ក្រុមគ្រូពេទ្យមន្ទីរពេទ្យរុស្សី (មន្ទីរពេទ្យមិត្តភាពខ្មែរ-សូវៀត) និងគ្រូពេទ្យមកពីប្រទេសអូស្ត្រាលី នឹងធ្វើការរួមគ្នាដើម្បីផ្ដល់សេវាពិនិត្យ និងព្យាបាលស្ត្រីដែលកំពុងតែមានជំងឺមួយចំនួនដោយឥតគិតថ្លៃចាប់ពីថ្ងៃ២១ដល់២៤ ខែមេសា ឆ្នាំ២០១៩ខាងមុខនេះ។
យោងតាមសេចក្ដីជូនដំណឹងចុះថ្ងៃទី២៩ ខែវិច្ឆិកា ឆ្នាំ២០១៨ ក្រុមគ្រូពេទ្យផ្នែកព្យាបាលរោគស្រ្តីនៃមន្ទីពេទ្យមិត្តភាពខ្មែរ-សូវៀត នឹងសហការជាមួយក្រុមគ្រូពេទ្យមកពីប្រទេសអូស្រ្តាលីដើម្បីធ្វើការពិនិត្យ ពិគ្រោះនិងព្យាបាលដោយវះកាត់រយៈពេល៤ថ្ងៃ សម្រាប់ស្រ្តីដែលកំពុងតែកើតជំងឺមួយចំនួន ដូចជាស្រុតសរីរាង្គ ជំងឺហៀរទឹកនោមតាមទ្វារមាស ជំងឺមិនមានទ្វារមាសពីកំណើតនិងជំងឺប្រដាប់ភេទលូតលាស់មិនប្រក្រតីពីកំណើត។ បើតាមប្រធានមន្ទីរពេទ្យមិត្តភាពខ្មែរ-សូវៀត លោក យ៉ៃ យ៉េង ការព្យាបាលជំងឺនេះមិនគិតថ្លៃទេ ។
មន្ទីរពេទ្យមិត្តភាពខ្មែរ-សូវៀតចាប់ផ្ដើមទទួលអ្នកចុះឈ្មោះមកព្យាបាលជំងឺចាប់ពីថ្ងៃជូនដំណឹងនេះដល់ថ្ងៃទី២១ ខែមេសា ឆ្នាំ២០១៩៕