លោកនាយករដ្ឋមន្ត្រី ហ៊ុន សែន នៅថ្ងៃនេះ បានចេញមុខអះអាងថា មេដឹកនាំសហជីព៣រូប មានលោក អាត់ ធន់ លោក ជា មុន្នី និងលោក ប៉ាវ ស៊ីណា មិនបានដឹកនាំតវ៉ានៅផ្លូវវេងស្រេង ដូចសាលក្រមចោទប្រកាន់ របស់សាលាដំបូងរាជធានីភ្នំពេញនោះទេ។
សាលាដំបូងរាជធានីភ្នំពេញ កាលពីថ្ងៃអង្គារម្សិលមិញ បានផ្តន្ទាទោសមេដឹកនាំសហជីព៦នាក់ មានលោក អាត់ ធន់ លោក ប៉ាវ ស៊ីណា លោក ជា មុនី លោក រ៉ុង ឈុន លោកស្រី ម៉ម ញឹម និងលោកស្រី យ៉ាង សោភ័ណ្ឌ ឲ្យជាប់ទោសចន្លោះពី២ឆ្នាំកន្លះ ទៅ៤ឆ្នាំកន្លះ ទាក់ទិនទៅនឹងសំណុំរឿងផ្លូវវេងស្រេង។ ប៉ុន្តែទោសទាំងនោះត្រូវបានព្យួរ។
លោក ហ៊ុន សែន ក្នុងពិធីជួបសំណេះសំណាលជាមួយកម្មករ នៅខេត្តកំពង់ស្ពឺ ថ្ងៃទី១២ធ្នូនេះ បានអះអាងថា លោកមានភស្តុតាង ដើម្បីបញ្ជាក់ថា លោក អាត់ ធន់ លោក ជា មុន្នី និងលោក ប៉ាវ ស៊ីណា មិនជាប់ពាក់ព័ន្ធទៅនឹងសំណុំរឿងនេះទេ។
លោក ហ៊ុន សែន ថ្លែងទៀតថា មុនមានព្រឹត្តិការណ៍បង្ក្រាប លោក កែវ រ៉េមី បានប្រាប់ថា លោក ជា មុន្នី ប្រធានសហជីពសេរីកម្មករ មិននៅទីនោះឡើយ។ លោកបន្តថា ចំណែកលោក សយ សុភាព វិញ ក៏បានប្រាប់លោកដែរថា លោក អាត់ ធន់ និងលោក ប៉ាវ ស៊ីណា ក៏មិននៅក្នុងព្រឹត្តិការណ៍តវ៉ានៅផ្លូវវេងស្រេងនោះដែរ។
មេដឹកនាំរូបនេះ បញ្ជាក់ថា លោក កែវ រ៉េមី និងលោក សយ សុភាព អាចធ្វើជាសាក្សី ក្នុងសំណុំរឿងនេះ នៅតុលាការបាន បើតុលាការត្រូវការ។
លោកថា៖ «ខ្ញុំមានភស្តុតាង ថា៣នាក់នេះ មិនជាប់ពាក់ព័ន្ធទេ ត្រង់៣នាក់ទៀតខ្ញុំអត់ហ៊ានអះអាងទេ? ។ រឿង ជា មុន្នី! កែវ រ៉េមី អាចធ្វើសាក្សី បាន»។
ប្រធានសហភាពការងារកម្ពុជា លោក អត់ ធន់ អះអាងថា បើទោះបីគ្មានការអះអាងពីប្រមុខរដ្ឋាភិបាល ក៏មេធាវីការពារក្តីលោកប្តឹងជំទាស់ករណីនេះ ទៅសាលាឧទ្ធរណ៍ដែរ។ លោកបន្ថែមថា បើមិនដូច្នេះទេ សាលក្រមសាលាដំបូងនេះនឹងក្លាយជាឧបករណ៍ គំរាមកំហែងធ្ងន់ធ្ងរ ដល់សកម្មភាពលើកកម្ពស់សិទ្ធិការងារ ។
