កម្មករបម្រើការងារនៅរោងចក្រមួយក្នុងស្រុកកណ្តាលស្ទឹង ខេត្តកណ្តាល បានផ្តុះការតវ៉ាទាមទារឲ្យថៅកែទទួលយកតំណាងពួកគេចូលធ្វើការងារវិញ និងទាមទារលក្ខខណ្ឌការងារមួយចំនួនទៀត។
ប្រធានសហជីពចលនាកម្មករប្រចាំរោងចក្រ លោក ហួន សុវិត ប្រាប់វីអូឌីថា កម្មករប្រមាណជិត ១០០នាក់បម្រើការងារនៅរោងចក្រ ប្រេស្ទិច ហ្គាមិន ស្ថិតក្នុងឃុំស្លែង បានផ្ទុះការតវ៉ានៅថ្ងៃនេះ បន្ទាប់ពីថៅកែរោងចក្របញ្ឈប់រូបលោកពីការងារដោយសារដឹកនាំកម្មករបង្កើតសហជីពក្នុងរោងចក្រ។
ប្រធានសហជីពរូបនេះ បន្តថា ថៅកែរោងចក្រនោះ មិនគោរពតាមច្បាប់សហជីព និងច្បាប់ការងារនោះទេ ដោយលោកថា មានការរើសអើងសហជីព និងមានការគំរាមកំហែងកម្មករដែលចូលជាសមាជិកសហជីពថែមទៀត។
លោកបន្ថែមថា៖ «អ្នកតវ៉ាមានប្រហែល ១០០នាក់ ព្រោះអ្នកខ្លះគាត់ខ្លាចចិន និងប្រធានគំរាមបញ្ឈប់គាត់។ ពួកគាត់តវ៉ាទាមទារឲ្យថៅកែទទួលយកខ្ញុំចូលធ្វើការងារវិញ និងទាមទារឲ្យថៅកែគោរពលក្ខខណ្ឌការងារមួយចំនួនទៀត ទាមទារឲ្យមានសេរីភាពសហជីព កុំឲ្យគៀបសង្កត់កម្មករ កុំបង្ខំកម្មករ និងកុំឲ្យមានការកាត់លុយកម្មករ»។
វិអូឌី មិនអាចសុំការឆ្លើយតបពីភាគីរោងចក្របានទេជុំវិញការតវ៉ារបស់ក្រុមកម្មករនេះ ខណៈប្រធានការងារខេត្តកណ្តាល លោក ធុល នាង ប្រាប់ថា រវល់ប្រជុំមិនអាចឆ្លើយបាន។
បើតាមកម្មក រោងចក្រ ប្រេស្ទិច ហ្គាមិន ជារោងចក្រផលិតផលកាត់ដេរសម្លៀកបំពាក់ មានកម្មករប្រមាណ ៥០០នាក់កំពុងបម្រើការងារ និងមានថៅកែជាជនជាតិចិន៕