សមាជិកឧត្តមក្រុមប្រឹក្សាពិគ្រោះ និងផ្តល់យោបល់ ដែលកើតចេញពីគណបក្សនយោបាយមួយក្រុមដែលមិនជាប់ ឆ្នោតបានអះអាងថា រយៈពេល៤ខែមកនេះពួកគាត់បានចូលរួមចំណែកជំរុញឲ្យមានដំណោះស្រាយជម្លោះដីធ្លី ទប់ស្កាត់ការរំលោភយកដីរដ្ឋ និងមានគម្រោងទប់ស្កាត់អំពើពុករលួយនិងកំណែទម្រង់ប្រព័ន្ធយុត្តិធម៌ជាដើម។
នៅអាណត្តិទី៦នេះមេដឹកនាំបក្សកាន់អំណាចនិងគណបក្សមិនបានឈ្នះឆ្នោតចំនួន១៥ផ្សេងទៀត បានរួមគ្នាបង្កើតឧត្តមក្រុមប្រឹក្សាពិគ្រោះ និងផ្តល់យោបល់ដែលមានសមាជិក៣០រូប។
ប្រធានគណបក្សយុវជនកម្ពុជា លោក ពេជ្រ ស្រស់ មានប្រសាសន៍ថា ក្រោយពីបានចូលទៅកាន់តំណែងជាសមាជិកឧត្តមក្រុមប្រឹក្សាពិគ្រោះនិងផ្តល់យោបល់រយៈ៤ខែមកនេះ លោកបានជំរុញឲ្យមានដំណោះស្រាយបញ្ហាដីធ្លីនៅខេត្តសៀមរាប និងខេត្តកណ្តាលរួមទាំងចូលរួមទប់ស្កាត់ការចាក់ដីរំលោភឆ្នេរសមុទ្រពីសំណាក់ក្រុមហ៊ុននៅខេត្តព្រះសីហនុ។
លោកថា៖
«ខេត្តសៀមរាមពាក់ព័ន្ធនឹងការចេញប្លង់កម្មសិទ្ធិជូនពលរដ្ឋដោយមិនមានចេតនាចេញប្លង់ឲ្យពួកគាត់ ដោយលើកហេតុផលពាក់ព័ន្ធនេះពាក់ព័ន្ធនោះផ្ទុយពីអនុក្រឹត្យរបស់នាយករដ្ឋមន្ត្រី»។
លោក ពេជ្រ ស្រស់ អះអាងថា គ្រោងនឹងស្វែងរកឯកសារនឹងភស្តុតាងមួយចំនួនដើម្បីប្រាប់ទៅរដ្ឋាភិបាលនូវអ្វីដែលលោកថាដើម្បីចូលរួមទប់ស្កាត់អំពើពុករលួយជាប្រព័ន្ធតាមស្ថាប័ននីមួយៗរបស់រដ្ឋ។
ប្រធានគណបក្សខ្មែរក្រោកនិងជាសមាជិកឧត្តមក្រុមប្រឹក្សានិងពិគ្រោះយោបលម្នាក់ទៀត គឺលោក សុវណ្ណ វឌ្ឍនាសាប៊ុន បានអះអាងថា ជម្លោះដីធ្លីនៅខេត្តសៀមរាមនោះ ជាប់ពាក់ព័ន្ធជាអភិបាលខេត្ត លោក ឃឹម ប៊ុនសុង ។លោកថា ក្រោយពីរកឃើញបញ្ហា ក្រុមការងារបានស្នើរដ្ឋាភិបាល បញ្ចប់តួនាទីអភិបាលខេត្តរូបនេះ។
លោកថា៖
«យើងឃើញអាបញ្ហាហ្នឹងវាជាប់ពាក់ព័ន្ធនឹងអភិបាលខេត្តសៀមរាបចំពោះឆន្ទានុសិទ្ធិគេដករឿងអ្វីយើងអត់ដឹងទេ ប៉ុន្តែយើងឃើញបញ្ហាហ្នឹងយើងក៏បានស្នើរសុំឲ្យបញ្ចប់មុខងារគាត់[ឃឹម ប៊ុនសុង ]»។
