ក្រសួងមហាផ្ទៃបានសម្រេចផ្ទេរមេពន្ធនាគារនៅរាជធានីភ្នំពេញ ហៅកាត់ថា PJ ដោយថា សមត្ថភាពដឹកនាំរបស់មន្ត្រីពន្ធនាគាររូបនោះ នៅមានកម្រិត ដែលមិនអាចធ្វើឲ្យមណ្ឌលឃុំឃាំងមួយនេះរីកចម្រើនទាន់សម័យកាលទំនើប។
អនុរដ្ឋលេខាធិការនៃក្រសួងមហាផ្ទៃ លោក ហេង ហាក់ ប្រាប់ VOD នៅថ្ងៃនេះថា រដ្ឋមន្ត្រីក្រសួងមហាផ្ទៃ លោក ស ខេង បានសម្រេចផ្ទេរប្រធានពន្ធនាគារខេត្តស្ទឹងត្រែង លោក ឈីម ធីតា ឲ្យមកកាន់តំណែងជាប្រធានពន្ធនាគាររាជធានីភ្នំពេញ ជំនួសប្រធានចាស់លោក ពេជ្រ យ៉ុន ដែលទើបតែត្រូវបានក្រសួងប្ដូរតួនាទីឲ្យទៅកាន់តំណែងជាអនុប្រធាននាយកដ្ឋានបណ្ដុះបណ្ដាលវិជ្ជាជីវៈ និងមុខរបរ នៅក្រោមអគ្គនាយកដ្ឋានពន្ធនាគាររបស់ក្រសួងវិញ។
មន្ត្រីក្រសួងមហាផ្ទៃរូបនេះ អះអាងថា រដ្ឋមន្ត្រីមហាផ្ទៃ លោក ស ខេង បានសម្រេចបែបនេះ បន្ទាប់ពីមានការស្នើសុំពីអភិបាលរាជធានីភ្នំពេញ លោក ឃួង ស្រេង ឲ្យផ្លាស់ប្ដូរលោក ពេជ្រ យ៉ុន ដោយថា មន្ត្រីរូបនេះ ខ្វះសមត្ថភាពគ្រប់គ្រង។
លោក ហេង ហាក់ មានប្រសាសន៍ថា៖ «គ្រាន់ថា សមត្ថិភាពគាត់នៅមានកម្រិត។ នៅពេលខាងមុខនេះពន្ធនាគារ PJ ត្រូវការអភិវឌ្ឍពង្រីក។ យើងត្រូវយកមន្ត្រីដែលមានសមត្ថភាព ដើម្បីយកមកធ្វើការគ្រប់គ្រង»។
ទោះជាយ៉ាងណា ការផ្លាស់ប្ដូរមេពន្ធនាគាររាជធានីភ្នំពេញរូបនេះ បានកើតឡើងជិត ២ខែក្រោយពីអង្គការការពារសិទ្ធិមនុស្សលីកាដូ បានចេញរបាយការណ៍មួយ ដែលបានលើកឡើងអំពីកំណើននៃចំនួនអ្នកជាប់ឃុំដល់កម្រិតមួយមិនធ្លាប់មានពីមុនមក និងស្ថានភាពចង្អៀតណែននៃអ្នកជាប់ឃុំក្នុងពន្ធនាគារនៅក្នុងប្រទេសកម្ពុជា។
ប្រធានគ្រប់គ្រងផ្នែកអង្កេតនៃអង្គការលីកាដូ លោក អំ សំអាត បានលើកឡើងថា ដើម្បីបញ្ចៀសកុំឲ្យមានការរិះគន់ទៅលើប្រព័ន្ធគ្រប់គ្រងរបស់រដ្ឋាភិបាល ថ្នាក់ដឹកនាំពន្ធនាគារ ត្រូវផ្តល់សិទ្ធិឲ្យអ្នកជាប់ឃុំស្មើគ្នា និងយកចិត្តទុកដាក់លើសុខភាពអ្នកជាប់ឃុំ។
លោក អំ សំអាត មានប្រសាសន៍ថា៖ «ការគ្រប់គ្រងល្អ អ្នកទោសទាំងអស់ទទួលបានសិទ្ធិស្មើគ្នា ទាក់ទងបញ្ហាសុខភាព បញ្ហាលំហាត់ប្រាណ វាទទួលបាននូវការយកចិត្តទុកដាក់ដូចគ្នា ហើយក៏ទទួលបាន មិនមានភាពរិះគន់ ឬការចោទប្រកាន់នៅភាពមិនប្រក្រតី ឬអំពើពុករលួយជាដើម»។
របាយការណ៍មានចំណងជើងថា «ពេលដែលដោះលែងឲ្យនៅក្រៅឃុំ៖ បញ្ឈប់ការឃុំខ្លួនបណ្ដោះអាសន្នមិនចាំបាច់» ដែលចេញដោយអង្គការលីកាដូ កាលពីចុងខែតុលាកន្លងមកនេះ បានឲ្យដឹងថា ពន្ធនាគាររាជធានីភ្នំពេញ ឬពន្ធនាគារ PJ ផ្ទុកជនជាប់ឃុំសរុបចំនួន ២៩៤នាក់ ក្នុងនោះអ្នកជាប់ឃុំបណ្ដោះអាសន្នរង់ចាំការកាត់ក្ដីមានចំនួនដល់ទៅ ២៣ភាគរយនៃចំនួនអ្នកជាប់ឃុំសរុប។
របាយការណ៍របស់មជ្ឈមណ្ឌលអន្តរជាតិសម្រាប់សិក្សាពន្ធនាគារពិភពលោក បានឲ្យដឹងថា អ្នកជាប់ឃុំក្នុងពន្ធនាគារ មានចំនួនសរុបដល់ទៅ ៣១០០៨នាក់នៅទូទាំងប្រទេស គិតត្រឹមចុងខែកញ្ញាឆ្នាំនេះ ដោយក្នុងនោះ ជនជាប់ឃុំជាស្ត្រីមានអត្រា ៨.៦ភាគរយ ជនជាប់ឃុំជាអនីតិជនមានចំនួន ៤.៩ភាគរយ ហើយអ្នកជាប់ឃុំបណ្ដោះអាសន្នរង់ចាំសវនាការមានចំនួនដល់ទៅ ៧១.៩ភាគរយ៕