ក្រុមអ្នកការពារសិទ្ធិមនុស្ស និងមេដឹកនាំសហជីព បានជំរុញទៅរដ្ឋាភិបាលកម្ពុជាឲ្យលុបចោលច្បាប់មួយចំនួន ដែលពួកគេថា បានរឹតត្បិតសិទ្ធិសេរីភាពជាមូលដ្ឋាន ក្រោយពីរដ្ឋាភិបាលកម្ពុជាបានផ្ដើមបើកលលំហរឡើងវិញខ្លះៗនូវសេរីភាពរបស់អង្គការសង្គមស៊ីវិល។
រដ្ឋមន្ត្រីក្រសួងមហាផ្ទៃ លោក ស ខេង កាលពីថ្ងៃទី២៧ ខែវិច្ឆិកាកន្លងមកនេះ បានសម្រេចលុបចោលនូវសេចក្ដីណែនាំមួយ ដែលតម្រូវឲ្យអង្គការសង្គមស៊ីវិលជូនដំណឹងទៅអាជ្ញាធរមូលដ្ឋាន ឲ្យបាន ៣ថ្ងៃមុននឹងធ្វើសកម្មភាព។
នាយិកាមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព មានប្រសាសន៍ថា ទោះបីជារដ្ឋាភិបាលបានសម្រេចលុបចោលនូវសេចក្ដីណែនាំនោះក៏ដោយ ប៉ុន្តែ ការអនុវត្តជាក់ស្ដែងមិនមានប្រសិទ្ធិភាពនោះឡើយ ដោយថា សេរីភាពនៃការជួបជុំ និងបញ្ចេញមតិ នៅតែត្រូវបានរារាំងពីសំណាក់អាជ្ញាធរដដែល។
លោកថា៖ «សូម្បីតែប្រជាពលរដ្ឋសាមញ្ញដែលគាត់ធ្វើការបញ្ចេញមតិតាមប្រព័ន្ធផ្សព្វផ្សាយសង្គមអីហ្នឹង ត្រូវបានរងនូវការតាមដាន ហើយចោទប្រកាន់ដែរ។ ចាស! អញ្ចឹងទាំងអស់នេះ គួបផ្សំការចេញនូវច្បាប់មួយចំនួនដែលមានលក្ខណៈរឹតបន្តឹងថែមទៀតនោះ ធ្វើឲ្យការគោរពសិទ្ធិមនុស្សថយចុះ»។
ប្រធានសហភាពការងារកម្ពុជា លោក អាត់ ធន់ បានលើកឡើងថា ចាប់តាំងពីច្បាប់សហជីពចូលជាធរមាននៅឆ្នាំ២០១៦ មក សិទ្ធិសេរីភាពរបស់កម្មករមួយចំនួនត្រូវបានរឹតត្បិត ហើយនីតិវិធីនៃការចុះបញ្ជីតំណាងសហជីពដែលច្បាប់នេះតម្រូវនោះ មានលក្ខណៈស្មុគស្មាញ។
មេដឹកនាំសហជីពរូបនេះ បានស្នើទៅរដ្ឋាភិបាលឲ្យធ្វើវិសោធនកម្មមាត្រាមួយចំនួននៃច្បាប់សហជីព និងពង្រឹងការអនុវត្តច្បាប់ឲ្យមានតម្លាភាព ដោយថា សហជីពដែលធ្វើការឯករាជ្យមួយចំនួន តែងតែទទួលរងការគំរាមកំហែង រើសអើង និងជាប់បណ្ដឹងជាច្រើននៅក្នុងតុលាការផងដែរ។
លោកថា៖ «ធ្វើវិសោធនកម្មច្បាប់សហជីពទៀត ខ្ញុំគិតថា ជាចំណុចល្អ។ ចុងក្រោយយើងចង់ឃើញការអនុវត្តសិទ្ធិស្មើភាពគ្នា មិនថា សហជីពមាននិន្នាការទៅណាទេ ឬឯករាជ្យ ខាងណាទេ មានន័យថា ត្រូវអនុវត្តឲ្យស្មើភាពគ្នា ទើបតំណាងកម្មករ និងសហជីពអាចដោះស្រាយបញ្ហាឲ្យកម្មករបាន»។
អ្នកនាំពាក្យគណបក្សប្រជាជនកម្ពុជា លោក សួល យ៉ារ៉ា បានប្រាប់វីអូឌីនៅថ្ងៃនេះថា រដ្ឋាភិបាលនឹងយកសំណើនេះទៅសិក្សាពិចារណាសិន មុននឹងសម្រេចយ៉ាងណានោះ។
លោកថា៖ «រដ្ឋាភិបាលតែងតែមានយន្តការ និងមានគណៈកម្មការចម្រុះ ដើម្បីសិក្សាគ្រប់សំណើររបស់ប្រជាជន។ អញ្ចឹងអ្វីក៏ដោយឲ្យតែធ្វើតាមច្បាប់ គឺគេសិក្សាតាមច្បាប់ហើយ សមស្របឆ្លើយតបពេលណា រដ្ឋាភិបាលនឹងមានគណៈកម្មការសម្រេចរបស់លោក ហើយខាងរដ្ឋសភាក៏មានគណៈកម្មការរបស់គេ ដើម្បីត្រួតពិនិត្យខ្លឹមសារនីមួយៗដែរ»។
អង្គការឃ្លាំមើលសិទ្ធិមនុស្ស (Human Rights Watch) បានលើកឡើងក្នុងសេចក្ដីថ្លែងការណ៍របស់ខ្លួនកាលពីថ្ងៃសុក្រសប្ដាហ៍មុននេះថា បើចង់បើកចំហរសិទ្ធិសេរីភាពដល់អង្គការសង្គមស៊ីវិលនោះ រដ្ឋាភិបាលកម្ពុជាគួរតែចាប់ផ្ដើមជាមួយការលុបចោលនូវច្បាប់នានា ដែលរឹតត្បិតសិទ្ធិសេរីភាពជាមូលដ្ឋាន។
នាយករងប្រចាំតំបន់អាស៊ីនៃអង្គការឃ្លាំមើលសិទ្ធិមនុស្ស លោក Phil Robertson បានលើកឡើងក្នុងសេចក្ដីថ្លែងការណ៍នោះថា ការលុបចោលនូវលក្ខខ័ណ្ឌតម្រូវឲ្យជូនដំណឹងឲ្យបាន ៣ថ្ងៃមុនរបស់រដ្ឋាភិបាលកម្ពុជា គ្រាន់តែជាជំហានតូចមួយប៉ុណ្ណោះ ប៉ុន្តែ វានឹងមិនបញ្ឈប់នូវសកម្មភាពរំលោភបំពាន និងគំរាមកំហែងទៅលើក្រុមសកម្មជននៅកម្ពុជានោះឡើយ៕