រដ្ឋាភិបាលកម្ពុជា បានបន្តការពារចំណាត់ការផ្លូវច្បាប់របស់ខ្លួនទៅលើប្រព័ន្ធផ្សព្វផ្សាយ និងក្រុមសង្គមស៊ីវិលនៅកម្ពុជានាពេលកន្លងមកថា មិនមែនជាការគំរាមកំហែងទៅលើសិទ្ធិសេរីភាពនៃការបញ្ចេញមតិនោះទេ។
រដ្ឋាភិបាលកម្ពុជាបានអះអាងបែបនេះនៅក្នុងរបាយការណ៍មួយដែលត្រូវបានបញ្ជូនទៅ និងរក្សាទុកនៅលើប្រព័ន្ធឯកសាររបស់ក្រុមប្រឹក្សាសិទ្ធិមនុស្សអង្គការសហប្រជាជាតិ សម្រាប់ក្រុមការងារទទួលបន្ទុកផ្នែកត្រួតពិនិត្យតាមពេលវេលាជាក់លាក់ជាសកល ដែលគ្រោងធ្វើឡើងនៅក្នុងកិច្ចប្រជុំលើកទី ៣២ ចាប់ពីថ្ងៃទី២១ ខែមករា ដល់ថ្ងៃទី១ ខែកុម្ភៈឆ្នាំក្រោយនេះ។
ក្នុងរបាយការណ៍សិទ្ធិមនុស្សរបស់ខ្លួនឆ្លើយតបទៅនឹងអនុសាសន៍ដល់ទៅជាង ៣០០នោះ រដ្ឋាភិបាលកម្ពុជាបានអះអាងថា វិធានការច្បាប់ទៅលើអ្នកសារព័ត៌មាន អ្នកការពារសិទ្ធិមនុស្ស និងអង្គការសង្គមស៊ីវិល មិនមែនជាការគំរាមកំហែងលើសិទ្ធិបញ្ចេញមតិនោះទេ។
ផ្ទុយទៅវិញ រដ្ឋាភិបាលបញ្ជាក់ថា នោះគឺជាអនុវត្តច្បាប់ទៅលើអ្នកដែលប្រើប្រាស់សិទ្ធិនេះដើម្បីធ្វើការញុះញង់ ចោទប្រកាន់ ឬបង្ខូចកេរ្ដិ៍ឈ្មោះអ្នកដទៃ ឬបង្កអសន្ដិសុខក្នុងសង្គម ផ្ទុយពីក្រមព្រហ្មទណ្ឌកម្ពុជា។
ក្នុងរបាយការណ៍ដដែលនេះ រដ្ឋាភិបាលថា នៅមានការខ្វែងគំនិតគ្នាមួយចំនួនរវាងរដ្ឋាភិបាល និងភាគីសង្គមស៊ីវិល និងអ្នកការពារសិទ្ធិមនុស្ស អំពីនិយមន័យនៃការអនុវត្តសិទ្ធិសេរីភាពបញ្ចេញមតិស្របតាមច្បាប់ជាតិ និងអន្ដរជាតិ។
ប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី សុំមិនបញ្ជាក់លម្អិតជុំវិញបញ្ហានេះទេ ដោយលោកថា លោកនឹងឡើងឆ្លើយការពារនៅចំពោះមុខក្រុមប្រឹក្សាសិទ្ធិមនុស្សអង្គការសហប្រជាជាតិ នាចុងខែមករាខាងមុខ។
លោកបន្ដថា៖ «នៅចុងខែមួយ ខ្ញុំនឹងទៅការពារទាក់ទងរឿង UPR ហ្នឹង។ ចាំជួបគ្នានៅហ្សឺណែវ!»។
ក្នុងរបាយការណ៍របស់ខ្លួន ការិយាល័យឧត្តមស្នងការអង្គការសហប្រជាជាតិកត់សំគាល់ថា ការតាក់តែង និងការបង្កើតច្បាប់របស់រដ្ឋាភិបាលកាលពីពេលកន្លងទៅ គឺជាការរឹតត្បឹតបន្ថែមទៀតលើសិទ្ធិបញ្ចេញមតិ ការជួបជុំ និងប្រមូលផ្ដុំគ្នាដោយសេរី។
របាយការណ៍ដដែលនេះក៏បានដកស្រង់សម្ដីអ្នករាយការណ៍ពិសេសអង្គការសហប្រជាជាតិ លោកស្រី រ៉ូណា ស្មីត ដែលអំពាវនាវឲ្យរដ្ឋាភិបាលលុបចោលបទប្បញ្ញត្តិនានាក្នុងក្រមព្រហ្មទណ្ឌកម្ពុជា ដើម្បីបញ្ឈប់ការរឹតត្បឹតលើក្រុមអង្គការសង្គមស៊ីវិល អ្នកការពារសិទ្ធិមនុស្ស និងអ្នកសារព័ត៌មាន។
ប្រធានផ្នែកស៊ើបអង្កេតអង្គការលីកាដូ លោក អំ សំអាត ច្រានចោលការលើកឡើងរបស់រដ្ឋាភិបាល ដោយថា ចំណាត់ការច្បាប់កាលពីកន្លងមក ត្រូវបានធ្វើឡើងដោយគ្មានភស្ដុតាងច្បាស់លាស់ និងគំរាមកំហែងដល់សកម្មភាពរបស់ក្រុមអង្គការសង្គមស៊ីវិលក្នុងស្រុក។
សកម្មជនការពារសិទ្ធិមនុស្សរូបនេះ បានបន្ថែមទៀតថា រដ្ឋាភិបាលកម្ពុជាបានចោទប្រកាន់សង្គមស៊ីវិលក្នុងស្រុកថា បានចូលរួមធ្វើបដិវត្តន៍ពណ៌បំផ្លាញសន្ដិភាពនៅកម្ពុជា។
លោកបន្ដថា៖ «ហាក់បីដូចជាមិនមានភស្ដុតាងផ្នែកផ្លូវច្បាប់ណារឹងមាំទេ។ វាជាការគំរាមកំហែង បំភិតបំភ័យទៅលើអង្គការសង្គមស៊ីវិល។ កន្លងមក យើងឃើញហើយក្នុងសៀវភៅ «ស» របស់រដ្ឋាភិបាល ក៏ចាត់ទុកអង្គការសង្គមស៊ីវិលមួយចំនួនដែលធ្វើការផ្នែកសិទ្ធិមនុស្ស លទ្ធិប្រជាធិបតេយ្យ និងការបោះឆ្នោតហ្នឹងថា ជាអ្នកចូលរួមក្នុងចលនាបដិវត្តន៍ពណ៌»។
ការត្រួតពិនិត្យជាសកលតាមពេលវេលាកំណត់ (Universal Periodic Review) គឺជាយន្ដការរបស់អង្គការសហប្រជាជាតិ ដែលបង្កើតឡើងដើម្បីត្រួតពិនិត្យការគោរពសិទ្ធិមនុស្សរបស់រដ្ឋជាសមាជិកនៅរៀងរាល់ ៥ឆ្នាំម្ដង ខណៈដែលកម្ពុជាបានឆ្លងកាត់យន្ដការនេះ ២ដងរួចមកហើយ គឺនៅឆ្នាំ២០០៩ និងឆ្នាំ២០១៤៕
