ប្រធានរដ្ឋសភា និងជាប្រធានកិត្តិយសគណបក្សប្រជាជនកម្ពុជា លោក ហេង សំរិន បានរំឭកសមាជិកបក្សឲ្យពង្រឹងប្រជាធិបតេយ្យផ្ទៃក្នុង ទើបអាចជំរុញការគ្រប់គ្រងប្រទេសប្រកបដោយភាពខ្លាំងក្លាបាន។
គណបក្សប្រជាជនកម្ពុជា ធ្វើសន្និបាតរយៈពេល៣ថ្ងៃ ចាប់ពីថ្ងៃទី១៨នេះ ដល់ថ្ងៃទី២០ ខែធ្នូ ដែលធ្វើឡើងនៅមជ្ឈមណ្ឌលពិពណ៌កោះពេជ្យ ក្នុងរាជធានីភ្នំពេញ។ ក្នុងពិធីនេះ លោក ហេងសំរិន បានថា ការបោះឆ្នោតជ្រើសតាំងតំណាងរាស្ត្រអាណត្តិទី៦នេះ ដំណើរការទៅដោយ សេរី ត្រឹមត្រូវ និងយុត្តិធម៌ មានពលរដ្ឋជាង៨៣ភាគរយចេញទៅបោះឆ្នោត រហូតគណបក្សប្រជាជនទទួលបានអាសនៈទាំងអស់ចំនួន១២៥ក្នុងសភា។
មេដឹកនាំរូបនេះ អះអាងទៀតថា សំឡេងឆ្នោតនេះបញ្ជាក់ថា ប្រជាពលរដ្ឋបានដាក់ក្តីសង្ឃឹម និងប្រគល់ជូនគណបក្សប្រជាជនកម្ពុជាមួយគត់ឲ្យបន្តដឹកនាំប្រទេស។
លោក ហេង សំរិន បានរំឭកថា៖ «ដូចនេះគណបក្សត្រូវពង្រឹងពង្រីកប្រជាធិបតេយ្យផ្ទៃក្នុងគណបក្សឲ្យកាន់តែខ្លាំងក្លាបំផុត ដើម្បីប្រមូលផ្តុំនូវបញ្ញាញាណដ៏ភ្លឺស្វាងរបស់សមូហភាពសម្រាប់ការដឹកនាំគ្រប់គ្រងប្រទេស»។
បក្សកាន់អំណាចបានរំឭកដែរថា នៅប៉ុន្មានឆ្នាំចុងក្រោយនេះ សភាពការណ៍ក្នុងប្រទេស និងអន្តរជាតិមានការវិវឌ្ឍយ៉ាងឆាប់រហ័ស និងស្មុគស្មាញ ទាមទារឲ្យគណបក្សត្រូវតាមដាននិងធ្វើការសម្រេចចិត្តខាងនយោបាយ ដោយប្រុងប្រយ័ត្នបំផុត ដើម្បីរក្សាការពារនូវដំណើរសុខសន្តិភាព ស្ថិរភាព ប្រជាធិបតេយ្យ បូរណភាពទឹកដី អធិបតេយ្យ ឯករាជ្យ និងការអភិវឌ្ឍសង្គមកម្ពុជា៕
