រដ្ឋមន្ត្រីក្រសួងសាធារណការនិងដឹកជញ្ជូនលោក ស៊ុន ចាន់ថុល ប្តេជ្ញាថា នឹងពង្រីកសាលាបង្រៀនបើកបររថយន្តធុនធ្ងន់ដើម្បីកាត់បន្ថយគ្រោះថ្នាក់ចរាចរណ៍ ក្រោយពេលមន្ត្រីជំនាញប្រើពេលតែ២ថ្ងៃរកឃើញថា មានអ្នកបើកបររថយន្តធុនធ្ងន់ដល់ទៅ៣៤%គ្មានប័ណ្ណបើកបរ។
លោក ស៊ុន ចាន់ថុល ក្នុងពិធីពិធីសម្ពោធបើកឲ្យប្រើប្រាស់ ចំណតផែកុងតឺន័រ LM17 នៃគម្រោងពង្រីកហេដ្ឋារចនាសម្ព័ន្ធរបស់កំពង់ផែស្វយ័តភ្នំពេញនៅថ្ងៃសុក្រនេះ ថ្លែងថា គណៈកម្មាធិការជាតិសុវត្ថិភាពចរាចរណ៍ផ្លូវគោក ប្រើពេលតែ២ថ្ងៃ រកឃើញថាអ្នកបើកបររថយន្តធុនធ្ងន់៣៤%គ្មានប័ណ្ណបើកបរ ។
លោកថា៖ «នៅថ្ងៃទី៥និងទី៦ ខែតុលា គណៈកម្មាធិការជាតិសុវត្ថិភាពចរាចរណ៍ផ្លូវគោក បានត្រួតពិនិត្យអ្នកបើកបើឡានធំៗ ដើម្បីចង់ដឹងថា អ្នកបើកបរបានគោរពច្បាប់ត្រឹមត្រូវឬអត់។ ថ្ងៃនេះ ខ្ញុំព្រះករុណា សូមរាយការណ៍ថា ២ថ្ងៃហ្នឹង រកឃើញមានអ្នកបើកបរឡានធំៗហ្នឹង ២៤%គ្មានប័ណ្ណបើកបរត្រឹមត្រូវទេ និង១០%ទៀត ប្រើប័ណ្ណក្លែងក្លាយ ឬគ្មានប័ណ្ណបើកបរ។ អញ្ចឹង ៣៤%ព្រះអង្គ គ្មានប័ណ្ណបើកបរ»។
លោក ស៊ុន ចាន់ថុល អះអាងថាមូលហេតុនេះ មកពីខ្វះសាលាបង្រៀនបើកបររថយន្តធុនធ្ងន់ ។ លោកថា ក្រសួងនឹងអន្តរាគមន៍ឲ្យពង្រីកសាលាបង្រៀនបើកបរប្រភេទធុនធ្ងន់នេះ។
តាមរបាយការណ៍របស់ក្រសួងសាធារណការនិងដឹកជញ្ជូន គិតត្រឹមខែតុលា ឆ្នាំ២០១៨ រថយន្តធុនធ្ងន់២៣០ ០០០គ្រឿង បានមកចុះបញ្ជី។ ក្នុងចំណោមនោះ ២៥ភាគរយ មានប័ណ្ណបើកបរប្រភេទរថយន្តធុនធំត្រឹមត្រូវ ២៥ភាគរយទៀត មិនមានប័ណ្ណបើកបរតាមប្រភេទរថយន្ត និង១០ភាគរយ មានប័ណ្ណបើកបរក្លែងក្លាយ ឬ គ្មានប័ណ្ណបើកបរ។
របាយការណ៍របស់នគរបាលជាតិ បង្ហាញថា ឆ្នាំ២០១៧ មានមនុស្សជិត ២០០នាក់ ស្មើនឹង ១០ភាគរយនៃអ្នកដែលបានស្លាប់ ដោយគ្រោះថ្នាក់ចរាចរណ៍ផ្លូវគោក បង្កឡើងដោយអ្នកបើកបររថយន្តធុនធំ៕
