អគ្គលេខាធិការនៃសហព័ន្ធកីឡាបាល់ទាត់កម្ពុជា បានលើកឡើងថាកីឡាគ្រប់ប្រភេទគ្មាននិន្នាការនយោបាយនោះទេ។
ការលើកឡើងបែបនេះរបស់អគ្គលេខាធិការនៃសហព័ន្ធកីឡាបាល់ទាត់កម្ពុជា ជាការឆ្លើយតប ទៅលោក ប្រ៊ែដ អាដាមស៍ នាយកអង្គការឃ្លាំមើលសិទ្ធិមនុស្សអន្តរជាតិ Human Rights Watch ដែលបានរិះគន់តារាបាល់ទាត់ជប៉ុនលោកកីស៊ូកិ ហុងដាមកធ្វើជាគ្រូបង្វឹកក្រុមជម្រើសជាតិកម្ពុជាក្រោមការគ្រប់គ្រងរបស់លោកសៅ សុខា។
អគ្គលេខាធិការនៃសហព័ន្ធកីឡាបាល់ទាត់កម្ពុជា លោក កែវសារ៉េត បាននិយាយដូច្នេះថា៖
«កីឡា មិនមែនតែបាល់ទាត់ទេ គ្រប់ប្រភេទកីឡាទាំងអស់ដែលលេងនៅក្នុងក្របខ័ណ្ឌជាតិក៏ដោយអន្តរជាតិក៏ដោយ គឺយើងលំនាំទៅតាមគេហៅអន្តរជាតិគេរៀបចំគឺកីឡាគ្មាននិន្នាការនយោបាយទេ។ […]ខ្ញុំបានស្តាប់ដែរសំលេងលោកប្រ៊ែដអាដាមស៍ហ្នឹងដែលគ្នាខ្ញុំបានយកអា linkហ្នឹងមកអានមើលស្តាប់ទៅយើងខ្លាចភាសាអស់ហ្នឹងណាស់ ព្រោះភាសាហ្នឹងបើស្តាប់ទៅហាក់ដូចញែកមានខាងនេះខាងនោះអញ្ចឹង។ម្ល៉ោះហើយវាខុសពីទិសដៅរបស់កីឡា។»
ក្នុងលិខិតចុះថ្ងៃទី៣ ធ្នូ ឆ្នាំ ២០១៨ ហើយបានចេញផ្សាយជាសាធារណៈកាលពីថ្ងៃទី១៦ ធ្នូ នាយកប្រចាំតំបន់អាស៊ីនៃអង្គការឃ្លាំមើលសិទ្ធិមនុស្សអន្តរជាតិ លោក ប្រ៊ែដ អាដាមស៍ បាននិយាយថាគាត់មានការភ្ញាក់ផ្អើលដែលឃើញលោក កីស៊ូកិ ហុងដា និងលោកសៅសុខា ដែលជាមេបញ្ជាការកងរាជអាវុធហត្ថលើផ្ទៃប្រទេសផងដែរ ប្រកាសរួមគ្នាពីការឡើងកាន់តំណែងរបស់កីឡាកររូបនេះជាគ្រូជម្រើសជាតិកម្ពុជា។ លោក ប្រ៊ែដ អាដាមស៍ បានរិះគន់តារាបាល់ទាត់ជប៉ុនរូបនេះ ដែលព្រមធ្វើការ ស្ថិតក្រោមការគ្រប់គ្រងរបស់សៅ សុខា ប្រធានសហព័ន្ធកីឡាបាល់ទាត់កម្ពុជាដែលជាមនុស្សជំនិតរបស់នាយករដ្ឋមន្ត្រីហ៊ុន សែន។
លោក ប្រ៊ែដ អាដាមស៍បានថ្លែងថា៖
«លោកឧត្តមសេនីយ៍សៅសុខាដែលជាមេបញ្ជាការរងនៃអគ្គបញ្ជាការរងកងយោធពលខេមរភូមិន្ទនិងមេបញ្ជាការកងរាជអាវុធហត្ថខែ្មរគឺជាអ្នករំលោភសិទិ្ធមនុស្សដ៏ល្បីល្បាញនិងឧក្រិដ្ឋជនសង្គ្រាម។ កងកម្លាំងរបស់គាត់ បានទទួលខុសត្រូវចំពោះការសម្លាប់ក្រៅប្រព័ន្ធតុលាការការធ្វើទារុណកម្ម ការចាប់ខ្លួនខុសច្បាប់ការវាយប្រហារលើក្រុមអ្នកតវ៉ាអហិង្សានិងការរំលោភបំពានផ្សេងទៀត។»
លោក ប្រ៊ែដ អាដាមស៍ ក៏បានភ្ជាប់នូវឯកសារស្តីកំណត់ត្រាសិទ្ធិមនុស្សរបស់សៅសុខាឲ្យ ទៅលោកកីស៊ូកិ ហុងដា ដោយមានការបកប្រែជាភាសារជប៉ុនផងដែរ។ លោក ប្រ៊ែដ អាដាមស៍ ក៏បានលើកឡើងដែរថាប្រហែលជាលោកកីស៊ូកិ ហុងដា មិនបានដឹងអំពីប្រវត្តិរបស់សៅសុខាទេ មុននឹងយល់ព្រមទទួលតំណែងជាគ្រូបង្វឹកក្រុមជម្រើសជាតិ។
លោក ប្រ៊ែដ អាដាមស៍បាននិយាយថា៖
«ក្នុងនាមជាតារាបាល់ទាត់ល្បីល្បាញពេញពិភពលោកយើងមានការព្រួយបារម្ភអំពីភាពជិតស្និទ្ធរបស់លោកជាមួយអ្នករំលោភសិទ្ធិមនុស្សលំដាប់ពិភពលោក។»
លោក ប្រ៊ែដ អាដាមស៍ក៏បានស្នើរសុំជួបផ្ទាល់ជាមួយលោកកីស៊ូកិ ហុងដាផងដែរដើម្បីពិភាក្សាបន្ថែមក៏ប៉ុន្តែតារាបាល់ទាត់ជប៉ុនរូបនេះមិនបានឆ្លើយតបវិញនោះទេ។
លោក សៅ សុខានិងលោក កីស៊ូកិ ហុងដា មិនអាចទាក់ទងដើម្បីសុំប្រតិកម្មបានទេ។
លោកកីស៊ូកិ ហុងដា អតីតខ្សែបម្រើរបស់ប្រទេសជប៉ុនរូបនេះ បានចុះហត្ថលេខាលើកិច្ចសន្យាកាលពីខែសីហារសំរាប់រយ:ពេលពីរឆ្នាំជាមួយសហព័ន្ធកីឡាបាល់ទាត់កម្ពុជាដើម្បីធ្វើជាគ្រូជម្រើសជាតិកម្ពុជាដោយមិនទទួលប្រាក់បៀវត្ស ប៉ុន្តែសហព័ន្ធនឹងចំណាយសម្រាប់ការធ្វើដំណើរនិងការស្នាក់នៅរបស់គាត់៕
