មេដឹកនាំអតីតបក្សប្រឆាំង លោក កឹម សុខា លើកឡើងថា សង្គមមួយដែលរំលោភសិទ្ធិមនុស្ស នឹងធ្វើឲ្យប្រជាពលរដ្ឋខ្លួនឯងបែកបាក់សាមគ្គី ហើយធ្វើឲ្យប្រទេសមិនមានការរីកចម្រើន។
លោក កឹម សុខា លើកឡើងបែបនេះនៅលើទំព័រហ្វេសប៊ុករបស់លោក មួយថ្ងៃមុនការប្រារព្ធទិវាសិទ្ធិមនុស្សអន្តរជាតិលើកទី៧០ នៅថ្ងៃទី១០ ធ្នូ។
មេដឹកនាំគណបក្សសង្គ្រោះជាតិ លោក កឹម សុខា បានសរសេរសារបង្ហោះលើបណ្តាញសង្គមកាលពីថ្ងៃទី០៩ ខែធ្នូនេះថា បើមនុស្សគ្មានសិទ្ធិជាមូលដ្ឋាន សន្តិភាព ការអភិវឌ្ឍន៍ និងការបង្រួបបង្រួមជាតិក៏មិនអាចមាននិរន្តរភាពនោះទេ។
មេដឹកនាំបក្សប្រឆាំងដែលត្រូវបានរំលាយចោលរូបនេះ អះអាងថា ដើម្បីឲ្យសង្គមមានសាមគ្គីភាព សន្តិភាព និងអភិវឌ្ឍន៍ លោកថា ខ្មែរគ្រប់រូបគួរតែបញ្ឈប់ការធ្វើឲ្យខ្មែរដូចគ្នាឈឺចាប់។
អង្គការសង្គមស៊ីវិល បានលើកឡើងថា សេរីភាពបញ្ចេញមតិនៅតែស្ថិតនៅក្រោមការរឹតត្បិត បន្ទាប់ពីពិធីជួបជុំនៅទីលានប្រជាធិបតេយ្យរបស់ពួកគេនៅព្រឹកថ្ងៃនេះ ស្ថិតក្រោមការឃ្លាំមើល និងការរារាំងពីសមត្ថកិច្ចចម្រុះ។
រដ្ឋមន្ត្រីក្រសួងមហាផ្ទៃ លោក ស ខេង កាលពីថ្ងៃទី២៧ ខែវិច្ឆិកាកន្លងមកនេះ បានសម្រេចលុបចោលនូវសេចក្ដីណែនាំលេខ ១៧៥ ដែលតម្រូវឲ្យអង្គការសង្គមស៊ីវិល ជូនដំណឹងទៅអាជ្ញាធរមូលដ្ឋានឲ្យបាន៣ថ្ងៃ មុននឹងធ្វើសកម្មភាពណាមួយ៕
