ក្រុមហ៊ុនបណ្ដាញផ្សព្វផ្សាយកម្ពុជា(CBS) បានបដិសេធនូវព័ត៌មានផ្សព្វផ្សាយនៅលើបណ្ដាញសង្គមថា លោកឧកញ៉ា គិត ម៉េង ត្រូវបានសមត្ថកិច្ចចាប់ខ្លួនទៅតាមបញ្ជារបស់លោកនាយករដ្ឋមន្ត្រីហ៊ុន សែន។
ក្នុងសេចក្ដីបំភ្លឺមួយកាលពីថ្ងៃម្សិលមិញបណ្ដាញផ្សព្វផ្សាយ CBS ដែលជាក្រុមហ៊ុនអភិបាលលើទូរទស្សន៍ CNC ទូរទស្សន៍ CTV ទូរទស្សន៍ MyTV និងទូរទស្សន៍ One TV នោះ បានទាត់ចោលការផ្សាយរបស់កាសែតភាសាអង់គ្លេស The Cambodia Daily និងគណនីហ្វេសប៊ុកមួយឈ្មោះ «CBN Khmer»ដែលបានដាក់ចំណងជើងថា «ដំណឹងបន្ទាន់ ហ៊ុន សែន ខឹងខ្លាំងណាស់ចាប់ខ្លួនឧកញ៉ា គិត ម៉េង មិញៗនេះ ផ្អើល»។
ក្រុមបណ្ដាញផ្សព្វផ្សាយ CBS ចាត់ទុកថា នេះជាការផ្សព្វផ្សាយព័ត៌មានមួលបង្កាច់ និងប្រមាថដល់កិត្ដិយសរបស់ឧកញ៉ា គិត ម៉េង ហើយថា ឧកញ៉ា គិត ម៉េង កំពុងតែសប្បាយរីករាយជាមួយក្រុមគ្រួសារនៅឯខេត្តសៀមរាប។
ការផ្សព្វផ្សាយលើបណ្ដាញសង្គមពីរឿងចាប់ខ្លួនឧកញ៉ា គិត ម៉េង នេះ គឺបន្ទាប់ពីកាសែតភាសាអង់គ្លេស The Cambodia Daily បានផ្សាយកាលពីថ្ងៃសុក្រកន្លងមកនេះនូវសារសំឡេងបែកធ្លាយរបស់លោក ហ៊ុន សែន ដែលថា លោកមានការខឹងសម្បារនឹងអគ្គនាយកថ្មីនៃស្ថានីយ៍ទូរទស្សន៍ CNC លោក អ៊ុក វរ៉ា និងដែលត្រូវជាក្មួយឧបនាយករដ្ឋមន្រ្ដី ម៉ែន សំអន ជុំវិញការចោទថា បានរំលោភសិទ្ធិបុគ្គលិកនៅទីនោះយ៉ាងធ្ងន់ធ្ងរ។
បើតាមការផ្សាយរបស់ The Cambodia Daily លោក ហ៊ុន សែន បានព្រមានចាត់វិធានការលើអាជីវកម្ម និងចាប់ខ្លួនឧកញ៉ា គិត ម៉េង ដោយថា ប្រសិនបើលោក អ៊ុក វរ៉ា មិនត្រូវបានបញ្ឈប់ពីតំណែងទេនោះ៕
