រដ្ឋមន្ត្រីក្រសួងមហាផ្ទៃលើកឡើងថា ប្រសិទ្ធិផលការងារទាបនៅថ្នាក់ក្រុង ស្រុក និងខណ្ឌ មិនមែនមកពីមន្ត្រីទេគឺមកពីកត្តាដឹកនាំ ដែលត្រូវធ្វើកំណែទម្រង់បន្ថែមទៀត។
នៅក្នុងពិធីចូលកាន់តំណែងរបស់អភិបាលខេត្តសៀមរាប កាលពីថ្ងៃសុក្រម្សិលមិញ លោក ស ខេង ថ្លែងថា បច្ចុប្បន្នការធ្វើកំណែទម្រង់ថ្នាក់ឃុំ សង្កាត់ទទួលបានផលល្អហើយ។ លោក បន្តថា កំណែទម្រង់បន្តទៀតនៅពេលនេះគឺថ្នាក់ស្រុក ក្រុង និង ខណ្ឌ។
លោក ស ខេង៖ «ពិសេសស្រុក និងក្រុងនេះ បើយើងទុកដូចសព្វថ្ងៃ ស្រុកគឺវាខាត បានន័យថាខាតត្រង់ថា យើងចំណាយថវិកាច្រើន ទៅលើបុគ្គលិក ប្រាក់ខែអីណឹង ប៉ុន្តែប្រសិទ្ធផលការងារវាមិនសូវមាន។»
លោក ស ខេង បញ្ជាក់ថា ប្រសិទ្ធិផលការងារទាបនេះមិនមែនមកពីមន្ត្រីទេ គឺមកពី កត្តាដឹកនាំ។
លោក ស ខេង៖ «អត់សូវមានចឹងវាមកពីមន្រ្តីណឹង មិនមែនទេ មិនមែនមកពីមន្រ្តីនោះទេ តែគឺមកពីកត្តាដឹកនាំ មកពីការកែទំរង់របស់យើងមិនទាន់ល្អ ចឹងហើយបានយើងត្រូវកែរចនាសម័្ពន្ធថ្នាក់ស្រុកឡើងវិញដើម្បីធ្វើអោយស្រុកខ្លាំង។ »
ក្នុងឱកាសនោះលោក ស ខេង ក៏បានលើកឡើងពីវិធានការមួយ ចំនួនរបស់ក្រសួង ការចាត់ចែងថវិកា ផ្តល់អំណាច និងប្រព័ន្ធវាយតម្លៃលើសមត្ថភាព របស់មន្ត្រីដោយតម្លភាព ក្នុងការឲ្យកាន់តំណែងណាមួយ ដើម្បីធានាដល់ប្រសិទ្ធិភាពការងារ។