ស្នងការនគរបាលខេត្តកំពង់ស្ពឺបានបំភ្លឺនិងច្រានចោលការផ្សាយព័ត៌មានរបស់ទូរទស្សន៍BTVជាទូរទស្សន៍កូនលោកនាយករដ្ឋមន្ត្រីហ៊ុន សែន ជុំវិញការចោទប្រកាន់ថា ពុករលួយក្នុង ការធ្វើអត្តសញ្ញាណប័ណ្ណទារលុយពី២០០ ០០០រៀល ទៅ៣០០ ០០០រៀល។
ព័ត៌មានផ្សព្វផ្សាយជុំវិញការចោទប្រកាន់មន្ត្រីនគរបាលនៅឃុំយាអង្គស្រុកថ្ពងទារលុយនេះBTVផ្សាយកាលពីថ្ងៃទី៣ខែធ្នូ។តាមលិខិតបំភ្លឺរបស់ស្នងការ។
សេចក្តីបំភ្លឺរបស់ស្នងការខេត្តកំពង់ស្ពឺលោកសម សាមួនចុះថ្ងៃទី១៥ខែធ្នូ ហើយអគ្គស្នង ការដ្ឋាននគរបាលជាតិទើបផ្សព្វផ្សាយនៅថ្ងៃនេះបានបញ្ជាក់ថា រឿងទារលុយនោះមិនពិត ទេ។
លោកបំភ្លឺថា ដើមហេតុដំបូងពលរដ្ឋម្នាក់ឈ្មោះជួន សុទុំមានអត្តសញ្ញាណប័ណ្ណ ហើយតែខុសថ្ងៃខែឆ្នាំកំណើតក៏កុហកថា បាត់រួចសុំធ្វើថ្មីនឹងសន្យាផ្តល់លុយឲ្យមន្ត្រីឃុំយាអង្គ ដែលជួយរឿងនេះ។ លោកស្នងការបន្តថា នគរបាលក្រោមបង្គាប់របស់លោក មិនទទួល លុយទេហើយណែនាំឲ្យដាក់ពាក្យបណ្តឹងរាយការណ៍ពីករណីបាត់នោះតាមនីតិវិធីច្បាប់ ដើម្បីបានធ្វើថ្មីដោយមិនអស់លុយ។
វីអូឌី មិនទាន់អាចសុំការឆ្លើយតបករណីនេះពីស្ថានីយ៍ទូរទស្សន៍BTV នៅឡើយទេ។
កាលពីថ្ងៃទី៧ខែវិច្ឆិកាឆ្នាំ២០១៨ប្រធាននាយកដ្ឋានអត្តសញ្ញាណប័ណ្ណ លោក ឃៀង សុគន្ធា បានព្រមានចាត់វិធានការចំពោះមន្ត្រីនគរបាលណាដែលយកលុយពីប្រជាពលរដ្ឋ ពេលទៅស្នើសុំអត្តសញ្ញាណប័ណ្ណ ដោយលោកថា ក្រសួងមហាផ្ទៃបានផ្ដល់សេវាសាធារណៈឥតគិតថ្លៃជូនពលរដ្ឋទូទៅ។
មន្ត្រីរូបនេះ បញ្ជាក់ថា ប្រជាពលរដ្ឋអាចរាយការណ៍ទៅក្រសួងមហាផ្ទៃបានតាមរយៈទំព័រហ្វេសប៊ុករបស់ក្រសួង ប្រសិនបើប្រជាពលរដ្ឋរូបណា ត្រូវបានសមត្ថកិច្ចបដិសេធផ្ដល់អត្តសញ្ញាប័ណ្ណ ឬក៏ផ្ដល់សេវាមិនល្អ។
