សកម្មជនដីធ្លី៣នាក់នៅរាជធានីភ្នំពេញ ត្រូវបានតុលាការកោះហៅឲ្យចូលបំភ្លឺនៅថ្ងៃស្អែកនេះ ក្រោមការសង្ស័យថា ពាក់ព័ន្ធការបំផ្លាញទ្រព្យសម្បត្តិអ្នកដទៃ តាមពាក្យបណ្តឹងរបស់ម្ចាស់ក្រុមហ៊ុនផានអុីម៉ិច។
ក្នុងដីកាកោះចុះថ្ងៃទី០៤ ខែធ្នូ ដែលវីអូឌីទទួលបាននៅថ្ងៃនេះ តំណាងអយ្យការអមសាលាដំបូងរាជធានីភ្នំពេញ លោក ស៊ឺ វណ្ណនី បានកៅហៅសកម្មជនដីធ្លីសហគមន៍បុរីកីឡា អ្នកស្រី ភោគ សុភីន និងសកម្មជនដីធ្លីតំបន់បឹងកក់ពីរនាក់ទៀត អ្នកស្រី ស៊ា ណារ៉េត និងកញ្ញា អ៊ឹម ស្រីទូច ឲ្យចូលបំភ្លឺនៅតុលាការរសៀលថ្ងៃទី១៤ ខែធ្នូ តាមបណ្តឹងរបស់ប្រធានក្រុមហ៊ុនផានអីម៉ីច លោកស្រី ស៊ុយ សុផាន។
ដីកាកោះនោះ បញ្ជាក់ថា សកម្មជនដីធ្លីទាំង៣នាក់ ជាប់សង្ស័យថា គំរាមកំហែងដោយមានបញ្ជាឲ្យបំពេញលក្ខខណ្ឌអ្វីមួយ និងបំផ្លាញទ្រព្យសម្បត្តិអ្នកដទៃ។
មេធាវីការពារក្ដីឲ្យសកម្មជនដីធ្លីទាំង ៣រូប គឺលោក តឹក ធារ៉ូ អះអាងនៅថ្ងៃនេះថា កូនក្តីរបស់លោកទាំង ៣នាក់ នឹងចូលបំភ្លឺតាមកាកោះហៅរបស់តុលាការ។
សកម្មជនដីធ្លីទាំង ៣នាក់ខាងលើនេះ ត្រូវបានអ្នកស្រី ស៊ុយ សុផាន ម្ចាស់ក្រុមហ៊ុនផានអ៊ីម៉ិច ប្ដឹងដោយចោទថា បានគំរាមកំហែង និងបំផ្លិចបំផ្លាញទ្រព្យសម្បត្តិអ្នកដទៃ ដែលបណ្ដឹងនោះបានកើតឡើងក្រោយពីក្រុមសកម្មជនដីធ្លីទាំងនោះ បាននាំគ្នាតវ៉ានៅមុខគេហដ្ឋានរបស់អ្នកស្រី ស៊ុយ សុផាន កាលពីខែកក្កដា ឆ្នាំ២០១៨កន្លងមកនេះ៕
