ប្រធានសហភាពសហជីពកម្ពុជា លោក រ៉ុង ឈុន បានផ្ញើលិខិតមួយទៅអង្គការពលកម្មអន្ដរជាតិ (ILO) ឲ្យជួយអន្ដរាគមន៍ដោះលែងមេដឹកនាំសហជីពដែលត្រូវបានសមត្ថកិច្ចរដ្ឋាភិបាលកម្ពុជាចាប់ខ្លួន និងចោទប្រកាន់ថា បានចូលរួមផលិតវីដេអូមិនពិតធ្វើឲ្យប៉ះពាល់ដល់កិត្តិយសប្រទេសកម្ពុជា។
ក្នុងលិខិតមួយចេញផ្សាយនៅថ្ងៃនេះ លោក រ៉ុង ឈុន អះអាងថា ប្រធានសហព័ន្ធសហជីពកម្មករសំណង់កម្ពុជា លោក រ៉ាត់ រត្នមុនី បានបំពេញតួនាទីត្រឹមតែជាអ្នកបកប្រែនិងសម្របសម្រួលឲ្យអ្នកសារព័ត៌មានបរទេស អាចធ្វើការសម្ភាសន៍និងផ្ដិតយករូបភាពនៃជីវិតជនរងគ្រោះដោយសារអំពើជួញដូរមនុស្សក្នុងប្រទេសកម្ពុជាប៉ុណ្ណោះសម្រាប់ការផលិតវីដេអូឯកសារ «ម្ដាយខ្ញុំលក់ខ្ញុំ» របស់សារព័ត៌មានរុស្ស៊ី RussianToday(RT)។
ក្នុងលិខិតនេះ លោក រ៉ុង ឈុន ស្នើឲ្យអគ្គនាយកអង្គការពលកម្មអន្ដរជាតិ លោក Guy Ryder ជួយអន្ដរាគមន៍ចំពោះករណីនេះ បន្ទាប់ពីស្ថានទូតរុស្ស៊ីប្រចាំកម្ពុជាមិនបានចេញមកទទួលញត្តិរបស់ភរិយា លោក រ៉ាត់ រត្នមុនី ហើយរដ្ឋាភិបាលកម្ពុជាបានចោទប្រកាន់ថា វីដេអូឯកសារនេះគឺជារឿងប្រឌិតឡើង និងមានការសូកប៉ាន់ប្រភពក្នុងវីដេអូឯកសារនេះ។
កាលពីខែតុលាកន្លងទៅ សារព័ត៌មានរុស្ស៊ី RT បានចេញផ្សាយនូវវីដេអូឯកសារ «ម្ដាយខ្ញុំលក់ខ្ញុំ» ដែលវីដេអូឯកសារនេះ និយាយអំពីស្រ្តីខ្មែរលក់កូនស្រីខ្លួនឯង ដោយសារតែជួបបញ្ហាជីវភាព និងនិយាយពីស្ថានភាពស្រ្តីដែលប្រកបរបររកស៊ីផ្លូវភេទនៅកម្ពុជា។
ក្រោយមានការផ្សព្វផ្សាយនេះ សមត្ថកិច្ចកម្ពុជាបានបកស្រាយថា វីដេអូនេះ ជារឿងប្រឌិតឡើង ដែលធ្វើឲ្យប៉ះពាល់កិត្តិយសប្រទេសកម្ពុជា ហើយក្រោយមកបានបើកការស៊ើបអង្កេតរកអ្នកជាប់ពាក់ព័ន្ធ ដែលឈានដល់ការចាប់ឃុំខ្លួនលោក រ៉ាត់ រត្នមុនី កាលពីថ្ងៃទី៧ ខែធ្នូ នៅប្រទេសថៃ។
បច្ចុប្បន្ន អ្នកផលិតវីដេអូឯកសារ លោក រ៉ាត់ រត្នមុនី ត្រូវបានសាលាដំបូងរាជធានភ្នំពេញសម្រេចចោទប្រកាន់ពីបទ «ញុះញង់ឲ្យមានការរើសអើង» តាមមាត្រា៤៩៦នៃក្រមព្រហ្មទណ្ឌ និងបញ្ជូនទៅឃុំខ្លួននៅពន្ធនាគារព្រៃស។
ប្រសិនបើលោកត្រូវបានរកឃើញថាមានកំហុស មេដឹកនាំសហជីពរូបនេះ អាចនឹងត្រូវជាប់ទោសក្នុងពន្ធនាគារក្នុងរយៈពេលពី ១ ទៅ ៣ឆ្នាំ៕
