សហភាពអឺរ៉ុបនឹងចុះហត្ថលេខាលើការផ្តល់ជំនួយឥតសំណងចំនួន៨៧លានអឺរ៉ូ ដល់កម្ពុជា ដើម្បីធ្វើការអភិវឌ្ឍវិស័យជលផល។
យោងតាមទំព័រហ្វេសប៊ុក របស់ក្រសួងកសិកម្ម នាឱកាសចុះត្រួតពិនិត្យជលផលត្រីនៅរដូវវស្សា កាលពីថ្ងៃទី១៣ ខែធ្នូ ឆ្នាំ២០១៨នេះ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន និង ឯកអគ្គរដ្ឋទូតសហភាពអឺរ៉ុបប្រចាំព្រះរាជាណាចក្រកម្ពុជា George Edgar បានរួមគ្នាប្រកាសជាផ្លូវការពីជំនួយហិរញ្ញប្បទានឥតសំណងពីសហគមន៍អឺរ៉ុប ដែលមានទឹកប្រាក់សរុប៨៧លានអឺរ៉ូ ដែលគ្រោងនឹងចុះហត្ថលេខាក្នុងពេលឆាប់ៗនេះ សម្រាប់អភិវឌ្ឍវិស័យជលផលប្រកបដោយចីរភាព។
អ្នកនាំពាក្យក្រសួងកសិកម្ម លោក ស្រី វុទ្ធី បញ្ជាក់ប្រាប់ វី.អូ.ឌី ឲ្យដឹងបន្ថែមថា ជំនួយឥតសំណងដែលទទួលបាននោះក្រសួង នឹងបែងចែកទៅកាន់ខេត្តគោលដៅសំខាន់ៗ ដើម្បីគ្រប់គ្រងធនធានជលផលប្រកបដោយនិរន្តរភាព ក៏ដូចជាវារីវប្បកម្មជាដើម។
លោក ស្រី វុទ្ធី ថាជាយុទ្ធសាស្រ្តជំនួយនេះនឹងយកទៅប្រើប្រាស់ដើម្បីពង្រឹងការអនុវត្តច្បាប់ស្តីពីជលផល រក្សាការចាប់ផលនេសាទពីធម្មជាតិក្នុងរង្វង់ ៦០០ ០០០តោន ក្នុងមួយឆ្នាំ បង្កើនវារីវប្បកម្ម២០%ក្នុងមួយឆ្នាំ និងបង្កើនជីវភាពរបស់សហគមន៍ឲ្យមានភាពប្រសើរឡើង៕