វិទ្យុអាស៊ីសេរីអះអាងថា ខ្លួនអាចបើកការិយាល័យឡើងវិញបាននៅកម្ពុជា លុះត្រាតែរដ្ឋាភិបាលកម្ពុជាដោះស្រាយបញ្ហាមួយចំនួនសិនដោយរួមទាំងទម្លាក់ការចោទប្រកាន់ពីអតីតអ្នកសារព័ត៌មានវិទ្យុអាស៊ីសេរី២នាក់។
កាលពីថ្ងៃចន្ទក្រសួងការបរទេសកម្ពុជាបាននិយាយក្នុងសេចក្តីថ្លែងការណ៏ថា រដ្ឋាភិបាលតែងតែយកចិត្តទុកដាក់ដល់ការលើកកម្ពស់សេរីភាពសារព័ត៌មាននិងសេរីភាពបញ្ចេញមតិ ហើយវិទ្យុអាស៊ីសេរីនិងវីអូអេ ក៏អាចបើកការិយាល័យរបស់ខ្លួននៅកម្ពុជាឡើងវិញបាន។
ក្រសួងបានអះអាងថាវិទ្យុអាស៊ីសេរីនិងវិទ្យុសម្លេងអាមេរិកបានផ្តួចផ្តើមគំនិតបិទការិយាល័យតំណាងដោយខ្លួនឯង។ ដូច្នេះ ស្ថានីយ៍វិទ្យុទាំងពីរក៏មានសេរីភាពបើកការិយាល័យខ្លួននៅ កម្ពុជាឡើងវិញបានដែរ។
ជាការឆ្លើយតប អ្នកនាំពាក្យវិទ្យុអាស៊ីសេរី លោក Rohit Mahajan បាននិយាយដូច្នេះថា ៖«មុននឹងវិទ្យុអាស៊ីសេរីអាចពិចារណាបន្តប្រតិបត្តិការរបស់ខ្លួននៅក្នុងប្រទេសកម្ពុជា បញ្ហាមួយចំនួនគួរត្រូវដោះស្រាយ។ ទាំងនេះរួមបញ្ចូលទាំងការចោទប្រកាន់ដែលត្រូវទម្លាក់ចោលទៅលើអតីតអ្នកសារព័ត៌មានវិទ្យុអាស៊ីសេរី២នាក់ គឺលោកអ៊ួន ឈិននិងលោកយៀង សុធារិន។»
លោក Rohit Mahajan មិនបាននិយាយលម្អិតអំពីបញ្ហាចំនួនផ្សេងទៀតដែលកម្ពុជាគួរដោះស្រាយជាមុននោះទេ។ ការចាប់ខ្លួនអតីតបុគ្គលិកទាំងពីររូបនេះកើតឡើងបន្ទាប់ពីវិទ្យុអាស៊ីសេរី ដែលមានមូលដ្ឋាននៅទីក្រុងវ៉ាស៊ីនតោន បានបិទការិយាល័យរបស់ខ្លួននៅរាជធានីភ្នំពេញកាលពីខែកញ្ញាឆ្នាំមុន បន្ទាប់មានបញ្ហាមួយចំនួនជាមួយរដ្ឋាភិបាល។
លោកអ៊ួន ឈិននិងលោកយៀង សុធារិន ត្រូវបានគេដោះលែងឱ្យនៅក្រៅឃុំបណ្តោះអាសន្នកាលពីខែសីហា ឆ្នាំនេះ ក៏ប៉ុន្តែពួកគាត់នៅប្រឈមមុខនឹងបទចោទប្រកាន់ចារកម្មនៅឡើយ។ សេចក្តីថ្លែងការណ៏របស់ក្រសួងបានធ្វើឡើងបន្ទាប់ពីសហភាពអឺរ៉ុបនៅខែវិច្ឆិកាបានចាប់ផ្ដើមនីតិវិធីផ្លូវការដើម្បីដកហូតការលើកលែងកាតព្វកិច្ចពន្ធ(EBA)លើទំនិញកម្ពុជាទៅអឺរ៉ុប។