កម្មករជាង២ពាន់នាក់ បម្រើការងារនៅរោងចក្រមួយ ក្នុងសង្កាត់ស្ទឹងមានជ័យ រាជធានីភ្នំពេញបានបន្តកូដកម្មនៅក្នុងរោងចក្រទៀតនៅថ្ងៃនេះ ដើម្បីទាមទារឲ្យថៅកែទូទាត់ប្រាក់អតីតភាពការងារជូនពួកគេ។
ក្រុមកម្មករបម្រើការងារនៅរោងចក្រ W and D ស្ថិតក្នុងភូមិឬស្សី សង្កាត់មានជ័យ បាននាំគ្នាធ្វើកូដកម្មអត់ធ្វើការរយៈ៣ថ្ងៃហើយ ដើម្បីទាមទារឲ្យភាគីពាក់ព័ន្ធជួយដោះស្រាយករណីថៅកែរោងចក្រនេះមិនព្រមបើកប្រាក់អតីតភាពការងារ និងប្រាក់បំណាច់ឆ្នាំជូនពួកគេ។
កម្មករម្នាក់លោក តាន់ ដា ដែលអះអាងថា បម្រើការងារនៅរោងចក្រ W and D រយៈពេល៥ឆ្នាំហើយនោះ និយាយថា មានកម្មករខ្លះបានបម្រើការងារនៅរោងចក្រនេះចន្លោះពី៥ទៅជាង១០ឆ្នាំ ដោយថៅកែមិនដែលទូទាត់ប្រាក់អតីតភាពការងារជូនពួកគេនៅឡើយទេរហូតមកដល់ឆ្នាំ២០១៨នេះ។
លោកបន្ថែមថា៖ «កម្មករផ្ទុះកូដកម្មទាមទារលុយ៥ភាគរយហ្នឹង [ប្រាក់អតីតភាពការងារ] ដោយសារតែឆ្នាំថ្មីហ្នឹងរោងចក្រប្តូរកុងត្រា ហើយពីថេរវេលាគ្មានកំណត់ទៅជាមានកំណត់វិញ ៦ខែបើកម្តង ឬ ១ឆ្នាំបើក២ដង អញ្ចឹងក្រុមកម្មករទាមទារបើកអាឆ្នាំចាស់ឲ្យអស់សិន តែការចុះដោះស្រាយរបស់ក្រសួងនៅពេលនេះវាអត់មានដំណោះស្រាយអីសោះ»។
កម្មករម្នាក់ទៀតអ្នកស្រី អេង គឹមសាញ់ ដែលអះអាងថា បម្រើការងារនៅរោងចក្រនោះ១៣ឆ្នាំ បាននិយាយថា ការចចាររកដំណោះស្រាយរវាងកម្មករជាមួយភាគីរោងចក្រ និងតំណាងក្រសួងរយៈពេល៣ថ្ងៃ គឺមិនទាន់ទទួលបានដំណោះស្រាយនៅឡើងទេ ដោយសារតែភាគីក្រុមហ៊ុនសុំបង់រំលោះជូនកម្មករ ប៉ុន្តែក្រុមកម្មករមិនព្រម។
អ្នកស្រីបន្ថែមថា៖ «ពួកខ្ញុំសុំឲ្យសម្តេចជួយដោះស្រាយដោយបង់ដោយគិតពីអតីតភាពការងារតាំងឆ្នាំ២០០៨ដល់ឆ្នាំ២០១៨ហ្នឹង សុំបង់ផ្តាច់ ព្រោះពួកខ្ញុំជាកម្មករមិនអាចទទួលយកបានទេការបង់រំលោះនោះ»។
វិអូឌី មិនអាចសុំការឆ្លើយតបពីភាគីរោងចក្របានទេ ជុំវិញកម្មករតវ៉ាទាមទារប្រាក់អតីតភាពការងារនេះ។
អ្នកនាំពាក្យក្រសួងការងារលោក ហេង សួរ ប្រាប់ វីអូឌី តាមប្រព័ន្ធ WhatsApp ថា ក្រសួងបានបញ្ជូនក្រុមការងារចុះដោះស្រាយបញ្ហានេះហើយ។
លោក ហេង សួរ ឲ្យដឹងថា នៅឆ្នាំ២០១៩ រដ្ឋាភិបាលតម្រូវទូទាត់ប្រាក់អតីតភាពការងារជូនកម្មករមួយឆ្នាំ២ដង ដោយ១ដងនៅខែមិថុនា និង១ដងទៀតនៅខែធ្នូ ហើយថា ករណីរោងចក្រដួលរលំ គឺរដ្ឋាភិបាលធានាទាំងស្រុងក្នុងការទទួលខុសត្រូវ ដោយមិនឲ្យកម្មករណាម្នាក់ខាតបង់អត្ថប្រយោជន៍ដោយសាររោងចក្រដួលរលំឬក្ស័យធនឡើយ។
ប្រធានសហភាពការងារកម្ពុជា លោក អាត់ ធន់ មានប្រសាសន៍ថា ប្រសិនបើរយៈពេលដែលកម្មករបម្រើការងារកន្លងមកនោះបានប្រើកិច្ចសន្យាមិនកំណត់លើសពីពីរឆ្នាំ ថៅកែត្រូវគិតអតីតភាពការងារជូនកម្មករ ហើយថា បើមិនទូទាត់ឲ្យទេថៅកែនឹងមានកំហុស។
លោកបន្ថែមថា៖ «បើតាមច្បាប់ បើកាលណាលើសពី២ឆ្នាំទៅៗជាមិនកំណត់ បើកាលមិនកំណត់ត្រូវគុណលុយហ្នឹងឲ្យគេ អញ្ចឹងបើកាលនិយោជកមិនឲ្យអាហ្នឹង កម្មករតវ៉ាហើយ»។
កម្មករឲ្យដឹងថា រោងចក្រ W and D មានកម្មករជាង២ពាន់នាក់កំពុងបម្រើការងារ ហើយថា ពេលថ្មីៗរោងចក្រនេះបានប្តូរថៅកែថ្មី។ ក្រុមកម្មករព្រមានថា ប្រសិនបើនៅតែពុំមានដំណោះស្រាយទេ ពួកគេនឹងនាំគ្នាហែរក្បួនទៅរកកិច្ចអន្តរាគមន៍ដល់ក្រសួងការងារ និងស្ថាប័ន្ធរដ្ឋពាក់ព័ន្ធផ្សេងទៀត៕