សាលាដំបូងរាជធានីភ្នំពេញ បានសម្រេចកាត់ទោសមេដឹកនាំសហជីព៦នាក់ ឲ្យជាប់ពន្ធនាគារម្នាក់ៗ២ឆ្នាំកន្លះ ប៉ុន្តែទោសនោះត្រូវបានព្យួរ ទាក់ទិននឹងព្រឹត្តិការណ៍តវ៉ា មុខសួនឧស្សហកម្មកាណាឌីយ៉ាផ្លូវវេងស្រេង កាលពីជាង៤ឆ្នាំមុន ។
ចៅក្រមជំនុំជម្រះលោក អ៊ឹម វណ្ណ: នៅថ្ងៃអង្គារនេះ បានសម្រេចផ្តន្ទាទោស មេដឹកនាំសហជីព មានលោក អាត់ ធន់ លោកស្រី ម៉ម ញឹម លោក ប៉ាវ ស៊ីណា លោក ជា មុនី លោក រ៉ុង ឈុន និងលោកស្រី យ៉ាង សោភ័ណ្ឌ ឲ្យជាប់ទោស២ឆ្នាំ៦ខែ ប៉ុន្តែទោសនោះត្រូវបានព្យួរ ។ ប៉ុន្តែចៅក្រមបានបង្គាប់ឲ្យអ្នកទាំងនោះ សងជំងឺចិត្តទៅជនរងគ្រោះជាសមត្ថកិច្ច២នាក់ ចំនួន៣៥លានរៀល។
ប្រធានសហភាពការងារកម្ពុជាលោក អាត់ ធន់ ចាត់ទុកសាលក្រមនេះថា បានបន្តគំរាមកំហែងសកម្មភាពជំរុញលក្ខខណ្ឌការងារ ហើយថា មេដឹកនាំសហជីព នឹងប្តឹងជំទាស់ទៅសាលាឧទ្ធរណ៍។
លោកថា៖ «យើងត្រូវជាប់ទោសព្រហ្មទណ្ឌ អញ្ចឹងអាហ្នឹងយើងអត់អាចធ្វើការងារសហជីពបានទៀតទេ។ ហើយមួយទៀត បង់លុយហ្នឹង ក៏យើងអត់បានប្រព្រឹត្តទេ ហើយលុយហ្នឹងក៏វាច្រើនដែរ។ យើងនឹងប្រឹងឧទ្ធរណ៍។ ហើយយើងស្នើទៅរដ្ឋាភិបាលឲ្យពិនិត្យឡើងវិញ ចំពោះព្រះរាជអាជ្ញាដែលកាត់ក្តីរឿងហ្នឹង ហើយនិងតុលាការហ្នឹង សម្របសម្រួលយ៉ាងម៉េចដើម្បីទម្លាក់បទចោទហ្នឹង»
លោកនាយករដ្ឋមន្ត្រី ហ៊ុន សែន កាលពីខែមុន បានក្រើនរំឭក ក្រសួងយុត្តិធម៌ និងក្រសួងការងារឲ្យពន្លឿនករណីនេះ ដោយថា ដើម្បីបើកលំហរសេរីភាពសហជីព។
មេដឹកនាំសហជីពទាំង៦នាក់ រងការចោទថា បានផ្តើមគំនិត ក្នុងអំពើហិង្សាដោយចេតនាមានស្ថានទម្ងន់ទោស ដែលតុលាការចោទថា បានប្រព្រឹត្តនៅចំណុចមុខសួនឧស្សាហកម្មកាណាឌីយ៉ា ផ្លូវវេងស្រេង ក្នុងភូមិត្រពាំងថ្លឹងសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ កាលពីអំឡុងថ្ងៃទី២៥ ខែធ្នូ ឆ្នាំ២០១៣ រហូតដល់ ថ្ងៃទី០៣ ខែមករា ឆ្នាំ ២០១៤។
កាលពីថ្ងៃទី៣ ខែមករា ឆ្នាំ២០១៤ ពេលនោះ កម្មករច្រើនរយនាក់ ចេញតវ៉ាលើផ្លូវវេងស្រេង ទាមទារទៅរដ្ឋាភិបាលឲ្យតំឡើងប្រាក់ឈ្នួលពួកគេបាន១៦០ដុល្លារក្នុងមួយខែ។ ការតវ៉ានោះ បានបណ្តាលឲ្យផ្ទុះហិង្សា រវាងកម្មករ និងកម្លាំងប្រដាប់អាវុធរបស់រដ្ឋាភិបាលដែលបានដាក់ពង្រាយ។ តាមរបាយការណ៍របស់សមាគមការពារសិទ្ធិមនុស្សអាដហុក ព្រឹត្តិការណ៍បង្ហូរឈាមគ្នានោះ មានកម្មករ៥នាក់ត្រូវគេបាញ់ឲ្យស្លាប់នៅនឹងកន្លែង ជិត៤០រងរបួសនិង២៣នាក់ត្រូវបានចាប់ខ្លួន ចំណែកសមត្ថកិច្ចខ្លះបានរងរបួសដោយដុំថ្ម។
ក្រោយមកមេដឹកនាំសហជីពមួយចំនួន រងការចោទប្រកាន់ ប៉ុន្តែគ្មានកម្លាំងប្រដាប់អាវុធណាម្នាក់ ត្រូវបានតុលាការនាំខ្លួនមកផ្តន្ទាទោសក្នុងព្រឹត្តិការណ៍បង្ហូរឈាមនេះទេ៕
