ពលរដ្ឋមានជម្លោះដីធ្លីនៅឃុំ២ធ្នូ ស្រុកស្នួល ខេត្តក្រចេះ អះអាងថា ពួកគេមិនទាន់ទទួលបានដំណោះស្រាយរឿងវិវាទដីធ្លីនៅឡើយទេរហូតមកពេលនេះ ខណៈអាជ្ញាធរអះអាងថា ពួកគេកំពុងពន្លឿនការដោះស្រាយបញ្ហានេះ ជូនពលរដ្ឋទាំងនោះ។
លោក ភិន ធា ដែលអះអាងថា ជាតំណាងពលរដ្ឋប្រាប់ វី.អូ.ឌី នៅថ្ងៃនេះថា ក្រុមអ្នកភូមិកំពុងតែទន្ទឹមរង់ចាំដំណោះស្រាយពីអាជ្ញាធរ ខណៈពលរដ្ឋខ្លះកំពុងដំណើរការធ្វើអត្តសញ្ញាណកម្មដីធ្លីរបស់ពួកគេជាថ្មី ក្រោយពីមានការតម្រូវពីក្រសួងរៀបចំដែនដី។
លោកបន្ថែមថា៖ «ពួកខ្ញុំមិនទាន់ទទួលបានដីមកដល់ដៃ គេតម្រូវឲ្យពួកខ្ញុំធ្វើអត្តសញ្ញាណកម្មថ្មី។ គេចេញលិខិតឲ្យ ពួកខ្ញុំធ្វើអត្តសញ្ញាណកម្មថ្មីហ្នឹងគឺថ្ងៃទី៥ ធ្នូ ហ្នឹង គេឈប់ធ្វើឲ្យហើយ។ ដល់ថ្ងៃទី១៥ ខែធ្នូ គេឈប់ទទួលក្រដាសហើយ។ គេថា គេនឹងបន្តនីតិវិធីដោះស្រាយទៀត»។
តំណាងពលរដ្ឋម្នាក់ទៀតលោក តូច ដុល ឲ្យដឹងថា ការធ្វើអត្តសញ្ញាណកម្មដីធ្លីជាថ្មីនេះ គឺអ្នកភូមិបានជួបការលំបាក និងជួបភាពស្មុគស្មាញច្រើន ដោយថា អាជ្ញាធរភូមិឃុំរបស់គាត់មិនចង់ធ្វើឲ្យនោះទេ។ លោកបន្តថា ការអូស បន្លាយនៃការដោះស្រាយនេះ បានធ្វើឲ្យប្រជាពលរដ្ឋជួបការលំបាកដោយពុំមានដីសម្រាប់បង្កបង្កើនផលទាន់ពេលវេលាឬ រដូវកាលជាដើម។
លោកបន្ថែមថា៖ «ការធ្វើអត្តសញ្ញាណកម្មហ្នឹង ពលរដ្ឋខ្លះហ្នឹងគាត់ជួបទុក្ខលំបាកខ្លាំងដែរ ខ្លាំងទី១ ពេលដែលគាត់ ផ្ទេរឈ្មោះពីស្រុកកំណើតដើមមកនៅស្រុកស្នួល។ ប៉ុន្តែអាជ្ញាធរស្រុកស្នួល គាត់អត់ទទួលស្គាល់។ ដល់ពេលគាត់ទៅស្រុកគាត់វិញ អាជ្ញាធរគាត់អត់ទទួល ដោយថាគាត់បានកាត់ឈ្មោះចេញហើយ។ អញ្ចឹង អាបញ្ហាហ្នឹងគាត់កំពុងជួបប្រទះខ្លាំង។ ឥលូវប្រជាជនខ្លះគាត់ដើមសុំផ្ទះគេនៅសិន ខ្លះទៀតទៅស្នាក់នៅជាមួយបងប្អូនសិនដើម្បីរង់ចាំដំណោះស្រាយ»។
អភិបាលស្រុកស្នួល លោក គង់ គីមនី ប្រាប់ វី.អូ.ឌី ថា អាជ្ញាធរស្រុកបានសហការជាមួយអាជ្ញាធរពាក់ព័ន្ធកំពុងដំណើរការពន្លឿនដោះស្រាយបញ្ហានេះតាមនីតិវិធី ដោយមិនអាចបង្ខំ និងកំណត់ពេលវេលាជាក់លាក់បានទេ។