លោកថា៖ «យើងត្រូវមានទោស បើសិនយើងអត់ប្តឹងឧទ្ធរណ៍ ហើយនៅពេលដែលយើងមានទោស ទោះបីនៅក្រៅឃុំក៏ដោយ ប៉ុន្តែយើងជាប់នៅក្នុងរបាយការណ៍កត់ត្រាក្នុងក្រសួងយុត្តិធម៌ជាលិខិតថ្កោលទោស ឬគេដាក់ឲ្យមានទោស។ ហើយកាលណាយើងមានទោសក្នុងច្បាប់សហជីពថ្មី យើងមិនអាចឈរឈ្មោះជាថ្នាក់ដឹកនាំសហជីព ជាប្រធាន ឬអនុប្រធាន ជាលេខាបានទេ។ ហើយកម្មវិធីមួយចំនួនទៀត ដែលយើងត្រូវទៅក្រៅប្រទេស ឬប្រទេសខ្លះគេតម្រូវក៏យើងអត់អាចទៅបានដែរ»។
ប្រធានសហភាពសហជីពកម្ពុជា លោក រ៉ុង ឈុន ដែលលោក ហ៊ុន សែន មិនបានចេញមុខការពារដែរនោះ មានប្រសាសន៍ថា លោកមិនភ្ញាក់ផ្អើលទៅការកាត់ក្តីរបស់តុលាការ និងការលើកឡើងរបស់នាយករដ្ឋមន្ត្រីនេះទេ។ លោកបន្តថា ការលើកឡើងបែបនេះជា ចេតនានយោបាយ ដើម្បីបំភាន់ភ្នែកអ្នកបញ្ជាទិញ និងសហភាពអឺរ៉ុបដែលកំពុងគំរាមព្យួរប្រព័ន្ធអនុគ្រោះពន្ធ EBA តែប៉ុណ្ណោះ មិនមែនជាចេតនាដើម្បីបើកលំហសេរីភាពសហជីពឡើយ។
លោក រ៉ុង ឈុន អះអាងថា ព្រឹត្តិការណ៍នៅផ្លូវវេងស្រេង អាជ្ញាធរ និងតុលាការគួរនាំខ្លួនអ្នកបាញ់សម្លាប់កម្មករ និងអ្នកបញ្ជាឲ្យមានព្រឹត្តិការណ៍បង្ហូរឈាមនេះមកផ្តន្ទាទោស ជាជាងបង្វែររឿងមកចោទប្រកាន់មេដឹកនាំសហជីពដែលការពារសិទ្ធិកម្មករ។
លោកថា៖ «អ្វីដែលយើងសោកស្តាយ អាជ្ញាធរគួរតែទៅចាប់អ្នកដែលប្រព្រឹត្ត អ្នកដែលបាញ់សម្លាប់កម្មករ ឲ្យកម្មករបាត់បង់ជីវិត រងរបួស បង្កអំពើហិង្សាទៅលើបងប្អូនកម្មករ កម្មការនី ត្រូវតែវែកមុខមកផ្តន្ទាទោសទៅតាមផ្លូវច្បាប់ អ្នកបង្កនិងអ្នកបញ្ជា»។
កាលពីថ្ងៃទី៣ ខែមករា ឆ្នាំ២០១៤ មានព្រឹត្តិការណ៍ប៉ះទង្គិចបង្ហូរឈាមមួយនៅលើផ្លូវវេងស្រេងក្នុងរាជធានីភ្នំពេញរវាងក្រុមកម្មករនិងសមត្ថកិច្ច។ ព្រឹត្តិការណ៍នោះ កម្មករដែលទាមទារតម្លើងប្រាក់ឈ្នួល យ៉ាងតិច៤នាក់ ត្រូវកងកម្លាំងប្រដាប់អាវុធ បាញ់ឲ្យស្លាប់នៅនឹងកន្លែង ម្នាក់បាត់ខ្លួន មួយចំនួនទៀតរងរបួស និងខ្លះទៀតត្រូវបានចាប់ខ្លួន៕
