អាជ្ញាធរខេត្តបាត់ដំបងបានចាប់ផ្សឹកព្រះសង្ឃមួយអង្គ ក្រោយពីរកឃើញថា លាក់ទុកអាវុធខុសច្បាប់នៅក្នុងអាស្រមនិងប្រើប្រាស់សារធាតុញៀន។
ស្នងការរងនគរបាលខេត្តបាត់ដំបង លោក ជេត វណ្ណនី បានប្រាប់ វីអូឌី នៅថ្ងៃនេះ ឲ្យដឹងថា កម្លាំងនគរបាលខេត្តបាត់ដំបង និងមន្រ្តីធម្មការ និងសាសនាស្រុកកំរៀង កាលពីថ្ងៃទី១៨ ខែធ្នូ ឆ្នាំ២០១៨ បានចុះឆែកឆេរអាស្រមរបស់សង្ឃមូយអង្គនាម ហ៊ុន អង នៅជើងភ្នំនៃក្នុងស្រុកកំរៀង ខេត្តបាត់ដំបង បន្ទាប់ពីបានទទួលបណ្តឹងពីប្រជាជនរស់នៅក្បែរនោះ ពីភាពមិនប្រក្រតីរបស់សង្ឃអង្គនេះ។
លោក ជេត វណ្ណនី បានមានប្រសាសន៍ថា បន្ទាប់ពីទទួលបានបណ្តឹងពីប្រជាពលរដ្ឋ កម្លាំងនគរបាលបានធ្វើការស៊ើបអង្កេត និងឈានដល់ការឆែកអាស្រម។ លោកថា កម្លាំងរបស់លោកបានរកឃើញកាំភ្លើងខ្លីមួយដើម កាំភ្លើងវែងកែច្នៃមួយដើម ព្រមទាំងគ្រាប់មួយចំនួន ខ្នោះដៃមួយគូរ វិទ្យុទាក់ទងមួយ និងដាវមួយ។ នគរបាលក៏បានធ្វើតេស្តទឹកនោម ហើយរកឃើញថា សង្ឃអង្គនេះបានប្រើប្រាស់សារធាតុញៀន។
ក្រោយពីការឃាត់ខ្លួន កម្លាំងនគរបាលបានបញ្ជូនសង្ឃអង្គនេះទៅការិយាល័យធម្មការស្រុកដើម្បីធ្វើការផ្សឹក។
លោក ជេត វណ្ណនី បានបន្ថែមថា លោកកំពុងរៀបចំឯកសារដើម្បីបញ្ជូនទៅតុលាការ និងចាត់ការតាមផ្លូវច្បាប់។
