ក្រុមគ្រួសារយោធិនពិការមកពីស្រុកកៀនស្វាយ ខេត្តកណ្ដាល បានស្វែងរកកិច្ចអន្តរាគមន៍ពីក្រសួងយុត្តិធម៌នៅថ្ងៃនេះ ដើម្បីឲ្យស្ថាប័ននេះ ជួយដោះស្រាយបញ្ហាដីធ្លី បន្ទាប់ពីតុលាការកំពូលបានសម្រេចឲ្យចាញ់ក្ដី ពាក់ព័ន្ធនឹងវិវាទដីធ្លីកាលពីឆ្នាំ២០០៨។
យោធិនពិការ លោក ចៅ សុវាសនា អះអាងថា លោករស់នៅលើដីនោះដែលមានទទឹង ២៥ បណ្ដោយ ៣០ម៉ត្រែ តាំងពីឆ្នាំ១៩៨៧ ដោយមានបង្កាន់ដៃកាន់កាប់ដីធ្លីចេញដោយអាជ្ញាធរមូលដ្ឋាន ប៉ុន្តែ លោកថា ដីរបស់គាត់ត្រូវបានជំទប់ទី១ ឃុំគគីរ លោក ជួន សារិន ឃុបឃិតគ្នាយក។
លោកបន្តថា នៅពេលដែលលោកនិងគ្រួសារមិនព្រមចេញពីដីដែលកំពុងរស់នៅនោះ លោកថា ឈ្មោះ ជួន សារិន បានយកឈ្មោះអ្នកផ្សេងប្ដឹងលោកនិងគ្រួសារទៅតុលាការ ហើយតុលាការក៏បានសម្រេចឲ្យលោកចាញ់ក្ដី និងបានចេញដីការុះរើផ្ទះ រួមទាំងរឹបអូសយកទ្រព្យសម្បត្តិផងដែរ។
លោកថា៖ «សូមឲ្យឯកឧត្តមរដ្ឋមន្ត្រីក្រសួងយុត្តិធម៌ ជួយផ្ដល់យុត្តិធម៌ឲ្យខ្ញុំបានដីរបស់ខ្ញុំមកវិញ ព្រោះដីនេះ មិនមែនជាដីខ្ញុំទិញ ហើយក៏មិនជាដីខ្ញុំរស់នៅបច្ចុប្បន្នដែរ គឺឪពុកម្ដាយខ្ញុំរស់នៅលើដីហ្នឹងតាំងពីគាត់នៅតូចរហូតដល់គាត់មានកូន ៥ ទៅ ៦ នាក់ កើតនៅលើដីហ្នឹង រហូតដល់គាត់មានចៅ។ ប៉ុន្តែ បែរជាបុគ្គល ជួន សារិន មានគំនិតទុច្ចរិតយកដីខ្ញុំ ក្បាល ១២ x ៣០ នៅលើទំហំដីក្បាល ២៥»។
ជំទប់ទី១ នៃក្រុមប្រឹក្សាឃុំគគីរ លោក ជួន សារិន បានបដិសេធ ដោយថា លោកមិនបានជាប់ពាក់ព័ន្ធរឿងនេះទេ។
លោកថា៖ «ដីហ្នឹង លេងសើចអី គេឡើងដល់តុលាការ កាត់ដល់ឧទ្ធរណ៍ ឡើងដល់ឧទ្ធរណ៍ឡើងអីហើយ ខ្ញុំឯណានៅពីក្រោយហ្នឹង។ ខ្ញុំមិនដែលទៅធ្វើអី បើខ្ញុំមិនដែលពាក់ព័ន្ធផង គ្រាន់តែថា គ្រាន់តែយើងសួរអ្នកណាបានមកផ្ដិតមេដៃអីយប់ហ្នឹង»។
អ្នកនាំពាក្យក្រសួងយុត្តិធម៌ លោក ជិន ម៉ាលីន បានឲ្យដឹងថា ក្រសួងនឹងពិនិត្យមើលសំណុំរឿងនេះ ប៉ុន្តែ ត្រូវការមូលដ្ឋានផ្លូវច្បាប់ច្បាស់លាស់ជាមុនសិន។
លោកថា៖ «ជាគោលការណ៍ច្បាប់បណ្ដឹងសើរើ កាលណាតុលាការកំពូលសម្រេចហើយ គឺបិទផ្លូវតវ៉ាហើយ។ អញ្ចឹង បណ្ដឹងសើរើ គឺមានតែអង្គព្រះមហាក្សត្រទេ ដែលអាចស្នើសុំ ឬមានចំណាត់ការនីតិវិធីឲ្យមាននីតិវិធីសើរើសំណុំរឿងណាមួយ ក៏ប៉ុន្តែ មុននឹងមានបើកឲ្យត្រួតពិនិត្យសើរើសំណុំរឿងហ្នឹង លុះត្រាតែមានមូលដ្ឋានផ្លូវច្បាប់ច្បាស់លាស់ណាស់ មិនមែនឲ្យតែយើងប្ដឹង គេសើរើនោះទេ»។
លោក ចៅ សុវាសនា អះអាងថា ទំហំដីទាំងមានទទឹង២៥ បណ្ដោយ៣០ ប៉ុន្តែ នៅឆ្នាំ២០០៨ តុលាការទាំង៣ថ្នាក់ ឲ្យសម្រេចឲ្យក្រុមគ្រួសាររបស់លោកចាញ់ក្ដី ដោយបានកាត់ដីទទឹង១២ម៉ែត្រ បណ្ដោល៣០ម៉ែត្រ ទៅឲ្យភាគីម្ខាងទៀត៕
