លោកនាយករដ្ឋមន្ត្រី ហ៊ុន សែន បានបញ្ជាទៅអាជ្ញាធររាជធានី និងខេត្តនៅទូទាំងប្រទេស ឲ្យត្រៀមអបអរសាទរនៅថ្ងៃស្អែកនេះ បន្ទាប់ពីល្ខោនខោលរបស់កម្ពុជា ត្រូវបានដាក់បញ្ចូលទៅក្នុងបញ្ជីសម្បត្តិបេតិកភណ្ឌវប្បធម៌អរូបីពិភពលោក។
ល្ខោនខោលកម្ពុជា ត្រូវបានអង្គការយូណេស្កូសម្រេចដាក់បញ្ចូលទៅក្នុងបញ្ជីសម្បត្តិបេតិកភណ្ឌវប្បធម៌អរូបីនៃមនុស្សជាតិកាលពីថ្ងៃម្សិលមិញនេះ នៅឯទីក្រុងព័រល្វី ប្រទេសម៉ូរីស ក្រោយពីទម្រង់សិល្បៈប្រភេទនេះ ត្រូវថៃជំទាស់រួចមក។
ក្នុងសារលិខិតកាលពីថ្ងៃម្សិលមិញនេះ លោកនាយករដ្ឋមន្ត្រី ហ៊ុន សែន បានរៀបរាប់ថា លោកសប្បាយរីករាយចំពោះដំណឹងមួយនេះ។
ជាងនេះទៅទៀត លោក ហ៊ុន សែន ក៏បានប្រាប់ទៅអាជ្ញាធរគ្រប់លំដាប់ថ្នាក់ ឲ្យចូលរួមអបអរសាទរ តាមរយៈការវាយគង ទូងស្គ ទះប៉ោត គោះត្រដោកជាដើម នៅម៉ោង ១០យប់ថ្ងៃស្អែកនេះ។
លោក ហ៊ុន សែន អះអាងថា ការដាក់បញ្ចូលល្ខោនខោលទៅក្នុងបញ្ជីរបស់អង្គការយូណេស្កូនេះ នឹងចូលរួមចំណែកជួយលើកស្ទួយកេរ្តិ៍ឈ្មោះរបស់កម្ពុជានៅលើឆាកអន្តរជាតិ។
ល្ខោនខោល គឺជាបេតិកភណ្ឌទី៥របស់កម្ពុជា ដែលត្រូវបានចុះក្នុងបញ្ជីបេតិកភណ្ឌពិភពលោក បន្ទាប់ពីការដាក់បញ្ចូលតំបន់ប្រាសាទសំបូរព្រៃគុក នៅឆ្នាំ២០១៧ ប្រាសាទព្រះវិហារ នៅឆ្នាំ២០០៨ របាំព្រះរាជ្យទ្រព្យ នៅឆ្នាំ២០០៣ និងប្រាសាទអង្គរវត្ត នៅឆ្នាំ១៩៩២៕