មេដឹកនាំសហជីពម្នាក់បានដាក់ពាក្យប្ដឹងជំទាស់ទៅនឹងសេចក្ដីសម្រេចរបស់សាលាដំបូងរាជធានីភ្នំពេញ ដែលបានកាត់ទោសលោកឲ្យជាប់ពន្ធនាគារ ២ឆ្នាំកន្លះ ប៉ុន្តែ ទោសនោះត្រូវបានព្យួរទាក់ទិននឹងព្រឹត្តិការណ៍តវ៉ាមុខសួនឧស្សហកម្មកាណាឌីយ៉ាផ្លូវ វេង ស្រេង កាលពីជាង ៤ឆ្នាំមុន។
កាលពីថ្ងៃទី១១ ខែធ្នូ ឆ្នាំ២០១៨ ចៅក្រមជំនុំជម្រះនៃសាលាដំបូងរាជធានីភ្នំពេញ លោក អ៊ឹម វណ្ណ: បានសម្រេចកាត់ទោសមេដឹកនាំសហជីព៦នាក់ មានលោក អាត់ ធន់ លោកស្រី ម៉ម ញឹម លោក ប៉ាវ ស៊ីណា លោក ជា មុនី លោក រ៉ុង ឈុន និងលោកស្រី យ៉ាង សោភ័ណ្ឌ ឲ្យជាប់ទោស ២ឆ្នាំ ៦ខែ ប៉ុន្តែ ទោសនោះត្រូវបានព្យួរ។ ប៉ុន្តែ ចៅក្រមបានបង្គាប់ឲ្យអ្នកទាំងនោះសងជំងឺចិត្តទៅជនរងគ្រោះជាសមត្ថកិច្ច ២នាក់ចំនួន ៣៥លានរៀល។
ប្រធានសហភាពការងារកម្ពុជាលោក អាត់ ធន់ ពុំបានទទួលយកសេចក្ដីសម្រេចនេះទេ ហើយបានដាក់ពាក្យបណ្ដឹងទៅសាលាឧទ្ធរណ៍កាលពីថ្ងៃទី១២ ខែធ្នូ ឆ្នាំ២០១៨ បន្ទាប់ពីចៅសាលាដំបូងរាជធានីភ្នំពេញ បានកាត់ទោសលោកឲ្យជាប់ពន្ធនាគារ២ឆ្នាំកន្លះ ប៉ុន្តែ ទោសនោះត្រូវបានព្យួរ។
ក្រោយតុលាការសម្រេចបានមួយថ្ងៃ លោកនាយករដ្ឋមន្ត្រី ហ៊ុន សែន បានចេញមុខអះអាងថា មេដឹកនាំសហជីព ៣រូប មានលោក អាត់ ធន់ លោក ជា មុន្នី និងលោក ប៉ាវ ស៊ីណា មិនបានដឹកនាំតវ៉ានៅផ្លូវវេងស្រេង ដូចសាលក្រមចោទប្រកាន់របស់សាលាដំបូងរាជធានីភ្នំពេញនោះទេ។
កាលពីថ្ងៃទី៣ ខែមករា ឆ្នាំ២០១៤ មានព្រឹត្តិការណ៍ប៉ះទង្គិចបង្ហូរឈាមមួយនៅលើផ្លូវវេងស្រេងក្នុងរាជធានីភ្នំពេញ រវាងក្រុមកម្មករនិងសមត្ថកិច្ច។ ព្រឹត្តិការណ៍នោះ កម្មករដែលទាមទារតម្លើងប្រាក់ឈ្នួលយ៉ាងតិច ៤នាក់ត្រូវកងកម្លាំងប្រដាប់អាវុធបាញ់ឲ្យស្លាប់នៅនឹងកន្លែង ម្នាក់បាត់ខ្លួន មួយចំនួនទៀតរងរបួស និងខ្លះទៀតត្រូវបានចាប់ខ្លួន។
ក្រោយការប៉ះទង្គិចនោះ មេដឹកនាំសហជីពទាំង៦នាក់ រងការចោទថា បានផ្តើមគំនិតក្នុងអំពើហិង្សាដោយចេតនា មានស្ថានទម្ងន់ទោសដែលតុលាការចោទថា បានប្រព្រឹត្តនៅចំណុចមុខសួនឧស្សាហកម្មកាណាឌីយ៉ា ផ្លូវ វេង ស្រេង ក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ កាលពីអំឡុងថ្ងៃទី២៥ ខែធ្នូ ឆ្នាំ២០១៣ រហូតដល់ ថ្ងៃទី០៣ ខែមករា ឆ្នាំ ២០១៤៕