ប្រធានកិត្តិយសគណបក្សប្រជាជនកម្ពុជា និងជាប្រធានរដ្ឋសភា លោក ហេង សំរិន បានអំពាវនាវទៅសហគម៍អន្ដរជាតិឲ្យបន្ដជួយដល់កម្ពុជាក្នុងការកសាង និងអភិវឌ្ឍជាតិ ដោយថា បន្ទាប់ពីគណបក្សរបស់លោកបានដឹកនាំប្រទេសរួចផុតពីភ្នក់ភ្លើងសង្គ្រាម និងទទួលបានសន្ដិភាពពេញលេញ។
ថ្លែងក្នុងពិធីរំលឹកខួបលើកទី៤០ នៃទិវា «រណសិរ្សសាមគ្គីអភិវឌ្ឍន៍មាតុភូមិកម្ពុជា» នៅ៑ឯស្រុកស្នួល ស្ថិតក្នុងខេត្តក្រចេះនាថ្ងៃនេះ លោក ហេង សំរិន បានរំលឹកថា ការបង្កើតស្មារតី ២ ធ្នូ ឆ្នាំ១៩៧៨ បានឈានទៅផ្ដួលរំលំរបបកម្ពុជាប្រជាធិបតេយ្យ ឬរបបខ្មែរក្រហម និងរកបានសន្ដិភាព និងការអភិវឌ្ឍពិតប្រាកដជូនជាតិមាតុភូមិន៍។
លោក ហេង សំរិន ក៏បានថ្លែងអំណរគុណដល់អន្ដរជាតិដែលបានផ្ដល់ជំនួយជួយកម្ពុជាក្នុងការសាងប្រទេសឡើងវិញ និងអំពាវនាវឲ្យពួកគេបន្ដផ្ដល់ជំនួយបន្ថែមទៀត។
លោកបន្ដថា៖ «ក្នុងនាមរណសិរ្សសាមគ្គីអភិវឌ្ឍន៍មាតុភូមិកម្ពុជា ខ្ញុំសូមសម្ដែងនូវការគោរព និងដឹងគុណយ៉ាងជ្រាលជ្រៅចំពោះប្រទេសជិតឆ្ងាយ និងសហគមន៍អន្ដរជាតិ អ្នកផ្ដល់ជំនួយទាំងឡាយដែលបានជួយឧបត្ដម្ភគាំទ្រយ៉ាងស្មោះសរចំពោះបុព្វហេតុដ៏យុត្តិធម៌របស់ប្រជាជនកម្ពុជា […]យើងខ្ញុំសង្ឃឹមជឿជាក់ថា សហគមន៍អន្ដរជាតិនឹងបន្ដផ្ដល់ជំនួយ ផ្ដល់វិភាគទានដ៏ថ្លៃថ្លាថ្មីៗថែមទៀត ដើម្បីរួមចំណែកពង្រឹងបុព្វហេតុសន្ដិភាព ប្រជាធិបតេយ្យ និងវឌ្ឍនភាពនៅកម្ពុជា»។
ការអំពាវនាវបែបនេះរបស់ប្រធានរដ្ឋសភាកម្ពុជា លោក ហេង សំរិន បានកើតឡើងក្រោយពីសហភាពអឺរ៉ុបបានជូនដំណឹងមកកម្ពុជាអំពីការដំណើរការដកហូតប្រព័ន្ធអនុគ្រោះពន្ធសម្រាប់ទំនិញនាំចេញពីប្រទេសកម្ពុជាទៅកាន់ទីផ្សារសហគមន៍អឺរ៉ុប ក្រោយពីរកឃើញថា កម្ពុជាបានរំលោភសិទ្ធិមនុស្ស និងប្រជាធិបតេយ្យ។
សហគមន៍អឺរ៉ុបបានឈានទៅសម្រេចបែបនេះ ក្រោយពីគណបក្សសង្គ្រោះជាតិ ដែលជាអតីតប្រឆាំងដ៏ធំមានអ្នកគាំទ្រប្រហែល៣លាននាក់កាលពីការបោះឆ្នោតឆ្នាំ២០១៧នោះ ត្រូវបានរំលាយចោល ការចាប់ខ្លួនមេដឹកនាំអតីតបក្សប្រឆាំង លោក កឹម សុខា និងការហាមឃាត់សមាជិកជាន់ខ្ពស់ ១១៨រូបរបស់អតីតបក្សប្រឆាំងមិនឲ្យចូលរួមក្នុងឆាកនយោបាយរយៈពេល ៥ឆ្នាំ៕