ក្រុមអង្គការសង្គមស៊ីវិលបានលើកឡើងថា សេរីភាពបញ្ចេញមតិនៅតែស្ថិតនៅក្រោមការរឹតត្បិត បន្ទាប់ពីពិធីជួបជុំ និងដង្ហែក្បួនរបស់ពួកគេនៅព្រឹកថ្ងៃនេះ ស្ថិតក្រោមការឃ្លាំមើល និងការរារាំងពីសមត្ថកិច្ចចម្រុះ។
ក្រុមសកម្មជនការពារសិទ្ធិមនុស្ស មេដឹកនាំសហជីព សកម្មជនដីធ្លី និងប្រជាពលរដ្ឋនានា បានប្រមូលផ្ដុំគ្នាប្រារព្ធពិធីខួប៧០ឆ្នាំនៃទិវាសិទ្ធិមនុស្សអន្តរជាតិ នៅមុខស្ថាប័នក្រុមប្រឹក្សាអភិវឌ្ឍន៍កម្ពុជា នៅម្ដុំវត្តភ្នំ និងនៅឯទីលានប្រជាធិបតេយ្យថ្មី ដែលស្ថិតនៅក្នុងខណ្ឌឫស្សីកែវ នៅព្រឹកថ្ងៃនេះ ដែលពិធីរបស់ពួកគេស្ថិតក្រោមការតាមដានពីសមត្ថកិច្ចចម្រុះ។
ថ្លែងទៅកាន់អ្នកចូលរួមនៅឯទីលានប្រជាធិបតេយ្យ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ បានហៅសកម្មភាពអាជ្ញាធរថា ជាការរារាំង និងគំរាមកំហែងដល់សេរីភាពនៃការបញ្ចេញមតិ។
លោកថ្លែងថា៖ «បើកឲ្យធ្វើ ប៉ុន្តែ យកសមត្ថកិច្ចឲ្យមកគំរាមគ្នា មានន័យថា មាត់ឲ្យធ្វើ ប៉ុន្តែ គូសផ្លូវឲ្យដើរ អត់អាចធ្វើឲ្យអ្នកចូលរួមឲ្យទូលាយទៅតាមដូចអ្វីដែលក្រសួងមហាផ្ទៃបានចេញលិខិតនោះទេ»។
ទិវាសិទ្ធិមនុស្ស ១០ធ្នូ នាព្រឹកថ្ងៃនេះ មានអ្នកចូលរួមជួបជុំនៅទីលានប្រជាធិបតេយ្យប្រហែលជា ៣០០នាក់ ក្រោមការឃ្លាំមើលរបស់សមត្ថកិច្ចរដ្ឋាភិបាលរាប់សិននាក់នៅជុំវិញការជួបជុំនោះ។
ប្រធានគ្រប់គ្រងផ្នែកអង្កេតនៃអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ថា បើរដ្ឋាភិបាលនៅតែដាក់កម្លាំងសមត្ថកិច្ចឃ្លាំមើល រារាំងប្រជាពលរដ្ឋបញ្ចេញមតិ និងហាមមិនឲ្យដើរហែក្បួនប្រារព្ធទិវាសិទ្ធិមនុស្ស ១០ ធ្នូ គឺផ្ទុយពីច្បាប់ជាតិ និងអន្តរជាតិ។ ករណីនេះ លោកថា នឹងធ្វើឲ្យប៉ះពាល់មុខមាត់រដ្ឋាភិបាលលើឆាកអន្តរជាតិ។
លោកថ្លែងថា៖ «សហគមន៍អឺរ៉ុប គឺធ្វើយ៉ាងណាឲ្យស្តារឡើងវិញនូវលទ្ធិប្រជាធិបតេយ្យ និងការគោរពសិទ្ធិមនុស្សនៅកម្ពុជា។ ប្រសិនបើលក្ខខណ្ឌនៃការគោរពសិទ្ធិមនុស្ស លំហរនៃសិទ្ធិសេរីភាពជាមូលដ្ឋានរបស់ពលរដ្ឋនៅតែមានភាពរឹតត្បិត អ្វីដែលជាបញ្ហា គឺមុខមាត់រដ្ឋាភិបាល ហើយអ្វីដែលជាបញ្ហា គឺការដាក់សម្ពាធរបស់អន្តរជាតិ»។
