នាយកប្រតិបត្តិអង្គការខុមហ្វ្រែលហៅការតែងតាំងថ្នាក់ដឹកនាំកងទ័ពជាសមាជិកគណបក្សប្រជាជនកម្ពុជាថា ជាការបំពានច្បាប់ដែលរូបភាពនេះធ្លាប់កើតមានតែនៅក្នុងប្រទេសកាន់ របបកុម្មុយនីស្តនិងរបបយោធា។
លោក គល់ បញ្ញាបានសរសេរនៅលើហ្វេសប៊ុករបស់លោក កាលពីម្សិលមិញថា ការបញ្ជូល មេទ័ពជាថ្នាក់ដឹកនាំបក្សកាន់អំណាចជាការបំពានច្បាប់។
លោក គល់ បញ្ញា៖«វាជាការបំពានធ្ងន់ធ្ងរម្តងហើយម្តងទៀតលើ គោលការណ៍ច្បាប់ទាក់ទិននីតិរដ្ឋ របបប្រជាធិបតេយ្យសេរីពហុបក្សនិងការបោះឆ្នោតត្រឹមត្រូវដែលបញ្ជូលអគ្គមេ បញ្ជាការ មេបញ្ជាការរបស់កងកម្លាំងប្រដាប់អាវុធក្លាយជាមន្ត្រីរបស់គណបក្សនយោបាយដើម្បីធ្វើសកម្មភាពនិងដឹកនាំអង្គការចាត់តាំងកំពូលរបស់គណបក្សនយោបាយ។»
លោកបន្តថា គំរូនេះមាននៅតែក្នុងប្រទេសកាន់របបកុម្មុយនីស្ត ឬ របបដឹកនាំបែបយោធា តែប៉ុណ្ណោះ។
លោក គល់បញ្ញា៖«មានតែ របបនិងបក្សកុម្មុយនីស្ត របបហ្វាសិស និងរបបយោធាទេដែលប្រើកងកម្លាំងប្រដាប់អាវុធដើម្បីធ្វើសកម្មភាពបំរើគណបក្សខ្លួននិងប្រឆាំងគណបក្សផ្សេង។»
ការលើកឡើងបញ្ហានេះ មិនទាន់មានការបកស្រាយយ៉ាងណាពីគណបក្សប្រជាជនកម្ពុជា នោះទេ។
លទ្ធផលនៃសន្និបាតគណៈកម្មាធិការកណ្តាលលើកទី៤១របស់គណបក្សប្រជាជនកម្ពុជាបានសម្រេចបោះឆ្នោតជ្រើសតាំងសមាជិកគណៈកម្មាធិការអចិន្ត្រៃយ៍៧រូបបន្ថែមទៀតក្នុងនោះមេទ័ព៤រូបរួមមាន អគ្គមេបញ្ជាការកងទ័ពលោក វង្ស ពិសេន អគ្គមេបញ្ជាការរង និងជាមេបញ្ជាការកងរាជអាវុធហត្ថលោក សៅ សុខា នាយសេនាធិការចម្រុះកងទ័ព លោក ឥត សារ៉ាត់ និងអគ្គមេបញ្ជាការរង និងជាមេបញ្ជាការកងទ័ពជើងគោក លោក ហ៊ុន ម៉ាណែត។