រដ្ឋាភិបាលដឹកនាំដោយគណបក្សប្រជាជនកម្ពុជា គ្រោងជួបពិភាក្សាជាមួយក្រុមអង្គការសង្គមស៊ីវិលនៅដើមឆ្នាំក្រោយនេះអំពី«ភាពជាដៃគូ» ដោយថា ពួកគេនៅមានការខ្វែងគំនិតគ្នាមួយចំនួនជាមួយរដ្ឋាភិបាល។
ក្នុងពិធីប្រកាសចូលកាន់តំណែងអភិបាលនៃគណៈអភិបាលខេត្តសៀមរាបនាព្រឹកថ្ងៃព្រហស្បតិ៍នេះ រដ្ឋមន្ដ្រីក្រសួងមហាផ្ទៃ លោក ស ខេង ជំរុញឲ្យសង្គមស៊ីវិលចូលរួមពិភាក្សាគ្នាឲ្យបានស៊ីជម្រៅថែមទៀតពាក់ព័ន្ធនឹង «ភាពជាដៃគូ» ដោយលោកថា សង្គមស៊ីវិលមួយចំនួនបានរិះគន់រដ្ឋាភិបាលថា បានធ្វើសកម្មភាពគំរាមកំហែង និងរឹតត្បិតសិទ្ធិសេរីភាព នៅពេលពួកគេប្រារព្ធទិវាសិទ្ធិមនុស្សថ្ងៃទី១០ ធ្នូកន្លងទៅ។
ក្នុងពិធីនេះ លោក ស ខេង សង្ឃឹមថា សង្គមស៊ីវិលនឹងចូលរួមពិភាក្សាគ្នារកដំណោះស្រាយពាក់ព័ន្ធនឹងបញ្ហានេះ ដែលលោកថា គ្រោងធ្វើឡើងនៅខែមករា ឆ្នាំ២០១៩ខាងមុខ។
លោក ស ខេង ថ្លែងថា៖ «តើមានភាពជាដៃគូមានន័យយ៉ាងម៉េច? បើយើងនិយាយរួម មិនបកស្រាយឲ្យច្បាស់លាស់ ប្រហែលជាការអនុវត្តមានបញ្ហា។ ចំណុចនេះខ្ញុំមិនហ៊ានបកស្រាយទេ ខ្ញុំទុកលទ្ធភាពជូនតំណាងក្រសួងមហាផ្ទៃ និងសង្គមស៊ីវិល ដែលគ្រោងថា នឹងជួបគ្នានៅខែ១នេះ ជជែកគ្នា […] ព្រោះពិបាកក្នុងការអនុវត្ត។ កាលថ្ងៃទី១០ធ្នូ ថ្ងៃសិទ្ធិមនុស្ស គាត់ចង់ធ្វើនៅមុខក្រុមប្រឹក្សាអភិវឌ្ឍកម្ពុជា»។
ប្រធានសមាគមប្រជាធិបតេយ្យឯករាជនៃសេដ្ឋកិច្ចក្រៅប្រព័ន្ធ លោក វន់ ពៅ សាទរចំពោះការប្រកាសរបស់រដ្ឋមន្ដ្រីមហាផ្ទៃរូបនេះ ដោយលោករំពឹងថា សង្គមស៊ីវិលនឹងអាចចូលរួមផ្ដល់យោបល់ និងបង្ហាញជំហររបស់ពួកគេ ដើម្បីដោះស្រាយការខ្វែងគំនិតគ្នានេះ។
លោកលើកឡើងថា រដ្ឋាភិបាលគួរបង្កើតក្រុមការងារឯករាជ្យមួយដើម្បីដោះស្រាយ និងធានាដល់ការអនុវត្តសិទ្ធិសេរីភាពរបស់អង្គការសង្គមស៊ីវិលអាចធ្វើសកម្មភាពដោយគ្មានការបំភិតបំភ័យ និងគំរាមកំហែង។
