អតីតថ្នាក់ដឹកនាំគណបក្សសង្គ្រោះជាតិ (CNRP) ទាមទារជាថ្មីឲ្យដោះលែងលោក កឹម សុខា និងឲ្យបក្សប្រឆាំងមួយនេះកើតឡើងវិញ បន្ទាប់ពីសភាបានចាប់ផ្តើមពិនិត្យលើនីតិវិធីមួយចំនួនឲ្យអតីតថ្នាក់ដឹកនាំ CNRP ឲ្យមានសិទ្ធិសេរីភាពធ្វើនយោបាយវិញ។
ក្រសួងការបរទេស បាននិយាយក្នុងសេចក្តីថ្លែងការណ៏កាលពីថ្ងៃចន្ទថា ដើម្បីលើកកម្ពស់លទ្ធិប្រជាធិបតេយ្យនិងនីតិរដ្ឋ រដ្ឋសភាកំពុងសិក្សាពិនិត្យបញ្ញាតិ្តច្បាប់ផ្សេងៗ ដើម្បីអនុញ្ញាតអោយបុគ្គលដែលជាប់បម្រាមសកម្មភាពនយោបាយអាចចាប់ផ្តើមធ្វើនយោបាយឡើងវិញ។
លោកជំទាវ មួរ សុខហួរ អនុប្រធានអតីតគណបក្សសង្គ្រោះជាតិ បានមានប្រសាសន៍ថា ត្រូវតែដោះលែងលោក កឹម សុខា និងទំលាក់ការចោទប្រកាន់ទាំងអស់ប្រឆាំងរូបលោក។ លោកស្រី ក៏បានទាមទារឲ្យមានការបង្កើតគណបក្សសង្គ្រោះជាតិ ជាគណបក្សនយោបាយស្របច្បាប់ឡើងវិញផងដែរ។
លោកជំទាវ មួរ សុខហួរ បានបន្តថា៖ «ដំណោះស្រាយជាបំណែកៗ មិនស្តារនិងមិនអាចស្តារប្រជាធិបតេយ្យបានទេ។ ប្រព័ន្ធតុលាការត្រូវតែឯករាជ្យ មិនមែនជាឧបករណ៍នយោបាយទេ។»
កញ្ញា កឹម មនោវិទ្យា ដែលជាកូនស្រីរបស់លោកកឹម សុខា បានមានប្រសាសន៍ថាការវិវត្តចុងក្រោយផ្នែកនយោបាយនេះ អាចត្រួសត្រាយផ្លូវដើម្បីអោយស្ថានភាពអាក្រក់ខ្លះនៅឆ្នាំមុន វិលត្រឡប់មកធម្មតាវិញ។
កញ្ញា កឹម មនោវិទ្យា បាននិយាយដូច្នេះថា៖ «ប៉ុន្តែយើងចាំបាច់នៅតែប្រុងប្រយ័ត្នរហូតទាល់តែ គ្រប់យន្តការនៃលទ្ធិប្រជាធិបតេយ្យពហុបក្សត្រូវបានស្តារឡើងវិញ។»
គណបក្សសង្រ្គោះជាតិត្រូវបានរំលាយកាលពីឆ្នាំមុនដោយតុលាការកំពូល តាមសំណើររបស់រដ្ឋាភិបាល។ សេចក្តីសម្រេចរបស់តុលាការ ក៏បានហាមឃាត់ធ្វើការនយោបាយរបស់សមាជិកជាន់ខ្ពស់ CNRP ចំនួន១១៨នាក់ រយៈពេល៥ឆ្នាំផងដែរ។
លោក កឹម សុខា ត្រូវបានដោះលែងពីពន្ធនាគារកាលពីខែកញ្ ញាបន្ទាប់ពីបានជាប់ពន្ធនាគារ ជាងមួយឆ្នាំពីថាបទក្បត់ជាតិ ប៉ុន្តែនៅតែស្ថិតក្នុងការគ្រប់គ្រងរបស់តុលាការដោយមិនអោយចាកចេញពីតំបន់ជុំវិញលំនៅដ្ឋានរបស់គាត់ទេ។ ក្រសួងការបរទេស ក៏បានហៅវិធានការផ្លូវច្បាប់ ចំពោះអតីតគណបក្សសង្គ្រោះជាតិ ជាការអនុវត្តគោលការណ៍នីតិរដ្ឋ ដើម្បីពង្រឹងដំណើរការលិទ្ធិប្រជាធិបតេយ្យ និងធានាសន្តិភាពនិងស្ថិរភាព៕