វិនិយោគិន និងភ្ញៀវទេសចរបរទេសដែលមកប្រទេសកម្ពុជា បានទទួលរងគ្រោះផ្សេងៗមានចំនួន ៥២៧ករណី ដែលមានការកើនឡើង២៨២ករណី បើធៀបទៅនឹងឆ្នាំ២០១៧ក្នុងរយៈពេលដូចគ្នា។
តាមគេហទំព័រហ្វេសប៊ុករបស់អគ្គសន្នការនគរបាលជាតិនៅថ្ងៃទី១២ ខែធ្នូ ឆ្នាំ២០១៨បានបង្ហាញអំពី របាយការណ៍លទ្ធផលកិច្ចប្រតិបតិ្តការ របស់ក្រុមព័ត៌មានទាន់ហេតុការណ៍ (HOTLINE) ជាមួយជនបរទេសប្រចាំនៅកម្ពុជា បានឲ្យដឹងថា វិនិយោគិន និងទេសចរបរទេស ដែលមកប្រទេសកម្ពុជា បានទទួលរងគ្រោះមានចំនួន ៥២៧ករណី ហើយអ្នករងគ្រោះសរុប ៧០៤នាក់ ក្នុងនោះស្លាប់២៤១នាក់ របួស១៦៩នាក់ បាត់បង់ទ្រព្យសម្បត្តិ ៣២១នាក់ នឹងមាន ៥៨សញ្ជាតិ លើ២០រាជធានី-ខេត្ត។ ដោយឡែកក្នុងឆ្នាំ២០១៧ មានរងគ្រោះ ២៤៥ករណី អ្នករងគ្រោះ២៥៥នាក់។ នៅក្នុងរបាយការណ៍មិនបានបញ្ជាក់មូលហេតុច្បាស់លាស់ពីគ្រោះថ្នាក់នោះទេ។
ក្រៅពីជនបរទេសរងគ្រោះ ក៏មានជនបរទេសប្រព្រឹត្តបទល្មើសមានចំនួន ២៧៥ករណី ឃាត់ខ្លួនសរុប ១០២០នាក់ មាន៣៧សញ្ជាតិ លើ១៩រាជធានី-ខេត្តទូទាំងប្រទេស ក្នុងបទល្មើស៣១ប្រភេទផ្សេងគ្នា ។
នៅឆ្នាំ២០១៨នេះ ក្រុម HOTLINE ជនបរទេស បានទទួលបណ្តឹងសុំអន្តរាគមន៍ពីជនបរទេស និងស្ថានទូតចំនួន ៣៣ករណី បានដោះស្រាយបញ្ចប់ ១៣ករណី និងមិនទាន់បញ្ចប់ ២០ករណី។
ក្នុងរបាយការណ៍ក្រសួងទេសចរណ៍បានឲ្យដឹងថាក្នុងរយៈពេល១០ខែក្នុងឆ្នាំ២០១៨នេះ កម្ពុជាទទួលបានកំណើនទេសចរប្រមាណជិត៥លាននាក់។ ដោយឡែកកាលពីឆាំ២០១៧ កម្ពុជាទទួលភ្ញៀវទេសចរបានជាង ៥លាន ៦សែននាក់