លោកបន្ដថា៖ «ប្រសិនបើរដ្ឋាភិបាលមានឆន្ទៈពិតប្រាកក្នុងការបើកទូលាយនូវសកម្មភាពដោយសុឆន្ទៈពិតប្រាកដមែន ខ្ញុំគិតថា វាជាចំណុចមួយល្អក្នុងការពិភាក្សារកដំណោះស្រាយសម្រាប់លំហូរនៃការប្រើប្រាស់សិទ្ធិរបស់អង្គការសង្គមស៊ីវិល […] ខ្ញុំគិតថា រដ្ឋាភិបាលគួរតែបង្កើតក្រុមការងារធ្វើការប្រកបដោយប្រសិទ្ធិភាពជាមួយយើងជាអង្គការសង្គមស៊ីវិល»។
នាយិកាអង្គការសីលកា អ្នកស្រី ធីតា ឃឹះ រិះគន់ថា កន្លងមក រដ្ឋាភិបាលបានប្រើប្រាស់វិធានការច្បាប់ និងមូលហេតុមិនត្រឹមត្រូវក្នុងការរារាំង និងហាមឃាត់សង្គមស៊ីវិលមិនឲ្យធ្វើសកម្មភាពផ្សេងៗ ដែលត្រូវបានធានាដោយច្បាប់ជាតិ និងអន្ដរជាតិ។
អ្នកស្រីបន្ដថា៖ «រដ្ឋាភិបាលបានដាក់កំហិតថា មិនឲ្យយើងធ្វើដោយសារខ្លាចនេះខ្លាចនោះ។ នោះជារឿងរឹតត្បិតសិទ្ធិសេរីភាព។ មានការលំបាកកន្លងមក ពិបាកទាំងរកកន្លែងធ្វើសកម្មភាព ទីកន្លែងសាធារណៈដូចជា វត្តភ្នំ សួនច្បារផ្សេងៗ ដែលធម្មតា ជាកន្លែងយើងអាចធ្វើសកម្មភាពបាន ត្រូវបានកំណត់ដោយរាជធានីថា មិនឲ្យយើងធ្វើ»។
ក្នុងពិធីរំលឹកខួបលើកទី៧០នៃទិវាសិទ្ធិមនុស្សកាលពីថ្ងៃទី១០ ធ្នូ ឆ្នាំ២០១៨ ក្រុមអ្នកការពារសិទ្ធិមនុស្ស មេដឹកនាំសហជីព សកម្មជនដីធ្លី និងប្រជាពលរដ្ឋប្រមាណ ៣០០នាក់ បានប្រមូលផ្ដុំគ្នានៅមុខស្ថាប័នក្រុមប្រឹក្សាអភិវឌ្ឍន៍កម្ពុជា នៅម្ដុំវត្តភ្នំ និងនៅទីលានប្រជាធិបតេយ្យថ្មី ស្ថិតក្នុងខណ្ឌឫស្សីកែវ ដោយពួកគេបានហៅការដាក់កម្លាំងការពារសន្ដិសុខរបស់អាជ្ញាធរថា ជាការរារាំង និងផ្ទុយពីច្បាប់ជាតិ និងអន្ដរជាតិ។
អង្គការឃ្លាំមើលសិទ្ធិមនុស្ស Human Rights Watch បានជំរុញទៅរដ្ឋាភិបាលកម្ពុជាកាលពីសប្ដាហ៍មុន ឲ្យលុបចោលច្បាប់ទាំងឡាយដែលរឹតត្បិតសិទ្ធិសេរីភាពជាមូលដ្ឋាន បើទោះបីជារដ្ឋាភិបាលដឹកនាំដោយបក្សកាន់អំណាចបានចាប់ផ្ដើមបើកចំហរឡើងវិញនូវសេរីភាពរបស់អង្គការសង្គមស៊ីវិលក៏ដោយ៕
