ប្រជាពលរដ្ឋអាចមកទិញត្រីនៅតាមដងទន្លេសាបក្នុងភូមិសាស្រ្តរាជធានីភ្នំពេញ និងខេត្តកណ្ដាល សម្រាប់ធ្វើប្រហុក ផ្អក និង ត្រីឆ្អើរ ទុកទទួលទានបានចាប់ពីថ្ងៃទី១៤ ដល់ទី២០ ខែធ្នូ។
យោងតាមសេចក្ដីជូនដំណឹងរបស់រដ្ឋបាលជលផលនៃក្រសួងកសិកម្មរុក្ខាប្រមាញ់ និងនេសាទចុះថ្ងៃទី១១ ខែធ្នូ ឆ្នាំ២០១៨ បានឲ្យដឹងថា ក្នុងរដូវនេសាទឆ្នាំ២០១៨-២០១៩នេះ ទឹកក្នុងបឹងទន្លេសាបនិងលំហូរទឹកដែលហូរចេញពីបឹងទន្លេសាបស្រកលឿនជាងបណ្ដាឆ្នាំកន្លងមក។ រដ្ឋបាលជលផល ឲ្យដឹងថា ល្បឿនទឹកស្រកលឿនបែបនេះ ធ្វើឲ្យគន្លងជាយនៅតាមដងទន្លេសាបក្រុងភ្នំពេញនិងខេត្តកណ្ដាល អាចនេសាទត្រីបានច្រើនចាប់ពីថ្ងៃទី១៤ ដល់២០ ខែធ្នូ ឆ្នាំ២០១៨ បើមេឃស្រឡះគ្មានភ្លៀងកក់ខែ។ ប្រភពដដែល ឲ្យដឹងទៀតថា ប្រជាពលរដ្ឋដែលមានបំណងធ្វើប្រហុក ផ្អក និង ត្រីឆ្អើរ ជាដើម អាចមកទិញត្រីពីប្រជានេសាទនៅតាមភូមិសាស្រ្តនិងពេលវេលាដែលបានបញ្ជាក់ខាងលើ។
រដ្ឋបាលជលផល ក៏បានអំពាវនាវដល់អាជ្ញាធរមូលដ្ឋាន និងសមត្ថកិច្ចគ្រប់ជាន់ថ្នាក់ឲ្យបង្កលក្ខណៈងាយស្រួលដល់ប្រជាពលរដ្ឋដែលមានបំណងធ្វើផ្អក និងប្រហុកជាដើម បានធ្វើដំណើរទៅមកស្នាក់នៅនិងដឹកជញ្ជូនផលិតផលត្រីកុំឲ្យមានការរាំងស្ទះ៕