អ្នកនាំពាក្យសាលារាជធានីភ្នំពេញ លោក ម៉េត មាសភក្តី មានប្រសាសន៍ថា សាលារាជធានីមិនអនុញ្ញាតឲ្យធ្វើការហែក្បួនតាមដងផ្លូវពីវត្តភ្នំទៅទីលានប្រជាធិបតេយ្យថ្មីនោះទេ ដោយលោកថា ដើម្បីកុំឲ្យប៉ះពាល់ដល់សុវត្ថិភាព និងសន្តិសុខសណ្តាប់ធ្នាប់សាធារណៈ។
អ្នកនាំពាក្យរូបនេះបានបដិសេធថា ការដាក់ពង្រាយកម្លាំងសន្តិសុខនៅជុំវិញទីលានប្រជាធិបតេយ្យ មិនមែនជាការគំរាមកំហែងទៅលើសិទ្ធិសេរីភាពបញ្ចេញមតិនោះឡើយ ដោយលោកថា ដើម្បីការពារសុវត្ថិភាពជូនប្រជាពលរដ្ឋ និងអ្នកសម្តែងមតិ។
លោក ម៉េត មាសភក្តី ប្រាប់ថា៖ «ការដាក់កម្លាំងដើម្បីការពារសុវត្ថិភាព ដើម្បីរៀបចំសន្តិសុខសណ្តាប់ធ្នាប់ជូនប្រជាពលរដ្ឋទូទៅ ហើយបងប្អូនដែលជាអ្នកសម្ដែងមតិក៏ជាប្រជាពលរដ្ឋនៅទីក្រុងភ្នំពេញដែរ ដែលយើងត្រូវមើលការខុសត្រូវជូនគាត់ ធ្វើម៉េចឲ្យពិធីរបស់គាត់ប្រព្រឹត្តទៅបានល្អ ពុំមានភាពអសកម្មអ្វីកើតឡើង បាតុភាពអ្វីកើតឡើង កុំឲ្យមានការយល់ច្រឡំ»។
រដ្ឋមន្ត្រីក្រសួងមហាផ្ទៃ លោក ស ខេង កាលពីថ្ងៃទី២៧ ខែវិច្ឆិកាកន្លងមកនេះ បានសម្រេចលុបចោលនូវសេចក្ដីណែនាំលេខ ១៧៥ ដែលតម្រូវឲ្យអង្គការសង្គមស៊ីវិល ជូនដំណឹងទៅអាជ្ញាធរមូលដ្ឋានឲ្យបាន៣ថ្ងៃ មុននឹងធ្វើសកម្មភាពណាមួយ។
ប៉ុន្តែ នាយករងប្រចាំតំបន់អាស៊ីនៃអង្គការឃ្លាំមើលសិទ្ធិមនុស្ស លោក Phil Robertson បានលើកឡើងក្នុងសេចក្ដីថ្លែងការណ៍កាលពីថ្ងៃសុក្រសប្ដាហ៍មុនថា ការលុបចោលនូវលក្ខខ័ណ្ឌតម្រូវឲ្យជូនដំណឹងឲ្យបាន៣ថ្ងៃមុនរបស់រដ្ឋាភិបាលកម្ពុជា គ្រាន់តែជាជំហានតូចមួយប៉ុណ្ណោះ ប៉ុន្តែ វានឹងមិនអាចបញ្ឈប់នូវសកម្មភាពរំលោភបំពាន និងគំរាមកំហែងទៅលើក្រុមសកម្មជននៅកម្ពុជានោះឡើយ ដោយសាររយៈពេល ១ឆ្នាំកន្លងមកនេះ រដ្ឋាភិបាលកម្ពុជាបង្កើនការបង្ក្រាបរបស់ខ្លួនទៅលើក្រុមអ្នកគាំទ្របក្សប្រឆាំង សកម្មជនដីធ្លី ក្រុមអ្នកការពារសិទ្ធិមនុស្ស និងក្រុមសហជីពជាដើម៕
