ក្រុមអ្នកឃ្លាំមើលសិទ្ធិមនុស្សអន្តរជាតិមួយ បានជំរុញទៅរដ្ឋាភិបាលកម្ពុជា ឲ្យលុបចោលច្បាប់ទាំងឡាយដែលរឹតត្បិតសិទ្ធិសេរីភាពជាមូលដ្ឋាន បើទោះបីជារដ្ឋាភិបាលដឹកនាំដោយបក្សកាន់អំណាចបានចាប់ផ្ដើមបើកចំហរឡើងវិញនូវសេរីភាពរបស់អង្គការសង្គមស៊ីវិលក៏ដោយ។
រដ្ឋមន្ត្រីក្រសួងមហាផ្ទៃ លោក ស ខេង កាលពីថ្ងៃទី២៧ ខែវិច្ឆិកាកន្លងមកនេះ បានសម្រេចលុបចោលនូវសេចក្ដីណែនាំលេខ ១៧៥ ដែលតម្រូវឲ្យអង្គការសង្គមស៊ីវិល ជូនដំណឹងទៅអាជ្ញាធរមូលដ្ឋានឲ្យបាន ៣ថ្ងៃមុននឹងធ្វើសកម្មភាពណាមួយ។
ប៉ុន្តែ សម្រាប់អង្គការឃ្លាំមើលសិទ្ធិមនុស្ស (Human Rights Watch) បានលើកឡើងក្នុងសេចក្ដីថ្លែងការណ៍របស់ខ្លួនកាលពីថ្ងៃសុក្រកន្លងមកនេះថា បើចង់បើកចំហរសិទ្ធិសេរីភាពដល់អង្គការសង្គមស៊ីវិលនោះ រដ្ឋាភិបាលកម្ពុជាគួរតែចាប់ផ្ដើមជាមួយការលុបចោលនូវច្បាប់នានា ដែលរឹតត្បិតសិទ្ធិសេរីភាពជាមូលដ្ឋាន។
នាយករងប្រចាំតំបន់អាស៊ីនៃអង្គការឃ្លាំមើលសិទ្ធិមនុស្ស លោក Phil Robertson បានលើកឡើងក្នុងសេចក្ដីថ្លែងការណ៍នោះថា ការលុបចោលនូវលក្ខខ័ណ្ឌតម្រូវឲ្យជូនដំណឹងឲ្យបាន ៣ថ្ងៃមុនរបស់រដ្ឋាភិបាលកម្ពុជា គ្រាន់តែជាជំហានតូចមួយប៉ុណ្ណោះ ប៉ុន្តែ វានឹងមិនបញ្ឈប់នូវសកម្មភាពរំលោភបំពាន និងគំរាមកំហែងទៅលើក្រុមសកម្មជននៅកម្ពុជានោះឡើយ។
លោក Phil Robertson បានថ្លែងថា៖ «អ្វីដែលចាំបាច់នោះ គឺការប្ដេជ្ញាចិត្តដ៏នឹងធឹងរបស់រដ្ឋាភិបាល ចំពោះការលុបចោលច្បាប់នានា ដែលត្រូវបានប្រើប្រាស់សម្រាប់បង្ក្រាបសកម្មភាពក្រុមឯករាជ្យ»។
អង្គការសិទ្ធិមនុស្សអន្តរជាតិមួយនេះ បានកត់សម្គាល់ថា រយៈពេល ១ឆ្នាំកន្លងមកនេះ រដ្ឋាភិបាលកម្ពុជាបង្កើនការបង្ក្រាបរបស់ខ្លួនទៅលើក្រុមអ្នកគាំទ្របក្សប្រឆាំង សកម្មជនដីធ្លី ក្រុមអ្នកការពារសិទ្ធិមនុស្ស និងក្រុមសហជីព។
បើតាមក្រុមសិទ្ធិមនុស្ស Human Rights Watch ក្រុមអង្គការធ្វើការលើផ្នែកសិទ្ធិមនុស្ស សិទ្ធិដីធ្លី និងធនធានធម្មជាតិ ការពារសិទ្ធិការងារ និងជំរុញលទ្ធិប្រជាធិបតេយ្យ សុទ្ធតែប្រឈមមុខនឹងការតាមដាន និងការគំរាមកំហែង ការចាប់ខ្លួន និងកាត់ទោសទាំងរំលោភបំពាន និងការឃុំខ្លួនបណ្ដោះអាសន្នលើសការកំណត់៕