លោកបន្ថែមថា៖ «ឥលូវហ្នឹងយើងក៏ដូចខាងភូមិបាលកំពុងតែទទួលពាក្យពួកគាត់ដែលបញ្ជាក់ពីមូលដ្ឋានរបស់គាត់។ ដំណោះស្រាយគេមិនទុកយូរទេ ខាងភូមិបាលគេថា ប្រហែល២០ទៅ៣០ថ្ងៃទៀត គេមិនឲ្យចាំរាប់ឆ្នាំទេ។ ឥលូវនេះកំពុងតែធ្វើហ្នឹង កំពុងនៅពេលសុរិយោដីហ្នឹង ស៊ីញ៉េ១ថ្ងៃៗចង់ងាប់ហើយ។ ឥលូវនេះយើងត្រូវតែធ្វើតាមបច្ចេកទេសនិងនីតិវិធីហើយ»។
ប្រធានសម្ព័ន្ធសហគមន៍កសិករកម្ពុជា លោក ថេង សាវឿន មានប្រសាសន៍ថា ភាពយឺតយ៉ាវរបស់អាជ្ញាធរក្នុងការដោះស្រាយវិវាទដីធ្លីជូនពលរដ្ឋនេះ មិនមែនមានតែនៅខេត្តក្រចេះនោះទេ នៅស្វាយរៀង និងកំពង់ចាមជាដើម គឺអាជ្ញាធរក៏មិនបានដោះស្រាយបញ្ចប់ដែរ។ ប្រធានសម្ព័ន្ធសហគមន៍កសិករកម្ពុជារូបនេះ បានអំពាវនាវទៅអាជ្ញាធរពាក់ព័ន្ធឲ្យពន្លឿនការដោះស្រាយជូនពលរដ្ឋ ដោយថា ដើម្បីកុំឲ្យពលរដ្ឋបារម្ភសុវត្ថិភាពដីធ្លី ហើយប្រមូលផ្តុំគ្នាឡើងមកតវ៉ានៅភ្នំពេញ បង្ករការរំខានដល់ការងារស្ថាប័នផ្សេងៗទៀត។
លោកបន្ថែមថា៖ «បើកាលណាអាជ្ញាធរថ្នាក់ក្រោមជាតិបានត្រឹមតែសន្យា ធ្វើឲ្យប្រជាពលរដ្ឋមានការព្រួយបារម្ភ។ ហើយពេលដែលមានការព្រួយបារម្ភទៅលើដំណើរការដោះស្រាយ ដោយសារមានការសន្យាម្តងហើយម្តងទៀត ប៉ុន្តែមិនបានដោះស្រាយបញ្ចប់នឹងធ្វើឲ្យប្រជាពលរដ្ឋបាត់បង់ទំនុកចិត្ត លើការដោះស្រាយរបស់អាជ្ញាធរថ្នាក់ក្រោមជាតិ។ ហើយធ្វើឲ្យពលរដ្ឋប្រមូលផ្តុំគ្នាបន្តឡើងមកតវ៉ាដល់ភ្នំពេញ ដែលអាចធ្វើឲ្យរំខានដល់ការធ្វើការងារ ហើយវាជិះឥទ្ធិពលមិនដល់រដ្ឋាភិបាលផងដែរ និងរងការរិះគន់ពីសាធារណៈជនជាតិ និងអន្តរជាតិទៅលើយន្តការដោះស្រាយដីធ្លីនេះ»។
តំណាងពលរដ្ឋឲ្យដឹងថា អ្នកភូមិប្រមាណ៥០០គ្រួសារមានជម្លោះដីធ្លីជាមួយក្រុមហ៊ុនចម្ការកៅស៊ូមេមត់តាំងពីខែមីនា ដោយពួកគេបានឡើងមកភ្នំពេញជិត១០ដងហើយ ដើម្បីសុំទៅស្ថាប័នរដ្ឋកំពូលៗជួយដោះស្រាយ។ អ្នកភូមិអះអាងថា ដំណោះស្រាយដែលពួកគេចង់បាននោះ គឺទាមទារដីសម្រាប់ធ្វើកសិកម្ម២ហិកតាកន្លះ និងដីភូមិក្បាល២០ និងបណ្តោយ៥០ម៉ែត្រ ខណៈដីចាស់របស់ពួកគេដែលក្រុមហ៊ុនរំលោភយកនោះ១គ្រួសារមានពី៣ទៅ៥ហិកតា៕