លោក សម រង្ស៊ី បញ្ជាក់ថា ការដោះលែង និងផ្តល់សេរីភាពពេញលេញដល់លោក កឹម សុខា ប្រធានគណបក្សសង្គ្រោះជាតិគឺជាចំណុចចាប់ផ្តើមពិតប្រាកដក្នុងការដោះស្រាយវិបត្តិនយោបាយនៅពេលនេះ។
ក្នុងលិខិតចំហរបស់លោក សម រង្ស៊ី ធ្វើទៅសហគមន៍អន្តរជាតិកាលពីថ្ងៃសុក្រម្សិលមិញ លោកបានអំពាវនាវឲ្យអន្តរជាតិបន្តតាមដាន និងដាក់សម្ពាធលើរដ្ឋាភិបាលកម្ពុជាដើម្បីជំរុញ ឲ្យ មានដំណោះស្រាយវិបត្តិនយោបាយ។
លោកបញ្ជាក់ថា ដំណោះស្រាយពិតប្រាកដនៅពេលនេះគឺត្រូវចាប់ផ្តើមពីការដោះលែងលោក កឹម សុខា ទើបឈានដល់ការស្វែងរកដំណោះស្រាយលើចំណុចផ្សេងទៀត។
លិខិតសមរង្ស៊ី៖« ហ៊ុន សែន ដឹងច្បាស់ណាស់ថាយើងមិនអាចធ្វើអ្វីកើតទេ បើមន្ត្រីទាំង១១៨នាក់ទទួលសិទ្ធិសេរីភាពវិញនៅក្នុងស្ថានភាពបច្ចុប្បន្នដែលគណបក្សសង្គ្រោះជាតិមិនឲ្យបង្កើតឡើងវិញ ហើយលោកកឹម សុខានៅតែស្ថិតនៅក្នុងការឃុំឃាំងក្នុងផ្ទះនោះ។បើសិនជាគេមានចេតនាពិតប្រាកដនោះតើមន្ត្រីទាំង១១៨នាក់ធ្វើសកម្មភាពនយោបាយយ៉ាងម៉េចកើតបើមិនមានគណបក្ស និងប្រធានផងនោះ?»
លោកនាយករដ្ឋមន្ត្រីហ៊ុន សែន បានបញ្ជាឲ្យកម្លាំងសមត្ថកិច្ចចាប់ខ្លួនលោក កឹម សុខា កាលពីយប់រំលងអធ្រាត្រថ្ងៃទី៣ខែកញ្ញាឆ្នាំ២០១៧ ដោយចោទថា មានបំណងផ្តួលរំលំរដ្ឋាភិបាល។ តុលាការមិនទាន់កាត់ទោសលោក កឹម សុខានៅឡើយទេ ប៉ុន្តែលោក ហ៊ុន សែន បញ្ជាក់ជាញឹកញាប់ថា មិនដោះលែងលោក កឹម សុខាទេ។
