បណ្តាញយុវជនកម្ពុជា លើកឡើងថា អាជ្ញាធរឃុំមួយនៅក្នុងខេត្តព្រះវិហារ នៅតែទាមទារឲ្យពួកគាត់ស្នើសុំការអនុញ្ញាតពីថ្នាក់ខេត្ត ទើបអាចជួបជុំគ្នារៀបចំទិវាសិទ្ធិមនុស្សអន្តរជាតិ១០ធ្នូបាន។
អនុប្រធានសមាគមបណ្តាញយុវជនកម្ពុជាលោក ស ម៉ូរី សរសេរនៅលើហ្វេសប៊ុករបស់លោក កាលពីម្សិលមិញថា អាជ្ញាធរឃុំធ្មា ស្រុកជ័យសែន តម្រូវឲ្យពួកគាត់សុំច្បាប់ពីថ្នាក់ខេត្ត មុនរៀបចំវេទិកាសិទ្ធិមនុស្សអន្តរជាតិ១០ធ្នូ។
លោក សរសេរថា៖«បើទោះបីជាមានការចេញសេចក្តីណែនាំរបស់ក្រសួងមហាផ្ទៃក៏រដ្ឋបាលឃុំធ្មា ស្រុកជ័យសែន ខេត្តព្រះវិហារ មិនអនុញ្ញាតឱ្យយុវជននៃបណ្តាញសហគមន៍ព្រៃឡង់រៀបចំទិវាសិទ្ធិមនុស្សអន្តរជាតិ១០ ធ្នូ ខួបលើកទី៧០ ឡើយ លុះត្រាតែមានចំណារមកពីសាលាខេត្ត ទើបអាចធ្វើបាន។»
កាលពីថ្ងៃទី២៧ខែវិច្ឆិកា ឆ្នាំ២០១៨ លោក ស ខេងរដ្ឋមន្ត្រីក្រសួងមហាផ្ទៃ បានចេញសេចក្តីណែនាំមួយប្រាប់ទៅ អាជ្ញាធរដែនដីថា អង្គការសមាគមដែលបានចុះបញ្ជីនៅក្រសួងមហាផ្ទៃហើយ ធ្វើសកម្មភាពមិនបាច់ជូនដំណឹងទៅអាជ្ញាធរនោះទេ។