លោក សុវណ្ណ វឌ្ឍនាសាប៊ុន អះអាងទៀតថា ជាជំហានបន្ទាប់ លោកនឹង ស្នើឲ្យរដ្ឋាភិបាលពិនិត្យមើលពីអន្តោប្រទេសខុសច្បាប់។លោកអះអាងថា ក៏គ្រោងជូនដំណឹងទៅរដ្ឋាភិបាលឲ្យហៅរដ្ឋមន្ត្រីក្រសួងយុត្តិធម៌មកសួរដេញដោលផងដែរ ដើម្បីចូលរួមចំណែកកែទម្រង់ប្រព័ន្ធយុត្តិធម៌។
ប្រធានគណបក្សសំបុកឃ្មុំសង្គមប្រជាធិបតេយ្យ លោកម៉មសូណង់ដូមានប្រសាសន៍ថាអំឡុង៤ដែលលោកចូលកាន់តំណែងជាសមាជិកឧត្តមក្រុមប្រឹក្សាពិគ្រោះនិងផ្តល់យោបល់នេះលោក បានប្រាប់ទៅរដ្ឋាភិបាលពីបញ្ហាជម្លោះដីធ្លីមួយកន្លែងខេត្តកំពង់ស្ពឺ និងស្នើឲ្យទប់ស្កាត់អំពើពុករលួយជាប្រព័ន្ធនៅក្នុងវិស័យជលផលផងដែរ។
ប៉ុន្តែមេដឹកនាំគណបក្សមិនជាប់ឆ្នោតមួយនេះ អះអាងថាមកដល់ពេលនេះមិនទាន់មានចំណាត់ការណាមួយពីរដ្ឋាភិបាលទេ។
នាយកប្រតិបត្តិមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាព លោក យង់ គិមអេង មានប្រសាសន៍ថា មកដល់ពេលនេះគេនៅមិនទាន់ដឹងថា តើឧត្តមក្រុមប្រឹក្សាពិគ្រោះនិងផ្តល់យោបល់មួយនេះ មានសិទ្ធិអំណាច អាចតម្រង់ទិសរដ្ឋាភិបាលបានកម្រិតណានៅឡើយទេ។
លោក យង់ គិមអេង ផ្តល់ជាយោបលថា ដើមចមដែលបង្កជាបញ្ហាសង្គមនោះ គឺក្រុមការងារមួយនេះ ត្រូវស្វែងរកឲ្យឃើញពីការប្រកួតប្រជែងមិនស្មើភាពគ្នារបស់ក្រុមហ៊ុនឯកជនក្នុងស្រុកសេរីភាពអង្គការមិនមែនរដ្ឋាភិបាលសហជីពសិទ្ធិធ្វើនយោបាយនិងយុត្តិធម៌សង្គមជាដើម។លោក យង់ គិមអេង បន្តថា បើសិទ្ធិជាមូលដ្ឋានត្រូវបានរំលោភបំពាន ហើយច្បាប់មិនអាចរកយុត្តិបានពេលនោះបញ្ហាសង្គមនឹងកើតឡើងគ្មានថ្ងៃបញ្ចប់។
មួយវិញទៀត មន្ត្រីសង្គមស៊ីវិលរូបនេះ រំឭកថាសមាជិកឧត្តមក្រុមប្រឹក្សាពិគ្រោះនិងផ្តល់យោបល់នេះ ត្រូវបានតែងតាំងឲ្យមានឋានៈខ្ពស់ៗដូចមន្ត្រីរដ្ឋាភិបាលដែរ ដូចនេះពួកគាត់ទទួលបានប្រាក់ខែ ដែលបានពីកម្លាំងញើសឈាមរបស់ពលរដ្ឋដែលបានបង់ពន្ធទាំងផ្ទាល់និងប្រយោល។លោកថា បើការងារពួកគាត់មិនអាចជួយធ្វើកំណែទម្រង់សង្គមបាន ពលរដ្ឋដែលបានបង់ពន្ធនឹងស្តីបន្ទោសនៅថ្ងៃណាមួយ។
លោកថា៖
