អាជ្ញាធរខេត្តព្រះសីហនុ ចុះស្រង់ស្ថិតិ និងតម្លៃសេវាឧស្សាហកម្មទេសចរណ៍នៅខេត្តនេះ បន្ទាប់ពីផ្ទុះការរិះគន់ថា តម្លៃសេវាកម្មវិស័យទេសចរណ៍នៅខេត្តឆ្នេរសមុទ្រមួយនេះ ត្រូវបានដំឡើងខ្ពស់ហួសពីការទទួលយកបានរបស់ភ្ញៀវទេសចរក្នុងស្រុក។
ក្នុងលិខិតបង្គាប់ការចុះថ្ងៃទី២៨ ខែវិច្ឆិកា រដ្ឋបាលខេត្តព្រះសីហនុបានបញ្ជាមន្រ្តីរបស់ខ្លួនចំនួន៣នាក់ ឲ្យចុះទៅស្រង់តម្លៃបន្ទប់ជួល ផ្ទះសំណាក់ សណ្ឋាគារ រីហ្សត ឬបឹងហ្កាឡូស្ថិតនៅក្នុងខេត្តនេះ ដើម្បីរបាយការណ៍ជូនថ្នាក់លើសម្រេចនិងដោះស្រាយ។
អ្នកនាំពាក្យសាលាខេត្តព្រះសីហនុ លោក ឱ សារឿន បញ្ជាក់បន្ថែមលើលិខិតថា អាជ្ញាធរខេត្តនេះបានសម្រេចចុះស្រង់ស្ថិតិ និងតម្លៃសេវាកម្មឧស្សាហកម្មទេសចរណ៍នៅក្នុងខេត្តនេះ ដើម្បីផ្សព្វផ្សាយឲ្យពលរដ្ឋបានដឹង និងបញ្ចៀសការភាន់ច្រឡំ ដោយថា តម្លៃស្នាក់នៅក្នុងខេត្តព្រះសីហនុ គឺមិនដូចគ្នានោះទេ។
លោកបន្ថែមថា៖ «ជារួមទៅនៅខេត្តព្រះសីហនុ តម្លៃនៃការស្នាក់នៅ មានចាប់ពី ២០ដុល្លាររហូតដល់ ៤ពាន់ដុល្លារជាងក៏មានដែរ ដូចជា នៅកោះសង្សារអី មានតម្លៃដល់ ៤ ទៅ ៥ពាន់ដុល្លារក្នុង១យប់។ អញ្ចឹង ដល់តែពាក្យចចាមអារ៉ាមផ្អើលតាមគ្នាថា ១០០ដុល្លារអញ្ចឹង វាមិនអាចថា សណ្ឋាគារ ផ្ទះសំណាក់ណាមានតម្លៃណាដល់ ១០០ដុល្លារទាំងអស់អញ្ចឹងកើតទេ។ អញ្ចឹងហើយ បានជាខេត្តបង្កើតក្រុមការងារចុះស្រង់ស្ថិតិជម្រាបជូនមហាជនវិញ ឲ្យយល់ថា មានកម្រិតណាខ្លះ ហើយវាសាកសមនឹងសមត្ថភាព លទ្ធភាពរបស់គាត់ស្នាក់នៅបានដែរឬអត់»។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា អាជ្ញាធរខេត្តព្រះសីហនុ គួរតែផ្សព្វផ្សាយឲ្យបានទូលំទូលាយអំពីតម្លៃស្នាក់នៅក្នុងខេត្តទេសចរណ៍មួយនេះតាំងពីដំបូង ដោយលោកថា មិនគួរទើបតែចាប់ផ្តើមផ្សព្វផ្សាយពេលដែលមានការរិះគន់ខ្លាំងបែបនេះទេ។
លោកបន្ថែមថា៖ «ខ្ញុំភ្ញាក់ផ្អើលដែរ ដែលភ្ញៀវមានការបារម្ភរាប់ឆ្នាំមកហើយ ទើបតែមានវិធានការនៅពេលនេះ។ ខ្ញុំគិតថា ការចុះស្រង់តម្លៃនេះ វាគ្រាន់តែជាបច្ចេកទេសមួយទេ សម្រាប់ការសិក្សាទៅលើតម្លៃការស្នាក់ក្នុងខេត្តព្រះសីហនុ។ យើងចង់ឲ្យមានការផ្តល់នូវព័ត៌មានពិតនៃតម្លៃផ្ទះសំណាក់ និងសណ្ឋាគារ ដែលព័ត៌មាននោះត្រូវតែធានាថា អ្នកដែលធ្វើដំណើរទៅ គឺគេអាចរកបាន ហើយជាបន្ទប់ស្នាក់នៅមានភាពសមរម្យ ស្នាក់នៅកើត ជៀសវាងបន្ទប់ខ្លួនជាបន្ទប់ជួលតែតម្លៃ ២០ ទៅ ៣០ដុល្លារដែរ អាហ្នឹងក៏មិនកើតដែរ»។
ប្រធានក្រុមការងារទេសចរណ៍វិស័យឯកជន លោក ហូ វណ្ឌី មានប្រសាសន៍ថា អ្នកទេសចរមានតម្រូវការសំខាន់៣ ទី១គឺការដើរហើរ ការហូបចុក និងការស្នាក់នៅល្អ ដោយថា ប្រសិនបើតម្រូវការទាំងបីនេះមានបញ្ហាហើយនោះ វានឹងធ្វើឲ្យប៉ះពាល់ដល់វិស័យទេសចរណ៍។
អ្នកជំនាញវិស័យទេសចរណ៍រូបនេះ បន្តថា កំណើននៃភ្ញៀវទេសចរចិននៅតំបន់ឆ្នេរសមុទ្រកម្ពុជា ដែលទទួលបានកំណើនវិនិយោគយ៉ាងខ្ពស់នោះ ក៏ចូលរួមចំណែកធ្វើឲ្យធ្លាក់ចុះនៃចំនួនភ្ញៀវទេសចរណ៍បរទេសផ្សេងទៀត មកទស្សនាប្រទេសកម្ពុជាដែរ។
លោកបន្ថែមថា៖ «អញ្ចឹង បើក្នុងករណីអាជ្ញាធរមានសមត្ថកិច្ច ស្ថាប័នជំនាញ លោកមិនធ្វើការផ្គូរផ្គងឡើងវិញទេ វានឹងធ្វើឲ្យបាត់បង់ទាំងអស់គ្នាមានន័យថា បាត់ទី១ ទេសចរណ៍គាត់ខ្លាចរអាទៅតំបន់នោះ បាត់បង់ទី២ បងប្អូន ប្រជាពលរដ្ឋដែលជាអ្នកផ្គត់ផ្គងនូវសេវាកម្មតូចតាច និងមធ្យមជាដើម បាត់បង់ទី៣ គឺការអភិវឌ្ឍតំបន់នោះតែម្តង ហើយទី៤មានន័យថា រដ្ឋមិនបានចំណូល»។
បើតាមស្ថិតិរបស់រដ្ឋាភិបាល ភ្ញៀវទេសចរចិនដែលចូលមកកម្ពុជាមានចំនួនដល់ទៅជាង ១.៤៤លាននាក់ ឬស្មើនឹង ៣២.៩ភាគរយនៃចំនួនភ្ញៀវទេសចរអន្តរជាតិសរុប ហើយមានកំណើនដល់ទៅ ៧១.២ភាគរយបើធៀបនឹងរយៈពេលដូចគ្នាកាលពីឆ្នាំមុន៕