អាជ្ញាធរខេត្តព្រះសីហនុ អះអាងថា កំពុងសហការជាមួយធនាគាអភិវឌ្ឍន៍អាស៊ីដើម្បីសិក្សា និងរៀបចំដំណើការសាងសង់អាងចម្រោះទឹកកខ្វក់បង្ហូរចេញពីលូ។
ការលើកឡើងរបស់អាជ្ញាធរខេត្តព្រះសីហនុ ធ្វើឡើង ក្រោយពីសកម្មជនមាតាធម្មជាតិ លោក ថុន រដ្ឋា បានបង្ហោះវីដេអូមួយបង្ហាញអំពីផលប៉ះពាល់បរិស្ថាន និងសុខភាពប្រជាពលរដ្ឋដែលបង្ករឡើងដោយសារការបង្ហូរបំពង់ទុយោទឹកស្អុយចំនួន ២៩ ចូលឆ្នេរអូឈើទាល។
អ្នកនាំពាក្យសាលាខេត្តព្រះសីហនុ ឱម សារឿន បានប្រាប់ថាអាជ្ញាធរខេត្ត និងមន្រ្តីជំនាញបានប្រជុំពិភាក្សា ចុះត្រួតពិនិត្យ និងកំពុងសិក្សាពីគម្រោងសាងសង់អាងចម្រោះស្អុយបណ្តោះអាសន្ននៅតំបន់គោលដៅធំៗចំនួន៧ ក្នុងខេត្តឆ្នេរសមុទ្រមួយនេះ។ លោកបន្តថា ការសិក្សានេះ គឺធ្វើជាដំណាក់កាលៗ ហើយទទួលបានការសហការពីធនាគារអភិវឌ្ឍន៍អាស៊ី។
លោកបានលើកឡើងទៀតថា គម្រោងសាងសង់នេះគឺវាមិនមែនធ្វើបានភ្លាមៗនោះទេ ដោយថាវាត្រូវការពេលវេលាក្នុងការសិក្សាឲ្យបានច្បាស់លាស់។
លោកមានប្រសាសន៍យ៉ាងដូច្នេះថា៖ «បើនិយាយអំពីទស្សនទាន ឬចក្ខុវិស័យរបស់អាជ្ញាធរ និងមន្ត្រីគឺចង់ឲ្យមានដំណោះស្រាយឆាប់ៗ។ មន្ត្រីជំនាញបានចុះពិនិត្យជារៀងរាល់ថ្ងៃ ជាយុទ្ធសាស្ត្រមុននឹងធ្វើឲ្យត្រូវតាមស្តង់ដា អាជ្ញាធរនឹងធ្វើអាងចម្រុះបណ្តោះអាសន្នដើម្បីធ្វើឲ្យមានភាពប្រសើរជាងពេលដែលអត់។ គម្រោងនេះគឺធ្វើគ្រប់ទាំងអស់ មិនមែនតែឆ្នេរអូរឈើទាលទេ។»
អ្នកនាំពាក្យសាលាខេត្តព្រះសីហនុ រូបនេះ ក៏បានលើកឡើងថាយុវជនគួរស្វែងយល់និងបញ្ចេញនូវទស្សនៈរបស់ខ្លួនប្រកបដោយសុទិដ្ឋិនិយមជាងនេះ។
ក្នុងវីដេអូដែលបង្ហោះដោយក្រុមសកម្មជនមាតាធម្មជាតិ លោក ថុន រដ្ឋា កាលពីថ្ងៃទី៨ ខែធ្នូ ឆ្នាំ២០១៨ ដដែល បានយកទឹកដែលបង្ហូរចូលមកក្នុងសមុទ្រនោះទៅពិនិត្យនៅឯវិទ្យាស្ថានប៉ាស្ទ័រកម្ពុជា។ លោក ថុន រដ្ឋា បានបង្ហាញថាតាមលទ្ធផលដែលចេញដោយវិទ្យាស្ថានប៉ាស្ទ័រកម្ពុជា ទឹកនោះផ្ទុកទៅដោយសារធាតុគ្រោះថ្នាក់ជាច្រើនដល់សុខភាពរបស់ប្រជាពលរដ្ឋ មនុស្សចាស់ កុមា និងស្រ្តីមានផ្ទៃពោះ ជាពិសេសអ្នកដែលចូលចិត្តហែលទឹកសមុទ្រ។
លោកមានប្រសាសន៍បន្តថា៖ «ពេលនេះយើងទទួលបានលទ្ធផលហើយ វាពិតជាគួឲ្យបារម្ភខ្លាំងបំផុត ពីព្រោះទឹកស្អុយដែលហូរចូលសមុទ្រគឺចេញពីទឹកបង្គន់ដោយផ្ទាល់ ហើយផ្ទុកទៅដោយសារធាតុប៉ារ៉ាស៊ីត និងបាក់តេរី ដែលអាចបង្ករទៅជាជម្ងឺផ្សេងៗ ចំណែកឯសារធាតុផ្សេងទៀតមានដូចជា Escherichia Coli, Trichomonas intestinalis trophozoite និងសារធាតុអាម៉ូញាក់ផងដែរ ដូច្នេះវាប៉ះពាល់យ៉ាងខ្លាំងដល់សុខភាពមនុស្សដែលអាចមានរោគសញ្ញាដូចជា រាគ ចុកពោះ និងក្អួតជាដើម ហើយអាចបណ្តាលឲ្យបាត់បង់ជីវិតទៀតផង។ »
អាជ្ញាធរខេត្តព្រះសីហនុ និងមន្រ្តីក្រសួងពាក់ព័ន្ធ កាលពីថ្ងៃទី១១ ខែតុលាឆ្នាំ២០១៨ បានចុះពិនិត្យទីតាំងស្ថានីយ៍បូមទឹកកខ្វក់ និងអាងប្រព្រឹត្តកម្មទឹកកខ្វក់មួយចំនួនតាមបណ្តោយឆ្នេរដូចជា ឆ្នេរសុខា ឆ្នេរអូឈើទាល និងស្ថានីយ៍ច្រោះសម្អាតទឹកកាកសំណល់ទំហំ១៦ហិកតា។