«ទោះបីយើងចាក់សាំងមួយលីត្រក៏បង់ពន្ធដែរអញ្ចឹងយើងគិតថាចំពោះបញ្ហានេះយើងក៏តាមដានដែរថាតើក្រុមប្រឹក្សានេះធ្វើលទ្ធផលជាផ្លែផ្កាអីខ្លះ?បើអត់បានអីទេវានឹងចោទជាសំនួរហើយថាតើគួតែមានឧត្តមក្រុមប្រឹក្សាបែបនឹងអត់ ?»។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជាលោកសនជ័យមានប្រសាសន៍ថាលោកមិនមានជំនឿថាឧត្តមក្រុមប្រឹក្សាពិគ្រោះនិងផ្តល់យោបល់ ដែលកើតចេញពីបណ្តុំអ្នកនយោបាយគ្មានសំឡេងគាំទ្រពីពលរដ្ឋនេះមានឥទ្ធិពលទៅលើការសម្រេចចិត្តរបស់រដ្ឋាភិបាលនោះទេនៅពេលដែលបក្សកាន់អំណាចពេលនេះគ្រប់គ្រងស្ថាប័នជាតិធំៗទាំងអស់ដូចជារដ្ឋសភាព្រឹទ្ធសភានិងរដ្ឋាភិបាល។
លោកថា៖
«យន្តការខ្លះដែលបានកើតឡើងនៅអាណត្តិទី៦នេះវាគ្រាន់តែជាយន្តការមួយដើម្បីបង្ហាញថា កម្រិតនៃរដ្ឋាភិបាលហ្នឹង ក៏បានបង្កើតច្រកឬក៏ឱកាសឲ្យលេចចេញជារូបភាពប្រជាធិបតេយ្យមួយដែរខណៈពេលដែលការដឹកនាំបែបឯកបក្សបានកើតឡើង»។
អ្នកវិភាគនយោបាយលោក ឯម សុវណ្ណារ៉ា លើកឡើងថា ការប្រមូលគណបក្សនយោបាយដែលមិនឈ្នះមកធ្វើជាប្រឹក្សាពិគ្រោះនិងផ្តល់យោបល់ពេលផាត់បក្សប្រឆាំងចេញពីឆាកនយោបាយនេះ អាចជាសេណារីយ៉ូ របស់បក្សកាន់អំណាចទប់ស្កាត់កុំឲ្យពួកគេរត់ទៅគាំទ្របក្សប្រឆាំងប៉ុណ្ណោះ។
លោក ឯម សុវណ្ណារ៉ា បន្តថា ឧត្តមក្រុមប្រឹក្សាពិគ្រោះនិងផ្តល់យោបល់នេះ គ្មានឥទ្ធិពលទៅលើការសម្រេចិត្តរបស់រដ្ឋាភិបាលទេសូម្បីតែឥទ្ធិពលទៅក្រសួងនានាក៏គ្នាដែរ។ លោកថា ការធ្វើកំណែទម្រង់ពិតប្រាកដស្ថិតនៅលើការសម្រេចចិត្តរបស់នាយករដ្ឋមន្ត្រីតែម្នាក់គត់។
លោកនាយករដ្ឋមន្ត្រី ហ៊ុន សែន បានអះអាង កាលពីខែសីហាកន្លងទៅថាការបង្កើតឧត្តមក្រុមប្រឹក្សាពិគ្រោះនិងផ្តល់យោបល់ ជាយន្តការចូលរួមឆ្លើយតបនិងបម្រើផលប្រយោជន៍ប្រជាពលរដ្ឋ។លោកថាសមាជិកឧត្តមក្រុមប្រឹក្សាពិគ្រោះ និងផ្តល់យោបល់នេះ មានភារៈកិច្ចផ្តួតផ្តើមគំនិត ឬផ្តល់មតិទៅលើការរៀបចំគោលនយោបាយ ដល់រាជរដ្ឋាភិបាល លើសេចក្តីព្រាងច្បាប់របស់រដ្ឋាភិបាល មុនគណៈរដ្ឋមន្ត្រីអនុម័ត។បើតាមព្រះក្រឹត្រចុះថ្ងៃទី៦សីហាឆ្នាំ២០១៨សមាជិកឧត្តមក្រុមប្រឹក្សានេះមាន លោក ឯក សំអុល លោក ញឹក ប៊ុនឆៃ លោក គង់ មូលីកា លោក ម៉ម សូណង់ដូ លោក ពេជ្រ ស្រស់ និងលោកសុវណ្ណវឌ្ឍនាសាប៊ុនជាដើម៕
