊ុននៅខែធ្នូខាងមុខនេះ៕