នាយិកាអង្គការកសិកម្មមួយឈ្មោះCEDACលើកឡើងថា តម្រូវការបន្លែសរីរាង្គឬបន្លែ គ្មានសារធាតុគីមី មានការកើនឡើងច្រើនតម្រូវឲ្យកសិករបន្ថែមការផលិតដើម្បីអាចផ្គត់ ផ្គង់ឲ្យបានគ្រប់គ្រាន់។
នៅក្នុងសិក្ខាសាលាមួយកាលពីថ្ងៃទី១៨ខែធ្នូនាយិកាមជ្ឈមណ្ឌលសិក្សានិងអភិវឌ្ឍន៍កសិកម្មកម្ពុជា ឬ ហៅCEDACលោកស្រីតុង ចាន់ធាង ប្រាប់VODថា ការផលិតបន្លែសរីរាង្គរបស់កសិករគឺនៅមានកំរិតតិចតួចនៅឡើយ ដែលត្រូវបង្កើនការផលិតបន្ថែមទៀតដើម្បីផ្គត់ផ្គង់ទីផ្សារបច្ចុប្បន្ន។
អ្នកស្រីបន្តថា បើប្រៀបធៀបទៅប្រមាណជា១០ឆ្នាំមុនទីផ្សារសរីរាង្គមានតិចតួច តែបច្ចុប្បន្នមានការកើនឡើងជាពិសេសចំនួនផ្សារ និងហាងបន្លែសរីរាង្គ។
នៅក្នុងសិក្ខាសាលានោះកសិករមកពីតាមបណ្តាខេត្តលើកឡើងពីការខិតខំ និងបញ្ហា ប្រឈមរបស់ពួកគាត់ក្នុងការដាំដុះបន្លែសរីរាង្គ។
លោក អឹម សារ៉ាត់ កសិករមកពីសហគមន៍មួយនៅខេត្តកំពង់ឆ្នាំង លើកឡើងថា លោកចាប់ផ្តើមដាំបន្លែសរីរាង្គកាលពីឆ្នាំ២០១៧ ក្រោយពេលទទួលបានការ បណ្តុះ បណ្តាលពីអង្គការCEDAC។ លោកបន្តថា ចំពោះបញ្ហាដែលធ្វើឲ្យលោក ដាំបន្លែសរីរាង្គ មិនបានផលច្រើនគឺ ខ្វះទឹក និងមានសត្វល្អិតបំផ្លាញ។
លោកស្រី មុំ សំអឿន កសិករមកពីសហគមន៍កាហែង ខេត្តកំពង់ស្ពឺ ក៏លើកឡើងថា សត្វល្អិតកំពុងរំខានការដាំដុះរបស់ពួកគាត់តាមបែបសរីរាង្គដែរ។
អនុប្រធាននាយកដ្ឋានសាកវប្បកម្មនិងដំណាំរួមផ្សំនៃក្រសួងកសិកម្ម លោក ហ៊ាន សុភា មានប្រសាសន៍ថា នៅពាក់កណ្តាលឆ្នាំ២០១៩ក្រសួងកំណត់ច្បាស់លាស់ពីប្រភេទ បន្លែ សរីរាង្គ។ លោកថា បន្ទាប់មកទៀតក្រសួងនិងចាត់ក្រុម ការងារជួយពង្រឹងសមត្ថភាព កសិករដែលមានបំណងដាំបន្លែប្រភេទនេះ។
រដ្ឋមន្ត្រីក្រសួងកសិកម្ម រុក្ខាប្រមាញ់ និង នេសាទ លោក វេង សាខុន ថ្លែងក្នុងពិធី ពិពណ៌ផ្សារណាត់បន្លែសុវត្ថិភាពនិងផលិតផលសុវត្ថិភាព កាលពីថ្ងៃទី៤ខែកក្កដា ក្នុងខេត្ត កំពង់ចាមបច្ចុប្បន្នកម្ពុជានាំចូលបន្លែពីបរទេសពី២០០ ទៅ៤០០តោនក្នុងមួយថ្ងៃ ហើយ គិតជាប្រាក់ត្រូវចំណាយ ពី១៥០ទៅ ២០០លានដុល្លារក្នុង១ឆ្នាំ។
