រដ្ឋមន្ត្រីក្រសួងមហាផ្ទៃលោក ស ខេង អះអាងប្រាប់តំណាងសភាបារាំងថា កម្ពុជាមិនអាចងាកចេញពីមាគ៌ាប្រជាធិបតេយ្យសេរីពហុបក្សបានឡើយ ដោយថា មាគ៌ានេះបាននាំកម្ពុជាទៅរកសុខសន្តិភាព។
អនុប្រធានសភាបារាំង លោក ស៊ីលវាំង វ៉ាសីម៉ង់ (SylvainWAERMAN) ដឹកនាំគណៈប្រតិភូរបស់ខ្លួនចូលជួបលោក ស ខេង នៅក្រសួងមហាផ្ទៃ នាថ្ងៃទី១៨ ខែធ្នូនេះ។
តាមការសរសេរលើទំព័រហ្វេសប៊ុករបស់ លោក ស ខេង ភាគីបារាំង បង្ហាញពីបំណងចង់ពង្រឹងកិច្ចសហប្រតិបត្តិការក្នុងក្របខណ្ឌនៃគណៈកម្មាធិការកិច្ចការបរទេសរបស់សភាសាធារណរដ្ឋបារាំង និងគណៈកម្មាធិការកិច្ចការបរទេសរបស់សភានៃព្រះរាជាណាចក្រកម្ពុជា។
លោក ស ខេង សរសេរបន្តជាការឆ្លើយតប លោកបញ្ជាក់ថា៖ «ចំពោះកម្ពុជា ទោះនៅក្នុងស្ថានការណ៍ណាក៏ដោយ ផ្អែកទៅលើប្រវត្តិសាស្ត្រជាច្រើនឆ្នាំរបស់កម្ពុជាគឺកម្ពុជានៅតែ បន្តអនុវត្តនិងដើរតាមមាគ៌ាលទ្ធិប្រជាធិបតេយ្យសេរីពហុបក្ស ព្រោះនេះជាមាគ៌ានយោបាយមួយដែលនាំទៅដល់សុខសន្តិភាពនៅកម្ពុជា គឺកម្ពុជាមិនអាចងាករេពីមាគ៌ានយោបាយនេះបានឡើយ»។
គណៈប្រតិភូសភាបារាំងថ្ងៃចន្ទម្សិលមិញនេះ ក៏បានចូលជួបតំណាងសភាកម្ពុជាដែរ។ បើតាមប្រធានគណៈកម្មការបរទេសសហប្រតិបត្តិការអន្តរជាតិ ឃោសនាការនិងព័ត៌មាន លោក ឈាង វុនបារាំងបង្ហាញពីការព្រួយបារម្ភខ្លាចកម្ពុជាបាត់បង់ប្រព័ន្ធអនុគ្រោះពន្ធ EBA បើសភាកម្ពុជាមិនអាចជំរុញឲ្យកែប្រែច្បាប់មួយចំនួនធានាពីដំណើរការប្រជាធិបតេយ្យនៅកម្ពុជាតបតាមលក្ខខណ្ឌរបស់សហភាពអឺរ៉ុបនោះ។
អនុប្រធានរដ្ឋសភាបារាំង លោក Sylvain WAERMAN មកបំពេញទស្សនកិច្ចជាផ្លូវការនៅកម្ពុជា រយៈពេល៦ថ្ងៃ ចាប់ពីថ្ងៃទី១៥ ដល់ទី២០ ខែធ្នូ ឆ្នាំ២០១៨ ។បើតាមសេចក្តីប្រកាសរបស់រដ្ឋសភាកម្ពុជា ដំណើរទស្សនកិច្ច របស់មន្ត្រីជាន់ខ្ពស់សភាបារាំងនេះ ជួមមន្ត្រីជាន់ខ្ពស់មួយចំនួនរបស់រដ្ឋាភិបាលកម្ពុជា ដើម្បីរឹតចំណងមិត្តភាព និងកិច្ចសហប្រតិបត្តិការរវាងទំនាក់ទំនងស្ថាប័ននីតិប្បញ្ញត្តិកម្ពុជានិងបារាំង៕